13
Simoni akulembera Abayudaaya
1Agho Simoni yaakitegeera nga Tirufo asoloiza eigye einene, era ng’ali kutegeka okulumba ensi Buyudaaya agizikirize. 2Bwe yabona abantu nga bali kudhugumira olw’okutya, yaaniinaniina okuja e Yerusalemu. Bwe yatuukayo yaasoloza abantu, 3yaabagumya ng’abakoba ati: “Mwidhi bukalamu byonabyona, nze ni baganda bange n’ab’endhu ya lata wange, bye tukoze olw’Amateeka ga Katonda n’olw’eisinzizo. N’entalo dhe tulwaine dhoona mudiidhi, taaku n’ebizibu bye tubiseemu. 4Baganda bange boonaboona baitibwa lwa kulwanirira Mateeka ago n’eisinzizo, ni ku lw’eighanga lyaife Isiraeli. Nze zenka, ninze nkaasigairegho. 5Aye ngwananga naaloba kugezaaku kuwonia bulamu bwange mu kiseera eky’akabi, kuba nze ghazira kye nsinga baganda bange. 6Ndidha kulwanirira eighanga lyange n’eisinzizo, nwanirire ni bakazi baimwe n’abaana baimwe, nga neesasuuliza ku bamaghanga agandi boonaboona abeeyimbye aghalala okutuzikiriza olw’obukyayi bwe bali nabwo ku ife.”
7Abantu bwe baawulira ebibono ebyo bairamu omwoyo, 8era bairamu n’amamiro ag’amaani bati: “Buti niiwe omukulembeze waife mu kifo kya baganda bo, Yuda ni Yonathani. 9Ja otulwaniregho entalo dhaife, era kiisi ky’onaatukoba twidha kukikola.” 10Kale Simoni yaasoloza abalwani boonaboona ab’amaani, yaaja yaayanguyaaku okumaliriza okuzimba ebimante ebyezungulwire Yerusalemu, yaabigumya bukalamu. 11Yaatuma e Yoppa Yonathani mutabane wa Abusalomu ng’ali n’eigye einene, yaabinga mu kibuga ekyo abantu baamu, yaakyefuga.
12Agho Tirufo yaava e Putolemai n’eigye enene, yaaja okulumba Buyudaaya. Yaaja ni Yonathani ole muganda wa Simoni nga musibe. 13Simoni yaasimba weema dhe mu Adida, ng’alingiriiza ekiketezo eky’oku museetwe. 14Tirufo bwe yakitegeera nga Simoni n’eyaira mu kifo kya muganda we Yonathani era nga yali yeetegeike okumulwanisa, yaagheereza abakwenda y’ali ng’akoba ati: 15“Muganda wo Yonathani twamusiba lwa kuba bwe yali mu bufuzi tiyasasula mabandha ge baali bamubandha mu ndyanga ey’obwakyabazinga. 16Aye twidha kumulekula bw’onaasasula empiiya dha feeza edhigheza talanta ekikumi,13:16 talanta ekikumi: Edho nga ni kilo ng’oti enkumi isatu (3,000) edha feeza. n’otugheereza ni batabane be babiri tubakuume ng’omusingo okukakasa nti bwetunaamulekula taatwefuulire.”
17Simoni yamanha nga Tirufo ali kumulimba bulimbe. Aye era yaagheerezaayo empiiya ni batabane ba Yonathani ababiri, olw’okweghala okuleetagho einho okweyawulayawulamu mu Bayudaaya, batuuke n’okukoba bati: 18“Yonathani baamwita, kuba Simoni yaloba okugheerezaayo empiiya ni batabane ba Yonathani oyo ababiri.” 19Kale yaakola nga Tirufo bwe yamukoba. Aye Tirufo oyo yaamala yeekyusa, yaaloba kulekula Yonathani.
20Ebyo nga biwoire, Tirufo yaidha okulumba ensi eyo agizikirize. Yaaja ng’abita mu ngira ey’e Adora, nga bwe yeetooloola ensi eyo. Aye Simoni n’eigye lye baamujiiraku buli ghantu ghe yajanga, baalinzagania naye obweni. 21Abaisirukale abazigu abaali mu kifo eky’okwewogomamu eky’omu Yerusalemu, baayongeranga okugheereza Tirufo obukwenda nga bamupikiriza aje mangu ye bali ng’abitira mu irungu, abatwalire eby’okulya. 22Tirufo yaategeka bukalamu eigye lye ery’ab’oku mbalaasi baje balumbe. Aye obwire obwo omugozi gwagwa mungi, yaaloba kusobola kuja mu nsozi. Yaakyusa yaaja mu Gileadi. 23Bwe yali ali kumpi okutuuka e Basikama yaita Yonathani, baamuziika agho. 24Tirufo oyo yaamala yaakyusa, yairayo mu nsi y’ewaibwe.
25Agho Simoni yaatumisa baaleeta omulambo gwa muganda we Yonathani, yaamala yaaguziika mu kibuga kya badhaadha baibwe e Modeini. 26Abantu boonaboona mu Isiraeli baakuba inho empungu olwa Yonathani, era baamala enaku kamaala nga bali kumulira. 27Simoni yaazimba ekiidhukizo ku magombe ga lata we ni baganda be nga kigungumavu, abantu basobolenga okukirengera nga bali ghala. Yaakizimbiraku amabaale amaseene emberi n’einhuma. 28Yaazimba obuntu musanvu nga bulingagaine obuli ng’oti busozi, bwe beeta piramidi, nga bwa kwidhukirirangaku lata we n’inhina ni baganda be abana. 29Yaamala yaabwetoolooza empango enkologho, nga dhitoneibwaku ebifaananie eby’ebintu by’omu lutalo n’ebifaananie eby’amaato. Olwo abo boonaboona abasaabala ku maadhi basobole okwidhukiranga obughanguzi bwaibwe nga baboine ebifaananie ebyo. 30Ekiidhukizo ekyo kye yazimba e Modeini kikaaligho okutuusa ni ye buli eno.
31Agho Tirufo yeefuula ku kyabazinga omuto Antioko Owomukaaga, yaamwita, 32yaatwala obwakyabazinga bwe obwa Siria. Tirufo oyo yaatuusa ku nsi eyo obuzibu obutaloodheka.
33Simoni yaazimba mu Buyudaaya ebifo eby’okwewogomamu, yaabitaaku ebituuti ebireeyiriri, n’ebimante ebigumu, n’emiryango egiriku endhigi dhe basiba n’eminhololo. Yaamala yaatereka eby’okulya n’ebikozesebwa ebindi mu bifo ebyo. 34Yaatuma abakwenda ye kyabazinga Demetirio Owokubiri, ng’amusaba asonighe ensi eyo emisolo, kuba Tirufo oyo yakolanga kirala kya kunhagulula bantu abo kyonka. 35Kyabazinga Demetirio yaamughandiikira ng’amwiramu ati:
36“Nze kyabazinga Demetirio, nkulamwisa iwe Simoni Omukulu wa Bakabona era mukagwa wa bakyabazinga. Nnamwisa n’ab’eighanga ly’Abayudaaya boonaboona ghalala n’abakulembeze baibwe. 37Engule eya zaabu n’olusansa bye mwatugheereza, tubifunie. Tuli beetegefu okukola n’imwe endagaano ey’okuleetagho emiraala, n’okughandiikira abakungu baife babasonighe emisolo. 38Byonabyona bye twaisaniaku okubaghanga biidha kusigala nga bikaabagheebwa. N’ebifo eby’okwewogomamu bye mwazimba bija kusigala nga byaimwe. 39Tubasoniighe ebibi n’ebisobyo bye mubairenga mukola okutuusa ni ye buli eno. Tubasoniighe n’omusolo ogw’eighanga gwe mubaire mukaali kusasula, era n’emisolo egindi gyonagyona gye babairenga babasolozaaku mu Yerusalemu tibaidhanga kugibasolozaaku kabiri. 40Era bweghaba nga ghaligho mu imwe abantu abali n’ebisaanizo okwingira mu magye ag’obwakyabazinga bwaife, baje beeghandiise. Ka ghabeegho emiraala ghagati ghaife n’imwe.”
41Mu mwaka ogwekikumi n’ensanvu (170),13:41: omwaka ogwekikumi n’ensanvu (170): Ogwo nga n’omwaka ogwekikumi n’ana n’ebiri (142) nga Kurisito akaali kwidha. abamaghanga agandi abaatuntuzanga abantu be baafuganga, baatoolebwa mu Buyudaaya. 42Olwo abantu baatoolera okutanga enaku ku bighandiiko byaibwe ni ku ndagaano dhaibwe bati: “Mu mwaka ogusooka ogwa Simoni Omukulu wa Bakabona omukologho, omuduumizi era omukulembeze w’Abayudaaya.”
4313:43: 1 Bamak 11:34Agho mu biseera ebyo, Simoni yaazingiza ekibuga Gezeri yaakyezunguluza amagye ge. Yaazimba ekintu ekitambuzibwa, nga kya kuniiniraku okulwanisa ekibuga. Yaakiseesa ku kimante ky’ekibuga, yaalumba era yeefuga ekindi ku bituuti ebirengererwaku. 44Abantu abaali ku kintu ekyo eky’okuniiniraku, baatuumira mu kibuga, baakireetamu akasasamalo ak’amaani. 45Abasaadha abaali mu kibuga ghalala ni bakazi baibwe n’abaana, baakanulamu ebivaalo byaibwe olw’okunakughala. Baayasiikana inho nga basaba Simoni aleetegho emiraala nabo. 46Baakoba bati: “Otatubonereza nga bwe tugwaniire olw’ebibi bye tukola, aye tusaasire.”
47Simoni yaamala yaisania nabo, yaalekera agho okubalwanisa. Aye yaababinga mu kibuga ekyo, era yaatukuza endhu dhaibwe edhaalimu ebisinzibwa ebitali Katonda, memale abasaadha be baakingira nga bali kwemba enhembo edhisaaka Katonda. 48Yaatoola mu kibuga ekyo obwonoonefu bwonabwona, yaakitaamu abantu abagema Amateeka ga Katonda. Yaakizimbaku ebimante ebigumu okukyezunguluza, olw’okukikuuma obukalamu. Ni mwene yeena yeezimbiramu ekisaagaati eky’obwakyabazinga ekikye.
49Olwo abantu abaali mu kifo eky’okwewogomamu eky’omu Yerusalemu baasalibwaku, nga tibakaasobola kufuluma kuja kugula waire okutunda ekintu kyonakyona. Kale endhala yaabaluma inho era bangi ku abo baalambuka baafa. 50Agho baalirira Simoni akole nabo endagaano ey’emiraala. Yeena yaaganha. Aye yaababinga mu kifo ekyo eky’okwewogomamu, era yaamala yaakitukuza okukimalamu obwonoonefu bwonabwona obwakirimu. 51Ku lunaku olwabiri n’eisatu olw’omwezi ogwokubiri mu mwaka ogwekikumi n’ensanvu n’omulala (171),13:51: omwaka ogwekikumi n’ensanvu n’omulala (171): Ogwo nga n’omwaka ogwekikumi n’ana n’omulala (141) nga Kurisito akaali kwidha. ghaabaagho okusagamba okw’amaani mu kibuga omwo, olw’okuba omuzigu ow’amaani yali amaze okutoolebwagho mu Isiraeli. Abayudaaya baingira mu kifo ekyo eky’okwewogomamu nga bali kwemba enhembo edhisaaka n’edheebaza Katonda, nga bagemye n’ensansa mu ngalo, era nga bali kukuba entongooli, n’obugoma, n’ensaasi. 52Simoni yaataagho ekiragiro eky’okukuzanga olunaku olwo buli mwaka mu kusagamba. Yaazimba ebimante ebigumu ku luuyi olulingiriire ekifo eky’okwewogomamu, olw’okukuuma obukalamu olusozi oluliku eisinzizo. Era mwene n’abasaadha be, baabanga omwo nga bagumbye. 53Simoni bwe yabona mutabane we Yoanne ng’asaadhakwire, yaamugha okuduumira eigye lyonalyona ng’aba mu Gezeri.