12
Yonathani akolagana n’abantu ab’e Roma n’ab’e Siparita
1Yonathani bwe yabona ng’ebintu biri kumujiira bukalamu, yaalonda abakwenda yaabatuma e Roma, baje bakakase omukwano nga gukaaligho n’abantu baayo era bagwizegho buyaaka. 2Yaagheereza n’embaluwa e Siparita ni mu biketezo ebindi, nga dhirimu obukwenda obufaanana n’obwo. 3Abakwenda baaja e Roma, era baabaganha baingira mu lwekobaano baakoba bati: “Yonathani Omukulu wa Bakabona ghalala n’abantu b’eighanga Buyudaaya, batutumye okwizaagho obuyaaka omukwano n’enkolagana n’imwe nga bwebyalingagho eira.” 4Abaroma baagha abakwenda abo embaluwa dhe banaaghanga abafuzi ab’omu biketezo bye baalinga bali n’okubitamu, olwo babaghenga obukuumi obubasobozesa okutuuka obukalamu nga bairayo e Buyudaaya.
5Eno n’embaluwa eyakoopololwa ku ere Yonathani ye yaghandiikira ab’e Siparita:
6“Nze Yonathani Omukulu wa Bakabona ghalala n’ab’olwekobaano olw’eighanga, ni bakabona, n’abantu boonaboona ab’omu Buyudaaya, tubalamwisa imwe baganda baife abali mu Siparita. 7Mu biseera eby’eira, kyabazinga waimwe Ario yagheereza Omukulu wa Bakabona waife Oniasi embaluwa ng’ekoba eti imwe mutuliku oluganda. Kale tubagheereiza n’embaluwa eyakoopololwa ku mbaluwa eyo ghalala n’eno ebooleke kye tuli kukoba. 8Oniasi yasangaalira omukwenda waimwe n’ekitiibwa, era yaakakasa nga bweyafuna n’embaluwa yaimwe eyalimu ekirangiriro ekyataagho omukwano n’enkolagana ghagati ghaimwe n’ife. 9Aye, waire nga ebyo buti titukaabyetaaga olw’okuba n’ebitabo ebitukuvu ebitwizaamu amaani, 10tubaghandiikiire okwizaagho obuyaaka oluganda olwo n’omukwano. Tulobe kufuuka bagwira ye muli, kuba ekiseera kinene ekibiseegho kasookanga mutughandiikira embaluwa eyo. 11Tubaidhukira buliidho nga tuli mu nnaku dhaife edh’ebibinuko, ni mu nnaku enkulu edhindi, ni mu kughaayo emisengo gyaife, era ni mu kusaba kwaife, kuba ekyo n’ekituufu era n’ekigwaniire aboluganda okukola. 12Era tusagamba olw’ekitiibwa kye muli nakyo. 13Eno ife tubaire mu kudaagadaaga na mu ntalo ebyomwidhirano, nga bakyabazinga b’amaghanga agatwetooloire batulumba buli kiseera. 14Aye imwe titwayenda kubadaaza na ntalo edho, waire okudaaza abantu abandi be tukolagana nabo ng’otaireku ni bakagwa baife, 15kuba tuligho n’obuyambi obuva mu igulu obututoola mu ngalo edh’abazigu baife ni butuleetera okubaghangula. 16Kale tulonze Numenio mutabane wa Antioko ni Antipateri mutabane wa Yasoni, twabagheereza e Roma okwizaagho obuyaaka omukwano n’enkolagana ghagati ghaife n’Abaroma nga bwebyalingagho eira. 17Tubalagiire n’okwidha ye muli babatulamukize, era babagemye embaluwa eno egema ku kwizaagho obuyaaka oluganda lwaife. 18Tubasaba mutwiremu embaluwa eno.
19“Eno n’embaluwa eyakoopololwa ku ere eyaghandiikirwa Oniasi: 20‘Nze kyabazinga Ario ow’e Siparita, nkulamwisa iwe Oniasi Omukulu wa Bakabona. 21Tuzwire ekighandiiko ekikoba kiti Abasiparita n’Abayudaaya baaluganda, era kiti boonaboona ba ku nda ya Aburahamu. 22Mpegaano ekyo nga bwetukitegeire, tubasaba mutughandiikire mutukobere ebibafaaku. 23Bwe munaatwiramu, twidha kubaghandiikira tubamanhise tuti ebyayo byaife n’ebintu byaife, mwena byaimwe ng’oti n’ebyaimwe twena bwe biri ebyaife. Era tulagiire abakwenda baife babainhonhole bukalamu ku nsonga eyo.’ ”
Entalo Yonathani ni Simoni dhe baalwana
24Agho Yonathani yaakitegeera ng’abakungu ba Demetirio baize kabiri okulumba n’eigye einene okusingaku eryasooka. 25Kale yaava e Yerusalemu, yaaja mu kiketezo ky’e Hamathi abaagaane eyo kuba tiyayenda kubagha kaghagaanhia ka kwingira mu nsi ye. 26Yaagheereza abakeesi mu kifo abazigu ghe baasimba weema dhaibwe. Abakeesi baira baamukobera ng’abazigu bwe baali bali kutegeka okulumba Abayudaaya obwire. 27Kale agho endhuba ng’eri kugwa, Yonathani yaalagira abaisirukale be boonaboona beekuume obutawongera nga bagemye eby’okulwanisa byaibwe obwire bwonabwona, olw’okwewonia okulumbibwa. Yaataagho n’abakuumi okwetooloola ekifo ghe baasimba weema dhaibwe. 28Abazigu bwe baakiwulira bati Yonathani n’abaisirukale be beetegeike okulwana, baatya, n’emyoyo gyabatekemuka. Baaleka agho omuliro gwe baali bakunaaniiza nga guli kwaka, baalumuka. 29Yonathani n’abaisirukale be baabona ng’omuliro guli kwaka aye nga tibaidhi kibairegho, okutuukiza irala nga bukyeire. 30Agho Yonathani yaababingirira, aye yaalemwa okubatuukaku, kuba baali baamaze ira okusomoka omwiga Eleuthero. 31Kale Yonathani oyo yaakyuka, yaaja yaalwanisa Abawarabu abeetebwa Abazabadea. Yaabaghangula era yaanhagulula ebintu byaibwe. 32Agho yaasimbulagho weema dhe, yaaja e Damasiko yaabitabita mu kiketezo eky’eyo kyonakyona ng’aja bw’akyetegereza.
33Mu kiseera n’ekirala ekyo, ni Simoni yeena yaaja yaatuukira irala mu Asikaloni ni mu bifo eby’okwewogomamu ebiriinainegho. Bwe yaamala yaakyukira e Yoppa, yaakizinduukiriza yaakyefuga. 34Era yaakitaamu n’enkambi y’abaisirukale bakikuume, kuba yawulira ati ekifo eky’okwewogomamu eky’e Yoppa baali bali kutegeka kukighaayo mu ngalo dh’abaisirukale ba Demetirio.
35Yonathani bwe yaira, yaayeta olwekobaano lw’abakulembeze, yaakola nabo entegeka ey’okuzimba mu Buyudaaya ebifo eby’okwewogomamu, 36n’okwongera ku bugungumavu bw’ebimante ebyezungulwire Yerusalemu, n’okuzimba ekimante ekigungumavu kyawule ekibuga ku kifo eky’okwewogomamu. Olwo kibe nti abaisirukale ab’omuzigu abali mu kifo eky’okwewogomamu ekyo basaliibwaku, nga tibakaasobola kugula waire okutunda ekintu kyonakyona. 37Abantu baakolera ghalala okugumya ebimante ebikuuma ekibuga, kuba ekitundu eky’e buvandhuba ku Kiiko kya Kiduroni kyali nga kyagwa. Era baalongoosa n’ekitundu ekyetebwa Kafenatha. 38Ni Simoni yeena yaazimba buyaaka ekibuga Adida ekiri mu kiketezo eky’omu kiiko, yaakizimbaku n’ekimante okukyezunguluza, yaakitaaku n’emiryango egirimu endhigi dhe basiba n’eminhololo.
Tirufo agema Yonathani
39Agho Tirufo yaagezaaku okudheemera kyabazinga Antioko, ng’ayenda mwene yeefuule kyabazinga wa Siria. 40Aye yali n’okutya ati Yonathani taja kumuganha kukola ekyo, ati aja bwa kumulwanisa amulemese. Kale yaasala amagezi ag’okumugema amwite. Agho yaaja e Bethi Shani. 41Yonathani yeena yaidha okwagaanana naye eyo e Bethi Shani, ng’ali n’abaisirukale emitwalo ena (40,000) abasingamu okulwana. 42Tirufo bwe yabona nga Yonathani aidhie n’eigye einene lityo, yaatya okumulwanisa. 43Yaamusangaalira n’ekitiibwa, yaamwandhula ye bakagwa be boonaboona, yaamugha ebirabo, yaalagira n’abaisirukale be okugondera Yonathani oyo ng’oti ni bwe bandimugondeire mwene. 44Agho yaabuuza Yonathani ati: “Ku lwaki odaaziiza abantu bano boonaboona, ng’ate ghaziragho lutalo lwe tulimu? 45Basiibule baireyo ewaibwe, olondemu bwa basaadha batono bati n’ababe basigale n’iwe, memale oidhe tuje twembi e Putolemai. Ndidha kukugemya ekibuga ekyo, n’ebifo ebindi eby’okwewogomamu, n’abaisirukale, n’abakulira emirimo boonaboona. Olunaamala nga nkyusa ndhirayo waife, kuba ekyo n’ekindeese ghano.” 46Yonathani yaamwesiga yaakola nga bw’amukobye, yaasiibula abaisirukale be bairayo e Buyudaaya. 47Yaasigazaaghooku bwa abaisirukale enkumi isatu (3,000). Aye nga ku abo, enkumi ebiri (2,000) abalese mu Galilaaya, olukumi lulala (1,000) lwonka nga n’olumugherekeireku. 48Yonathani bwe yaingira ekibuga Putolemai, abantu baamu baigalagho emiryango, baamugema, era baita boonaboona be yaingira nabo.
49Tirufo yaagheereza abaisirukale ab’oku bigere n’ab’oku mbalaasi, mu Galilaaya ni mu kiketezo eky’oku museetwe ekinene, baje baite abaisirukale ba Yonathani boonaboona. 50Aye ng’ere abaisirukale ba Yonathani baali bali kudhuuba bati Yonathani bamwise ghalala ni boonaboona be yali nabo. Kale buli muntu yaagumya mwine, era baatambulira ghalala nga beetegeike okulwana. 51Abaali bali kubabingirira bwe baababona nga beetegeike okulwana, baakyuka bairayo. 52Kale abaisirukale ba Yonathani abo Abayudaaya, bairayo e Buyudaaya baatuuka bukalamu, aye nga batiire inho. Abantu b’eighanga Isiraeli boonaboona baalira inho Yonathani, nga badhuuba bati baamwita ghalala ni boonaboona be yali nabo. 53Abantu ab’amaghanga goonagoona agabeetooloire baagezaaku okubazikiriza nga bakoba bati: “Mpegaano baziragho anaabakulembera waire okubayamba. Kale ka tubalwanise tubasaanizeegho irala, babe nga tibakaidhukirwanga ku nsi naire.”