EKITABO KYA
BAKYABAZINGA
EKISOOKA
Enhandhula
Ekitabo kya Bakyabazinga Ekisooka, kyongera okulomboodha ebyafaayo eby’obwakyabazinga bwa Isiraeli. Ebyafaayo eby’obwakyabazinga bwa Isiraeli ebyo, bisooka okwogerwaku mu bitabo byombi ebya Samueli.
Ekitabo kino kisoboka okwawulwamu ebitundu bisatu: (1) Solomoni okusikira lata we Daudi ku bwakyabazinga, n’okufa kwa lata we oyo Daudi. (2) Obufuzi bwa Solomoni era n’ebyo bye yakola. Ekisinga mu bye yakola, n’okuzimba eisinzizo mu Yerusalemu. (3) Okwawulamu ensi Isiraeli mu bwakyabazinga obw’emikuzi ebiri: obw’oku luuyi olw’omukono omugooda olw’e buvandhuba obwayetebwa Isiraeli, n’obw’oku luuyi olw’omukono omusaadha olw’e buvandhuba obwayetebwa Buyudaaya. Era n’ebintu ebyogerwa ku bakyabazinga abaafuga okutuuka agho mu myaka egyolunaana (800) nga Kurisito akaali kwidha.
Mu bitabo byombi ebya Bakyabazinga, nga buli mufuzi bamutwala okuba nga mulungi oba mubi nga bajiira ku nsambo ye yabangamu omwesigwa eri Katonda. N’eighanga lyona nga balitwala okuba nga liri bukalamu oba bubi, nga bajiira ku bwesigwa n’obulala obwo eri Katonda. Ate ku luuyi olundi, nga bakitwala nti okusinza ebitali Katonda n’okumudheemera, n’ebivaaku akabi. Bakyabazinga boonaboona ab’omu bwakyabazinga bwa Isiraeli beebisanga bubi, aye ab’omu bwakyabazinga bwa Buyudaaya baali ba ntabo, nga mulimu abalungi n’ababi.
Mu Kitabo kya Bakyabazinga ekisooka, abantu abamanhifu einho n’abalanzi ba Musengwa Katonda, abaakoberanga abantu obukwenda obuva ye Katonda oyo nga baziramu ntete naire, baalabulanga abantu balobenga kusinza bitali Katonda na kudheemera Katonda oyo. Asinga okumanhika mu balanzi abo ni Eliya eyatakana n’abalanzi ab’omusambwa Baali n’abasinga, era n’abaita boonaboona (Bona Enkenga 18).
Ebirimu nga bwe biiraganwaku
Ekiseera ekyasembayo mu bufuzi bwa kyabazinga Daudi 1:1—2:12
Solomoni afuuka kyabazinga 2:13-46
Obufuzi bwa Solomoni 3:1—11:43
a. Emyaka egyasooka 3:1—4:34
b. Okuzimba eisinzizo 5:1—8:66
c. Emyaka egyasembayo 9:1—11:43
Obwakyabazinga bwawulwamu 12:1—22:53
a. Ebika eby’oku luuyi olw’omukono omugooda olw’e buvandhuba bidheema 12:1—14:20
b. Bakyabazinga ab’omu Buyudaaya n’ab’omu Isiraeli 14:21—16:34
c. Omulanzi Eliya 17:1—19:21
d. Kyabazinga Ahabu owa Isiraeli 20:1—22:40
e. Kyabazinga Yehoshafati owa Buyudaaya ni Kyabazinga Ahazia owa Isiraeli 22:41-53