15
Antioko Owomusanvu asaba Simoni obuyambi
1Agho Antioko mutabane wa kyabazinga Demetirio ng’ali ku bizinga eby’omu nhandha, yaaghandiika embaluwa, yaagigheereza Simoni Omukulu wa Bakabona era omukulembeze asinga mu boonaboona, afuga Abayudaaya n’eighanga lyonalyona. 2Yaakoba ati: “Nze kyabazinga Antioko, nkulamwisa iwe Simoni Omukulu wa Bakabona era omukulembeze w’Abayudaaya asinga mu boonaboona, naalamusa n’eighanga lyo lyonalyona. 3Abantu ababi ab’enkwe baanhaga obwakyabazinga bwa badhaadha bange baabwefuga. Aye ndi kutegeka okubweiriza, nsobole okwizaagho ekitiisa kyabwo nga bwe kyaligho eira. Nsoloizaayo eigye ery’abaisirukale abapangise, naategekayo n’amaato ag’okulwana. 4Ndi kwetegeka okulumba ensi eyo, nwanise abo abaafafaagania ensi yaife ni bazikiriza ebibuga kamaala mu bwakyabazinga bwange.
5“Kale nkukakasa nti emisolo n’amabandha byonabyona bakyabazinga abansookagho bye baakusonigha, zeena mbikusoniighe. 6Era nkwikiriiza okwekolerayo empiiya edhidho ku bubwo, dhe munaakozesanga mu nsi yo. 7Yerusalemu n’eisinzizo tibiighoozebwengaku musolo. Eby’okulwanisa byonabyona bye mwagheesa n’ebifo eby’okwewogomamu bye mwazimba era bye mulimu, bija kusigala nga bibyo. 8N’amabandha ge bakubandha buti mu ndyanga ey’obwakyabazinga waire n’ago ge bandikubandhie ye bwidha, gasaziibwamu byanda na byanda. 9Bwe ndimala okweiriza obwakyabazinga bwange, iwe mwene n’eisinzizo n’eighanga lyo, ndibagha ekitiibwa ekitaloodheka. Era ekitiibwa kyaimwe ekyo ensi yoonayoona erikibona.”
10Mu mwaka ogwekikumi n’ensanvu n’ena (174)15:10: mu mwaka ogwekikumi n’ensanvu n’ena (174): Ogwo nga n’omwaka ogwekikumi n’asatu n’omunaana (138) nga Kurisito akaali kwidha. Antioko yalumba ensi ya badhaadha be. Abaisirukale abasinga bungi baira ku luuyi lwe, nga Tirufo asigaizaagho bwa batono bati. 11Kyabazinga Antioko yaabingirira Tirufo okumutuusa ku kibuga Dori eky’oku mbali kw’enhandha. 12Olwo Tirufo yaakitegeera ng’ebibye bibi, kuba abaisirukale be baali bamaze okumulekulira agho. 13Agho Antioko yaazingiza ekibuga Dori, ng’ali n’abalwani ab’amaani emitwalo ikumi n’ebiri (120,000), n’ab’oku mbalaasi kanaana (8,000). 14Amaato ge ag’omu lutalo geeyimba mu lutalo, yaazingiza ekibuga ekyo ku bukalu ni ku nhandha, nga ghazira muntu asobola kwingira waire okufuluma.
Abaroma baghagira Abayudaaya
1515:15: 1 Bamak 12:16 Agho Numenio ni be yali babo, bairayo e Yerusalemu nga bava e Roma, nga bali n’embaluwa Abaroma ye baaghandiikira bakyabazinga abagheraku n’ensi edhigheraku. Embaluwa eyo ng’ekoba eti:
16“Nze Lukio omufuzi w’Abaroma nkulamwisa iwe kyabazinga Putolemi. 17Abakwenda baaviire ye bakagwa baife be tukolagana nabo Abayudaaya, baidha ye tuli okwizaagho obuyaaka omukwano n’enkolagana ebyaligho eira. Baatumiibwa Simoni Omukulu wa Bakabona ng’ali ghalala n’Abayudaaya boonaboona. 18Baatuleeteire ekirabo eky’engabo enene eya zaabu, ng’ezitogha kilo ebikumi bitaanu (500). 19Kye tuviire ni tusalagho okughandiikira bakyabazinga abagheraku n’okughandiikira ensi edhigheraku, nga tubasaba balobe kukola kabi koonakoona ku Bayudaaya, ni ku bibuga byaibwe, ni ku nsi yaibwe. Era balobe kubalwanisa, waire okuyambaku abo ababa babalumbye. 20Twakiboine nga kirungi okutwala engabo ye baatuleeteire. 21Kale bweghabangagho abantu ababi ab’enkwe, ni bava mu Buyudaaya ni balumukira mu nsi yaimwe, mubaghangayo eri Simoni Omukulu wa Bakabona yaababonereza ng’ajiira ku mateeka g’Abayudaaya.”
22Lukio yaghandiika embaluwa yeene eyo yaagigheerezaaku kyabazinga Demetirio, ni Attalo, ni Ariarathe, ni Arusake. 23Era yaagigheerezaaku n’ensi dhino dhoonadhoona: Sampusame, ni Siparita, ni Delo, ni Mindo, ni Sikyoni, ni Karia, ni Samo, ni Panfilia, ni Lukia, ni Halikarunasso, ni Rode, ni Faseli, ni Kosi, ni Side, ni Arado, ni Gorutina, ni Kunido, ni Kupuro, ni Kurene. 24Embaluwa yeene eyo era baagikoopololamu eyindi ng’egifaananira irala, baagigheereza Simoni Omukulu wa Bakabona.
Antioko Owomusanvu yeefuula ku Simoni
25Agho kyabazinga Antioko yaaja yaazingiza ekibuga Dori omukuzi ogwokubiri. Yaakirumba buli kaseera era yaakizimbaku n’ebintu eby’okuniiniraku okukirwanisa. Olwo yaaba ng’asibiiremu Tirufo n’abasaadha be, baaba nga tibakaasobola kufuluma oba okubaayo omuntu aingira ye bali. 26Simoni yaagheereza Antioko abaisirukale enkumi ibiri (2,000) abaali basingamu okulwana, baje bamuyambe okulwana. Yaamugheereza ni feeza, ni zaabu, n’ebintu ebindi eby’okukozesa mu lutalo kamaala inho. 27Aye Antioko yaabiroba era yaamenhagho endagaano dhoonadhoona dhe yali amaze okukola ni Simoni oyo. Mu nsambo eyo Antioko yeeyawula ku Simoni obutairayo kukolagana naye, ng’afuuse muzigu we. 28Antioko oyo yaatuma Athenobio owundi ku bakagwa be, aje eri Simoni bategeeragane naye. Yaaja yaakoba Simoni ati: “Oli kwefuga Yoppa, ni Gezeri, n’ekifo eky’okwewogomamu ekiri mu Yerusalemu, ate nga ebibuga ebyo biri mu bwakyabazinga bwange. 29Wafafaagania ebiketezo ebiriiraine ebibuga ebyo, waayonoonayonoona ensi eyo era weiriza ebifo kamaala mu bwakyabazinga bwange. 30Kale mpegaano oteekwa okwiza ebibuga bye weefuga, n’empiiya edh’emisolo edhaava mu biketezo bye weefuga endha wa Buyudaaya. 31Bwe kitaba kityo, mu kifo kyabyo oidha kumpaamu empiiya dha feeza edhigheza talanta ebikumi bitaanu (500)15:31 talanta ebikumi bitaanu (500): Edho nga ni kilo ng’oti omutwalo mulala na kasanvu (17,000) edha feeza. olw’okundiyira ebyayonooneka n’emisolo gye nafiirwa. Bw’onaaloba ebyo, twidha kwidha tukulwanise tukughangule.”
32Athenobio oyo mukagwa wa kyabazinga bwe yatuuka e Yerusalemu, n’abona ekitiisa Simoni kye yali nakyo, n’ebintu ebyakolebwa mu feeza ni mu zaabu ebyali mu kisenge kye baliiramu, n’eby’obukombe ebindi kamaala ebyali agho, yeewuunhia inho. Agho yaamala yaakobera Simoni oyo kyabazinga bye yamutuma. 33Simoni yaamwiramu ati: “Ife titutoolangaku itaka ku bamaghanga gandi, waire okubanhagaku ekintu kyaibwe kyonakyona. Aye kye twakola kwali kweiriza bintu ebyo ebyaife badhaadha baife bye baatusikiza. Ebintu ebyo ekiseera kyatuuka abazigu baife baabitutoolaku mu kufufunkiriza. 34Mpegaano nga bwetufunie akaghagaanhia, tuli kukola inho okubona nga tweiriza badhaadha baife bye baatusikiza. 35Aye mu Yoppa ni mu Gezeri bye muli kukaayanira einho, twidha kubaghaamu empiiya dha feeza edhigheza talanta kikumi (100),15:35 talanta kikumi (100): Edho nga ni kilo ng’oti enkumi isatu na bina (3,400) edha feeza. waire ng’abantu b’omu bibuga ebyo baakola akabi kanene inho ku ighanga lyaife.”
Athenobio tiyamwiramu, 36aye yairayo ye kyabazinga mu busungu obubitirivu, yaamukobera Simoni bye yayogera, era yaamukobera ekitiisa Simoni kye yali nakyo, n’ebintu ebindi byonabyona bye yabona. Kyabazinga yaasungughala ekibitiriire.
Yoanne aghangula Kendebeo
37Ebyo byabanga biri kubaagho eno, ate ng’ere Tirufo ali kusaabala lyato kulumukira mu kibuga Oruthosia. 38Agho kyabazinga Antioko yaataagho Kendebeo aduumirenga amagye ag’omu biketezo eby’oku nhandha, era yaamugha abaisirukale ab’oku bigere n’ab’oku mbalaasi. 39Yaamulagira aje agumbe e Buyudaaya, azimbe buyaaka ekibuga Keduroni akiteeku n’emiryango emigumu, memale alwanise Abayudaaya. Aye mwene kyabazinga yaaja mu maiso n’okubingirira Tirufo.
40Kendebeo yaatuuka e Yamonia, yatoolera okutigomya abantu ng’alumba Buyudaaya, yaagema abantu era yaabaita. 41Yaazimba buyaaka ekibuga Keduroni, yaakitaamu abaisirukale ab’oku bigere n’ab’oku mbalaasi, bajenga nga bazinduukiriza abantu mu nguudo dha Buyudaaya era babanhagululenga nga kyabazinga bwe yamulagira.