16
1Agho Yoanne mutabane wa Simoni yaava e Gezeri, yaaja okukobera lata we ebyo Kendebeo bye yakola. 2Simoni yaayeta batabane be abakulu, Yuda ni Yoanne, yaabakoba ati: “Nze, ni baganda bange, n’ab’endhu ya lata wange boonaboona, tulwaine entalo dha Isiraeli okuva nga tukaali bato okutuusa ni ye buli eno. Era ku mikuzi kamaala ebintu bibaire bitujiiranga bukalamu, twasobola okununula Isiraeli. 3Buti nkairiighe, aye imwe ku lw’obusaasizi bwa Musengwa, mukuze. Mbeeni mwire mu kifo kyange n’ekya muganda wange, muje mulwanirire eighanga lyaife. Nsaba Katonda ow’omu igulu abenga n’imwe ng’abayamba.”
4Agho Yoanne yaasoloza eigye mu Baisiraeli ery’abalwani abaghera emitwalo ebiri (20,000), nga mulimu n’ab’oku mbalaasi. Baasitula okuja okulumba Kendebeo. Aye baasooka baasula e Modeini, 5memale ku nkyo einho ku lunaku olwairirira, baasimbira mu kiketezo eky’oku museetwe. Okuja okulinga bati nga babona eigye einene einho ery’abaisirukale ab’oku bigere n’ab’oku mbalaasi, nga bali kwidha okwagaanana nabo, aye nga ghaligho omwiga ghagati ghaibwe nabo. 6Yoanne n’eigye lye beeteega mu nhiriri okulwanisa abazigu abo. Aye Yoanne bwe yabona ng’abaisirukale be bali kutya okusomoka omwiga, mwene yaasooka okusomoka, olwo boona baasomoka nga bali kumuvaaku einhuma. 7Yaagabamu eigye lye, yaatoola abaisirukale ab’oku mbalaasi yaabata ghagati mu b’oku bigere kuba ku luuyi olw’abazigu, abaisirukale ab’oku mbalaasi baali kamaala inho. 8Agho baafuuwa amagwala agalaalika okulumba olutalo, Kendebeo n’eigye lye baaghangulwa baalumuka, era bangi ku basaadha be baitibwa. Abaasigalagho baalumukira mu kifo kyaibwe eky’okwewogomamu ekyali e Keduroni. 9Mu kiseera ekyo, Yuda baali bamufumiite baamutaaku ebibwa. Aye muganda we Yoanne yeeyongerayo okubingirira abazigu, yaabatuukiza irala ku kibuga Keduroni, Kendebeo kye yali amaze okuzimba obuyaaka. 10Abazigu abandi baalumukira ni ku bituuti ebirengererwaku eby’omu nimiro edh’omu Azoto. Yoanne yaakunaania omuliro ku kibuga, yaakyokya. Ku lunaku olwo ku bazigu kwafaaku abantu ng’enkumi ibiri (2,000). Yoanne yaamala yairayo bukalamu e Buyudaaya.
Simoni ni batabane be babiri baitibwa
11Simoni Omukulu wa Bakabona yali nga yalonda Putolemi mutabane wa Abubo, yaamutaagho okufuga ekiketezo eky’oku museetwe ogw’e Yeriko. Putolemi yali mukombe inho, 12olw’okuba yali mukoirume wa Simoni oyo Omukulu wa Bakabona. 13Putolemi oyo yali yeegwaniza inho obukulu, ng’ayenda afuge ensi eyo yoonayoona. Kale yaakola olukwe aite Simoni era aite ni batabane ba Simoni. 14Agho olwatuuka, Simoni yaaja okulambuula ebibuga by’omu Buyudaaya abone ebiruma abantu. Yaatuuka e Yeriko ng’ali ni batabane be Mattathia ni Yuda, mu mwezi ogweikumi n’omulala ogwetebwa Shebati, mu mwaka ogwekikumi n’ensanvu n’omusanvu (177).16:14 mu mwaka ogwekikumi n’ensanvu n’omusanvu (177): Ogwo nga n’omwaka ogwekikumi n’asatu n’ena (134) nga Kurisito akaali kwidha. 15Putolemi yaabasangaaza mu kafo ke ak’okwewogomamu ke yazimba, akeetebwa Doko. Aye waire yabasangaaza, ebyo byali bya ku munwa bunwa, nga mule ali kubalebereza bulebereze. Yaabafumbira embaga makeke, aye nga mu kafo ako ak’okwewogomamu akweseemu abantu. 16Simoni ni batabane be bwe baanhwa ni batamiira, Putolemi yaavaayo n’abasaadha be, ye baali beekwese. Baidha nga bagemye empiima baingira mu kisenge kye baliiramu, baita Simoni ni batabane be bombi, era baita ni ku bandi ku bagheereza be. 17Kale Putolemi oyo atyo bwe yakola olukwe olubi einho lutyo, ebirungi bye baamukolera yaabisasulamu bibi.
18Agho Putolemi yaaghandiika ebyabaagho ebyo, yaabigheereza kyabazinga. Yaamusaba amugheereze amagye gamuyambeku. Era yaamusaba amughe ensi eyo n’ebibuga byamu abifuge. 19Yaaghandiikira abakulira amagye ng’abasaba bamweyungeku. Yaabasuubiza okubagha, feeza, zaabu n’ebirabo. Agho yaagheereza abandi ku basaadha be baje e Gezeri baite Yoanne. 20Ate abandi yaabagheereza baje beefuge Yerusalemu n’olusozi oluliku eisinzizo. 21Aye ghaabaagho omuntu eyalumuka embiro n’abeesookayo e Gezeri, n’akobera Yoanne nga lata we ni baganda be bwe babaise. Era yaamukoba ati: “Putolemi agheereiza abaisirukale be, baidhe weena bakwite.” 22Yoanne bwe yawulira ebyo, yaatya inho. Aye nga bwebaamulabula nga bukaali, yasobola okugema abaali batumiibwa okwidha okumwita, yaabaita.
23Ebindi byonabyona ebigema ku Yoanne okuva lwe yasikira lata we: entalo dhe yalwana, ebikolwa bye yakola ng’aziramu ntete naire, ebimante bye yazimba obuyaaka, n’ebindi bye yakola, 24byonabyona byaghandiikibwa mu kitabo ekyogera ku byanda bye yabeeramu Omukulu wa Bakabona.