2
Obwesigwa bwa Mattathia
1Mu biseera ebyo, kabona ow’oku nda ya Yehoaribu nga bamweta Mattathia mutabane wa Yoanne era mwidhukulu wa Simeoni, yaava e Yerusalemu yaaja yaasenga e Modeini. 2Mattathia oyo yali ni batabane be bataanu: Yoanne ye baayetanga Gaddi, 3Simoni ye baayetanga Thassi, 4Yuda ye baayetanga Makkabeo, 5Eleazari ye baayetanga Avarani, ni Yonathani ye baayetanga Affusi.
6Mattathia bwe yabona ebibi byonabyona ebyalinga bikolebwa mu Buyudaaya ni mu Yerusalemu, 7yaakoba ati:
“Nkagwireku nze! Lwaki nazaalibwa,
okubona ng’ab’eighanga lyange bazikirizibwa, n’ekibuga ekitukuvu nga kifafaagana?
Lwaki mba obwagho, nga ndi kubona ekibuga kigheebwayo eri abazigu,
n’eisinzizo nga liira mu mikono gy’abamaghanga agandi?
8Eisinzizo lifuuse ng’omuntu azira katiibwa naire.
9Ebikozesebwa byamu ebirungi einho,
baabinhagulula baabitwala ng’omunhago.
Abaana baife baitirwa mu nguudo,
n’abaisuka baife baitibwa n’empiima dh’abazigu.
10Ghalighooku eighanga waire eirala liti eritaagumbaku mu kibuga ekyo,
era eritaanhagululaku bintu byakyo?
11Amadholobera gaakyo goonagoona baaganhagulula baagatwala.
Buti ekibuga ekyo tikikaali kya idembe naire, kyafuuka ng’oti mwiru.
12Bona, eisinzizo lyaife abamaghanga agandi baalyonoine,
baalimalamu ekitiibwa kyalyo ekyali nga tikiroodheka.
13Kale kiki kyene ekikaatusigazaagho nga tukaali balamu?”
14Mattathia ni batabane be baakanulamu ebivaalo byaibwe olw’enaku, beesiba kutiya, baalira amaziga mabitirivu.
15Agho abakungu ba kyabazinga abaakakanga abantu okuva ku kwikiriza Katonda, baidha mu kibuga Modeini okukaka abantu baayo bagheeyo emisengo eri emisambwa. 16Bangi ku Baisiraeli baaja ye bali, nga n’omuli ni Mattathia ni batabane be. 17Abakungu ba kyabazinga abo baakoba Mattathia bati: “Niiwe omukulembeze w’abantu ateebwamu ekinhagansi mu kibuga kino, era batabane bo n’abo abakuliku oluganda bakughagira. 18Kale niiwe obe asooke ghano okukola ng’ekiragiro kya kyabazinga bwe kikoba. Abamaghanga agandi boonaboona, n’abantu b’omu Buyudaaya, nga n’omuli n’abo abaasigala mu Yerusalemu, baamala ira okukola batyo. Bwe mukola mutyo, iwe ni batabane bo mwidha kufuna ekitiibwa eky’okwetebwanga ‘Bakagwa ba Kyabazinga’. Mwidha kufuna ni zaabu, ni feeza, n’ebirabo ebindi kamaala.”
19Mattathia yairamu n’amamiro ag’amaani ati: “Tifaayo oba abamaghanga agandi boonaboona mu bwakyabazinga buno bagondera ekiragiro kya kyabazinga, baava ku nsinza ya badhaadha baibwe. 20Aye nze n’abaana bange n’abantu abandiku oluganda, twidha kuja mu maiso n’okukuuma endagaano Katonda ye yakola ni badhaadha baife. 21Ekyo tikiribaagho naire, ife okuva ku Mateeka ge ni ku biragiro bye. 22Titwidha kugondera kiragiro kya kyabazinga, era titwidha kuva ku nsinza yaife waire akatono kati.”
23Yali yaakamala okwogera ati, mulala ku bantu b’omu Modeini yaavaayo yaira emberi wa buli muntu, yaaghaayo omusengo eri emisambwa ku alutaari eyali agho, yaatuukiriza ekiragiro kya kyabazinga. 24Mattathia bwe yamubona, obusungu bwamugema inho yaayenda na kwabika olw’okulumirwa einho Amateeka ga Katonda. Agho yaataama, yaaja yaatuumira ku muntu oyo, yaamwitira agho gheene ku alutaari eyo. 25Yaita n’omukungu wa kyabazinga eyali ali kukaka abantu okughaayo emisengo. Era yaamala yaamenhagho ni alutaari eyo. 26Mu nsambo eyo Mattathia yaayoleka nga bw’alumirwa einho Amateeka ga Katonda, ng’oti ni Finehasi bwe yakola lwe yaita Zimuri mutabane wa Salu.2:26: Kub 25:6-15
Olutalo lwa Mattathia
27Agho Mattathia yaaja ng’abitabita mu kibuga nga bw’ayasiikana ati: “Buli muntu omwesigwa eri endagaano ya Katonda era agondera Amateeka ge, aidhe annonereze.” 28Agho mwene, ni batabane be, baalumukira mu nsozi, baaleka ebintu byaibwe byonabyona.
29Mu kiseera ekyo, Abaisiraeli kamaala abaali banoonia okukola ebyoleka obutuufu n’amazima, baaja mu irungu babenga eyo. 30Baaja olw’okudaazibwadaazibwa okwali kubabitiriireku, era baatwala n’abaana baibwe ni bakazi baibwe n’ebyayo byaibwe. 31Amawulire gaatuuka mangu ku bakungu ba kyabazinga, ni ku baisirukale be abaali mu kifo eky’okwewogomamu e Yerusalemu, nga gakoba gati ghaligho abantu abaanhooma ekiragiro kya kyabazinga, abaaja ni beegisa mu irungu. 32Abaisirukale kamaala baaja okubalumuukirira. Baabatuukaku, baasimba weema dhaibwe nga badhirinzagainia n’edha bale Abayudaaya, baategeka okubalumba ku Sabbato.2:32: 2 Bamak 6:11 33Agho baaghereekereza Abayudaaya ebibono nga baasiikana bati: “Muveeyo eyo, mugondere ekiragiro kya kyabazinga. Agho twidha kubalekera obulamu bwaimwe.”
34Abayudaaya bairamu bati: “Titwidha kuvaayo, era titwidha kugondera kiragiro kya kyabazinga, waire okwonoona Sabbato.”
35Mu kaseera keene ako Abaisirukale baabalumba. 36Aye ate Abayudaaya ghazira naire kye baakola kwerwanaku, waire okubakanhuugirira amabaale, oba okusemba emiryango egy’empuku mwe baali beegisiisa. 37Baakoba bukobe bati: “Twenatwena ka tufe nga ghaziragho kintu kyonakyona emyoyo gyaife kye gitulumiriza mule. Eigulu n’ensi n’abadhulirwa baife, nti muli kutwita aghazira nsonga ntuufu naire.” 38Kale abazigu balumba Abayudaaya abo ku lunaku lwa Sabbato, baita abasaadha, ni bakazi baibwe, n’abaana baibwe, n’ebyayo byaibwe. Abantu be baita baaghera lukumi (1,000).
39Mattathia ni baine bwe baakiwulira, baanakughala inho ekibitiriire. 40Baakoba bati: “Twenatwena bwetunaakola nga Bayudaaya banaife abo bwe bakoze, ni tuloba okulwanisa abamaghanga agandi abo olw’okulwanirira obulamu bwaife n’ensinza yaife, baja kutuzikiriza mangu batumaliregho irala ku nsi.” 41Kale ku lunaku olwo baasalagho bati omuntu yeenayeena bw’alibalumba ku lwa Sabbato, baja kwerwanaku balobe kufa boonaboona, nga Bayudaaya banaibwe bwe baafiira mu mpuku.
42Agho ekikunsu eky’Abayudaaya abalumirwa einho eighanga lyaibwe n’ensinza yaalyo aghazira kukyuka naire, baidha beeyunga ku Mattathia ni baine. Baali basaadha balwani ab’amaani abaziramu ntete mu Isiraeli yoonayoona. Era beevaamu beene kyeyendere, beeghaayo okulwanirira Amateeka ga Katonda. 43Era buli muntu eyalumukanga yeewonie okukirigibwa, yabeeyungangaku yaayongera ku maani ge baali nago. 44Bwe baamala okwekolamu eigye, baamaliranga obusungu bwaibwe mu kulumba Abayudaaya ababi ab’enkwe. Abo abaabawunukanga baalumukiranga y’abamaghanga agandi okwewonia. 45Mattathia ni baine baajanga buli ghantu nga bamenhamenhagho ebigulumo eby’okusinzizaaku emisambwa, 46baajanga nga bakeketa bya ntaka buli mulenzi ye baayagaananga nga ti mukekete mu biketezo bya Isiraeli, 47baasobola bukalamu n’okuyiiga abakungu bale abamaghanga agandi abeekuluntazanga, era baabamalayo. 48Baatoola n’Amateeka ga Katonda mu ngalo edh’abamaghanga agandi ni mu dha bakyabazinga baibwe. Olwo baaba nga bamenhiegho obuyinza bwa kyabazinga Antioko omwonooni.
Okufa kwa Mattathia
49Ekiseera kya Mattathia eky’okufa bwe kyatuuka, yaakoba batabane be ati: “Bino ebiseera bye tulimu bya bikolwa bya bukambwe na kweraliikirira. Abantu abeekuluntaza n’abali mu buyinza, era ife batufiire nseko dha balamu. 50Aye imwe baana bange, mwegheeyo inho okugonderanga Amateeka ga Katonda, era nga muli beetegefu okughaayo n’obulamu bwaimwe olw’okulwaniriranga endagaano ya Katonda ye yakola ni badhaadha baife. 51Mwidhukire ebyo badhaadha baife bye baakola mu biseera byaibwe. Mwena mukolenga nga beene bwe baakola, olwo muligheebwa ekitiisa ekitaloodheka, n’amaina gaimwe gaidhukirwanga ebyanda n’ebyanda. 52Mwidhukire Aburahamu bwe yalebwa, ni yeesiga Musengwa, era Musengwa oyo n’amusiima n’amufuula owuwe akola ebituufu. 53Yosefu mu biseera bye yabereeramu mu buzibu, yasigala ng’agondera ebiragiro bya Katonda, yaafuuka omufuzi ow’ensi Misiri.2:53: Mainh 39:1—45:28 54Finehasi, dhaadha waife, olw’okuba yeeghaayo inho olwa Katonda, yagheebwa ekisuubizo nti abaana be n’abaidhukulu n’abaja okubanga bakabona ebyanda n’ebyanda. 55Yoshua yafuulibwa omulamuzi mu Isiraeli, olw’okuba yagondera ebiragiro bya Katonda.2:55-56: Kub 13:1—14:12 56Kalebu bwe yaira n’akobera bukalamu abantu abeesoloiza nga bwe byali, yagheebwa ekibandha ky’eitaka ng’empeera. 57Daudi olw’okugonza Katonda obutalekera, yafuulibwa kyabazinga era yagheebwa ekisuubizo nti abaana be n’abaidhukulu n’abanaabanga bakyabazinga ebyanda n’ebyanda.2:57: 2 Sam 7:16 58Eliya olw’okuba yeeghaayo inho olw’Amateeka ga Katonda, yatwalibwa mu igulu.2:58: 2 Bakyab 2:9-12 59Hanania ni Azaria ni Mishaeli, baawona enimi edh’omuliro okubookya olw’okuba baali n’okwikiriza.2:59: Dan 3:8-30 60Musengwa yawonia Danieli empologoma okumulya olw’okuba yali musaadha aziraku kintu kyonakyona kimuvunaanibwa.2:60: Dan 6:1-24; Bel 31-42 61Agho ni mugwaine mukimanhe nti mu buli luse olw’abantu olwiragho, ole yeenayeena bwe yeesiga Musengwa talibulwa maani. 62Omuntu omwonooni bw’abatiisatiisanga ng’abeesoomera mutatyanga, kuba aja kufa, ekitiisa kye kiweegho ng’avunze, enhengere dhimulye. 63Olwaleero basobola okumugha ekitiisa aye olwaidho yaaba nga takaaligho olw’okuba omubiri gwe guba gwizeeyo mu itaka, n’entegeka dhe dhoonadhoona dhaakoma agho. 64Imwe baana bange, mubenga bagumu era ba maani mu kulwanirira Amateeka ga Katonda, kuba n’agalibaleetera okufuna ekitiisa ekinene.
65“Ndidhi nti muganda waimwe Simoni musaadha mugezi, kale muwulirisenga ng’oti bwemwandiwuliriisa nze mwene. 66Yuda Makkabeo abaire mulwani wa maani obulamu bwe bwonabwona, kale aidhanga okubakulembera mu ntalo nga mulwanisa omuzigu. 67Mwete abantu boonaboona abagondera Amateeka ga Katonda baidhe babeeyungeku, olwo muje mwesasuuze olw’ebibi ebyakolebwa ku bantu baimwe. 68Mwesasuulize ku bamaghanga agandi olw’ebyo bye baakola, era buliidho mugonderenga Amateeka ga Katonda bye galagira.”
69Agho Mattathia yaabasabira enkabi, yaamala yaafa. 70Yafa mu mwaka ogwekikumi n’ana n’omukaaga (146). 2:70 mu mwaka ogwekikumi n’ana n’omukaaga (146): Ogwo nga n’omwaka ogwekikumi n’enkaaga n’omukaaga (166) nga Kurisito akaali kwidha. Baamuziika mu lwambiidhi lwa badhaadha be e Modeini. Abantu boonaboona mu Isiraeli baamulira inho.