3
1Mubone Lata nga bwe yatugonza, ife okwetebwa abaana ba Katonda! Ate nga era kye tuli. Ensi kyeva n’etatumanha lwa kuba yeena tiyamumanha.3:1: Yoa 1:12 2Bakagwa, mperaano tuli baana ba Katonda. Kye tuja okuba kikaali kumanhika, aye kye twidhi ni kino nti Kurisito bw’aliboneka tuliba oti ni mwene, kuba tulimubona nga bw’ali. 3Oyo yeenayeena ali n’okusuubira kuno mu Kurisito yeetukuza oti ni Kurisito mwene bw’ali omutukuvu. 4Yeenayeena akola ekibi amenha amateeka, kuba ekibi n’obumenhi obw’amateeka. 5Mwidhi nga Kurisito yaidha okutoolagho ebibi era mu oyo muzira kibi.3:5: Yoa 1:29 6Yeenayeena aba mu Kurisito, takola kibi aye yeenayeena akola ekibi, aba nga tamubonangaku oba tamumanhanga. 7Baana bange, ghatabaagho abasubaghanga. Akola eby’obutuufu aba mutuufu oti ni Kurisito mwene bw’ali omutuufu. 8Oyo akola ekibi, aba wa Sitaani kuba Sitaani mukozi wa bibi okuviira irala ku kwinhama. Kyova Omwana wa Katonda yaidha okuzikiriza ebikolwa bya Sitaani. 9Kiisi Mwana wa Katonda, takola kibi kuba aba alimu omusaayi gwa Katonda, era taghanga kukola kibi kuba azaalibwa Katonda. 10Ku kino kw’omanhira abaana ba Katonda n’aba Sitaani. Kiisi atakola bya butuufu oba n’atagonza muganda we oyo aba ti wa Katonda.
Mugonzanienga
11Kino kye mwawulira okuviira irala ku kwinhama nti tuli n’okugonzania.3:11: Yoa 13:34 12Tulobe kuba oti ni Kaini eyali owa Sitaani n’atemula muganda we. Ye lwaki yamutemula? Lwa kuba mwene bye yakolanga byalinga bibi ate nga ebya muganda we byali bituufu.3:12: Mainh 4:8
13Baganda bange mutakyewuunhianga ensi bw’ebakyaghanga. 14Twidhi nga twava mu kufa twangira mu bulamu, kuba tugonza baganda baife. Oyo atagonza baganda be aba akaali mu kufa.3:14: Yoa 5:24 15Kiisi akyagha muganda we aba mutemo, ate mwidhi nga mu mutemo timuba bulamu butawaagho. 16Ku kino kwe tumanhira okugonza. Nga Kurisito bwe yaghaayo obulamu bwe ku lwaife, twena tugwaine okughaayo obulamu bwaife ku lwa baganda baife. 17Omuntu yeenayeena ali n’ebirungi eby’omu nsi muno n’abona muganda we ng’ali mu bwetaavu aye n’atamulumirwa naire, okugonza kwa Katonda kusobola kutya okuba mu muntu oyo? 18Baana bange, okugonza kwaife kulobe kuba bwa mu bibono na mu kwogera aye kube ni mu bye tukola era nga kwa mazima.
Okutereera mu maiso ga Katonda
19Okwo kwe tumanhira nga tuli ba mazima, era emyoyo gyaife gitutereera mu maiso ga Katonda. 20Buli emyoyo gyaife lwe gitulumiriza, tumanha nga Katonda n’asinga emyoyo gyaife era ng’aidhi buli kintu.
21Bakagwa, emyoyo gyaife bwe gitatulumiriza, olwo tuba bagumu mu maiso ga Katonda. 22Era kiisi kye tumusaba tukifuna, kuba tugema ebiragiro bye era bye tukola bimusangaaza. 23Ekiragiro kye ni kino: Okwikiriza Eriina ly’Omwana we Yesu Kurisito era n’okugonzania nga bwe yatulagira.3:23: Yoa 13:34; 15:12, 17 24Oyo yeenayeena agema ebiragiro bya Katonda aba mu Katonda ni Katonda yaamubaamu. Kye tumanhiraku ng’ali mu ife, ni Mwoyo ye yatugha.