11
Okugwa kwa kyabazinga Alekisandero Epifane
1Agho kyabazinga Putolemi yaasoloza eigye ery’abaisirukale kamaala inho ng’oti musenho gwa ku nhandha, ghalala n’olugololiro olw’amaato. Yaayenda okutega Alekisandero akatego, amunhageku obwakyabazinga bwe abugaite ku bubwe. 2Kale yaaja ng’ayolekeire Siria, eno nga bw’asuubiza okuleetagho emiraala. Abantu b’omu bibuga byayo bamwiguliragho endhigi baamusangaaza, kuba kyabazinga Alekisandero n’eyabalagira okukola batyo olw’okuba Putolemi yali mukoirume we eyamuzaaliranga mukazi we. 3Aye buli kibuga Putolemi kye yaingirangamu, yaakitangamu enkambi y’abaisirukale be.
4Bwe yatuuka mu Azoto, abantu baamu baamulaga eisabo lya Dagoni eryayokebwa, n’ekibuga ekyo Azoto kyene nga bwe kyazikirizibwa aghalala n’ebibuga ebindi ebikyetooloire. Baamulaga n’emirambo egyasansaanira buli ghantu n’egyo egy’abantu Yonathani be yayokya mu lutalo, egyabungibwa ku ngira Putolemi oyo ye yaidhiramu. 5Baamukobera byonabyona Yonathani bye yakola ng’ayenda bivunaanibwe kyabazinga Putolemi oyo. Aye kyabazinga Putolemi mwene yaasirika busirike. 6Agho Yonathani yaaja e Yoppa okusangaaza kyabazinga Putolemi oyo mu bitiibwa ebitaloodheka. Baalamusagania, baaghaya era baasula yeene eyo. 7Yonathani yaamala yaamugherekeraku okumutuusa ku mwiga Eleuthero, memale mwene yairayo e Yerusalemu. 8Mu nsambo eyo kyabazinga Putolemi yaaghamba ebibuga eby’omu biketezo eby’oku nhandha, okutuukira irala e Seleukia ekiri okumpi n’enhanda. Era yeeyongeranga mu maiso okukola entegeka ey’okulwanisa Alekisandero.
9Agho kyabazinga Putolemi yaagheereza abakwenda ye kyabazinga Demetirio ng’amukoba ati: “Idha tukole endagaano. Ndidha kutoola mughala wange ku Alekisandero mmukughe omubayize, olwo ofuge obwakyabazinga bwa lata wo. 10Ndi kweidhusa ekyampeesa Alekisandero mughala wange, kuba abaire ali kugezaaku okundhita.” 11Putolemi yaghaayiriza atyo Alekisandero olw’okwenda okumunhagaku obwakyabazinga bwe. 12Kale yaatoola mughala we ku Alekisandero, yaamugha Demetirio. Era yaamweyawulaku nga takaakolagana naye, olwo enzigu ghagati ghaibwe yeeyolekera irala. 13Agho Putolemi yaingira mu Antiokia, yaatoola engule ya Siria. Olwo yaavaala engule ibiri: eya Misiri n’eya Siria.
14Mu kiseera ekyo kyabazinga Alekisandero yali mu Kilikia, olw’okuba abantu baayo baali nga beediimye. 15Bwe yawulira Putolemi ky’akoze, yaaja okumulwanisa. Aye Putolemi yaidha n’eigye ery’amaani yaamulumusaagho. 16Alekisandero yaalumukira e Buwarabu okwewonia, eno nga Putolemi bw’agulumizibwa olw’obughanguzi obwo. 17Aye ghaabaagho Omuwarabu ng’ayetebwa Zabadieli, yaatema ku Alekisandero omutwe, yaagugheereza Putolemi. 18Nga ghabiseegho enaku ibiri, Putolemi yeena yaafa. N’abaisirukale be abaali mu bifo eby’okwewogomamu boona baitibwa abatyamye ab’omu kiketezo ekyo. 19Agho Demetirio Owokubiri yaafuuka kyabazinga mu mwaka ogwekikumi n’enkaaga n’omusanvu (167).11:19: mu mwaka ogwekikumi n’enkaaga n’omusanvu (167): Ogwo nga n’omwaka ogwekikumi n’ana n’etaanu (145) nga Kurisito akaali kwidha.
Yonathani akola ebyaleetera Demetirio Owokubiri okumusiima
20Mu biseera kumpi n’ebirala ebyo, Yonathani yaasoloza abantu b’omu Buyudaaya baje balumbe ekifo eky’okwewogomamu eky’omu Yerusalemu. Baazimbagho ebintu kamaala eby’okuniiniraku okukirumba. 21Aye ghaabaagho abantu ababi ab’enkwe, abaali nga baakyagha ensi yaibwe yeene. Baaja ye kyabazinga Demetirio Owokubiri, baamuseeghera bati Yonathani azingiiza ekifo eky’okwewogomamu eky’omu Yerusalemu. 22Demetirio bwe yakiwulira yaasungughala ekibitiriire, era yaasitukiramu yaaja e Putolemai. Yaaghandiikira Yonathani embaluwa emulagira okulekera agho okuzingiza ekifo ekyo eky’okwewogomamu. Yaamukoba aje mangu e Putolemai ye yali babyogereku mu lwekobaano.
23Yonathani bwe yafuna embaluwa eyo, yaalagira bongere bwongere okuzingiza ekifo ekyo eky’okwewogomamu. Yaalonda abandi ku bakulembeze mu Isiraeli n’abandi ku bakabona, bamugherekereku. Yaata obulamu bwe mu kabi, 24kuba yaja e Putolemai kyabazinga ye yali. Yaamutwalira zaabu, ni feeza, n’engoye, n’ebirabo ebindi kamaala. Era yaasiimya kyabazinga oyo, 25waire ng’abantu ab’eighanga lye beene ababi ab’enkwe baali bamaze okumwogeraku obubi. 26Yaamubisa nga bale be yasikira bwe baamubisanga, yaamugha ekitiisa mu maiso ga bakagwa be boonaboona. 27Yaamukakasa okuba Omukulu wa Bakabona, yaamwiriza n’ebitiibwa byonabyona bye yali nga yamala eira okufuna, era yaamuta ku lukalala olw’abo abaayetebwanga “Bakagwa ba Kyabazinga” abasookerwaku.
28Yonathani yaasaba kyabazinga Demetirio oyo, atwikule Buyudaaya n’ebiketezo bya Samaria ebisatu emisolo,11:28: Mu bighandiiko ebindi kiri nti ebiketezo bya Samaria ebisatu Mu Lugureki kiri nti ebiketezo ebisatu n’ekiketezo ky’e Samaria. nga bw’amusuubiza ati singa akola atyo, waakumugha empiiya dha feeza edhigheza talanta ebikumi bisatu (300).11:28 talanta ebikumi bisatu (300): Edho nga ni kilo emitwalo ng’oti ebiri n’enkumi ibiri (22,000) edha feeza. 29Kyabazinga yaaganha, era yaghandiikira Yonathani embaluwa ekakasa ebyo byonabyona, ng’ekoba eti:
30“Nze kyabazinga Demetirio, nkulamwisa iwe muganda wange Yonathani, naalamusa n’ab’eighanga Buyudaaya boonaboona. 31Eno n’embaluwa eyakoopololwa ku ere erimu ebikugemaku ye naghandiikira owoluganda Lasithene, nga buti ndi kugikugheereza omanhe by’ekoba. 32‘Nze kyabazinga Demetirio, nkulamwisa iwe lata wange Lasithene. 33Nsazeegho ghabeegho ebirungi bye tugwaniire tukolere bakagwa baife ab’eighanga ly’Abayudaaya, olw’omwoyo omulungi gwe batwoleka. 3411:34: 1 Bamak 10:30 Ensi Buyudaaya n’ebiketezo ebisatu, eky’Efuraimu n’eky’e Ludda n’eky’e Arimathea, nga kw’otaire n’ebiketezo byonabyona ebitwalibwa ebiketezo ebyo, mbikakaisa bibe byaibwe ng’ebyo n’ebiketezo ebyatoolebwa ku Samaria ni bigaitibwa ku Buyudaaya. Ekyo kiidha kuganhulanga boonaboona abanaajanga e Yerusalemu okughaayo emisengo, kuba basoniyiibwa omusolo ogwa buli mwaka ku birime ni ku bibala, ogubaire gugheebwangayo eri kyabazinga. 35Tubasoniighe n’ebindi bye babairenga n’okutusasula: ekintu ekirala ekirala ku buli bintu eikumi omuntu by’aba ng’ali nabyo, emisolo n’empooza ku muunhu, n’emisolo egindi egy’eighanga. 36Ghazira ku ebyo bye tubaghaire kiribatoolebwaku kabiri, byanda na byanda.
37“ ‘Kale bona nti okoopolola ekiragiro kino, okigheereze Yonathani, kitimbibwe ku Lusozi Olutukuvu aghantu ghe kisobola okubonebwa obukalamu.’ ”
Yonathani ayamba Demetirio Owokubiri
38Kyabazinga Demetirio bwe yabona ng’obufuzi butereire, ng’ensi erimu emiraala era nga tighakaaligho amulwanisa, yaabinga amagye ge goonagoona buli muntu yairayo ewaibwe. Okutoolaku abaisirukale be yapangisa okuva mu bizinga eby’abamaghanga agandi, ni bonka be yalekagho. Ekyo kyaleetera abaisirukale boonaboona abaagheerezanga bale be yasikira, okumukyagha. 39Agho ghaabaagho omuntu eyayetebwanga Tirufo, ng’eira yabanga mughagizi wa Alekisandero. Kale bwe yabona ng’amagye goonagoona gali kwemuluguunhia ku Demetirio, yaaja eri Omuwarabu eyayetebwanga Imalikue eyali nga n’omukuza wa Antioko, omwana wa Alekisandero omuto. 40Yaamalayo enaku kamaala ng’ali kupikiriza Imalikue amughe omwana oyo amufuule kyabazinga, aire mu kifo kya lata we. Yaamukobera byonabyona Demetirio bye yakola, yaataaku n’eky’amagye okuba nga gaamukyagha.
41Agho Yonathani yaagheereza kyabazinga Demetirio obukwenda, ng’amusaba atoole abaisirukale be mu kifo eky’okwewogomamu eky’omu Yerusalemu ni mu bifo ebindi eby’okwewogomamu eby’omu Buyudaaya kuba abaisirukale abo nga buli kiseera babisa bubi Abaisiraeli. 42Demetirio yaamwiramu ati: “Tiidha kukoma ku kukola ebyo by’onsabye byonka, aye bwe nnaafuna akaghagaanhia, n’iwe mwene ghalala n’eighanga lyo ndidha kubaleetera okuba ab’ebitiibwa einho. 43Aye mpegaano onaaba okoze bukalamu bw’onampeereza abaisirukale ni baanhambaku okulwana, kuba abaisirukale abange boonaboona bandheemyeku.”
44Kale Yonathani yaagheereza mu Antiokia abaisirukale enkumi isatu (3,000) abatendeke obukalamu. Bwe baatuuka, kyabazinga Demetirio yaasagamba, 45kuba ghaaligho abantu nga baghera emitwalo ikumi n’ebiri (120,000) abeesolokeza mu kibuga nga benda okumwita, 46aye yalumukira mu kisaagaati kya kyabazinga okwewonia. Olwo abantu beefuga enguudo dh’omu kibuga, baatoolera okwegugunga. 47Agho kyabazinga yaayeta abaisirukale Abayudaaya bamuyambe. Boonaboona beesolokeza gh’ali, olwo baalawuna ekibuga kyonakyona, baita abantu abaghera emitwalo eikumi (100,000). 48Baawonia obulamu bwa kyabazinga, baanhagulula ekibuga era baakikunaaniaku omuliro. 49Abantu bwe baabona ng’Abayudaaya beefuze ekibuga, nga bali kukola kyonakyona kye benda, bawaamu amaani era beegayirira kyabazinga nga bamweghemba bati: 50“Tughe emiraala, olekeze Abayudaaya okutulwanisa n’okuzikiriza ekibuga kyaife.” 51Baasuula ghansi eby’okulwanisa byaibwe, baasaba ghabeegho emiraala. Kyabazinga n’abantu ab’omu bwakyabazinga bwe boonaboona, baagha Abayudaaya ekitiisa kinene. Abayudaaya bairayo e Yerusalemu n’omunhago mungi inho.
52Kyabazinga Demetirio yaatereera era yaakakata ku kityamo kye eky’obwakyabazinga, n’ensi yaaba mu miraala nga n’ali kugifuga. 53Aye yaamala yaaloba kutuukiriza bye yasuubiza, yeekyusa ku Yonathani. Yaaloba kumusasula olw’ebirungi bye yamukolera, aye yaamutuntuza butuntuze.
Yonathani ayamba Antioko Owomukaaga
54Nga ghabiseeghooku ekiseera, Tirufo yaira n’omwisuka omutomuto Antioko, yaamutaagho okufuga era yaamuvaaza engule ey’obwakyabazinga. 55Olwo abaisirukale boonaboona Demetirio be yabinga, baidha okughagira kyabazinga omuto. Baalwanisa Demetirio, baamughangula, yaalumuka. 56Tirufo yaanhaga endhovu era yeefuga ekibuga Antiokia. 57Agho kyabazinga omuto Antioko yaaghandiikira Yonathani ati: “Ndi kukukakasa obe Omukulu wa Bakabona era omufuzi w’ebiketezo ebina. Era ndi kukugha n’okwetebwanga ‘Mukagwa wa Kyabazinga.’ ” 58Yaamugheereza ebintu eby’okuliiraku ebya zaabu, yaamugha n’obukumu okunhweranga mu bikopo ebya zaabu, n’okuvaalanga ebivaalo eby’ekikungu ebya langi ya nakasooma, n’okwesibanga olusibiro lwa zaabu. 59Ni Simoni muganda wa Yonathani yaamufuula omufuzi w’ekiketezo okuva ku nsalosalo ni Tiro okutuuka ku nsalosalo ni Misiri.
60Agho Yonathani n’eigye lye baasitula, baaja nga babitabita mu bibuga ebiri ere ng’osomoike omwiga Eufurate. N’amagye ag’e Siria goonagoona gaamweyimbaku okumuyamba. Bwe yatuuka mu kibuga Asikaloni, abantu baamu baamusangaalira era baamugha ekitiibwa kingi. 61Bwe yava eyo, yaaja e Gaza. Aye abantu baayo baamulobera okwingira mu kibuga, baamwigaliza kuliya. Kale Yonathani yaakizingiza, yaakikunaaniaku omuliro, yaanhagulula n’ebiketezo ebikyetooloire. 62Abantu b’omu Gaza beewolerezaayo ye Yonathani. Yonathani yaakola nabo endagaano ey’emiraala. Yaatwala batabane b’abafuzi baibwe ng’omusingo, yaabagheereza e Yerusalemu. Yaamala yaaja, yaatuuka e Damasiko.
63Agho Yonathani yaakiwuliraku ng’abakungu ba Demetirio baidhie n’eigye einene e Kadeshi mu Galilaaya, nga benda okumutoola ku bufuzi. 64Kale yaaleka muganda we Simoni mu kiketezo ekyo, mwene yaaja okubalwanisa. 65Simoni yaazingiza ekibuga Bethizuri, yaamala enaku kamaala ng’ali kukirwanisa. Yaaleetera abantu baamu okutya einho. 66Baamusaba aleetegho emiraala, yeena yaakola nga bwe baasaba. Yeefuga ekibuga ekyo, yaakibingamu abantu, era yaakitaamu enkambi y’abaisirukale.
67Yonathani n’eigye lye baasimba weema dhaibwe kumpi n’enhandha Gennesareti. Ku nkyo einho ku lunaku olwairirira, baaja baatuuka mu kiketezo eky’oku museetwe e Hazori. 68Nga bali eyo, eigye ery’abantu abava ndha lyaidha okubalwanisa, aye nga beene tibaidhi nti eigye eryo lireseeyooku abaisirukale abandi ababwamye mu nsozi okubazinduukiriza. 69Abaisirukale abo abaali babwamye bwe baavaayo okulumba, 70eigye lya Yonathani lyonalyona lyalumuka. Ghaaloba kusigalagho muntu yeenayeena okutoolaku abaduumizi bonka, Mattathia mutabane wa Abusalomu ni Yuda mutabane wa Kalifi. 71Yonathani yaawulira mule ng’aswaziibwa, kale yaakanulamu ebivaalo bye era yeeyugha enkungu mu mutwe olw’okunakughala, yaasaba Katonda. 72Yaamala yairayo mu lutalo okulwanisa abazigu, era yaabaghangula baalumuka. 73Abaisirukale be abaali balumwike bwe baabona batyo, baira y’ali baamubeeraku okubingirira abazigu abo. Baabatuukiza irala mu kifo abazigu abo ghe baasimba weema dhaibwe e Kadeshi, era n’ekifo ekyo kyene baakighamba. 74Ku lunaku olwo eigye ery’abazigu lyafaamu abaisirukale ng’enkumi isatu (3,000). Agho Yonathani yairayo e Yerusalemu.