EMBALUWA ESOOKA PAULO YE YAGHANDIIKIRA
AB’E KORINTHO
Enhandhula
Embaluwa Esooka Paulo ye yaghandiikira ab’e Korintho efa ku buzibu obwagaanibwa mu bulamu obw’Ekikurisito ni mu ndhikiriza ey’Ekikurisito, obwali nga busitwikegho mu Kikunsu eky’Abaikiriza mu Kurisito, Paulo kye yataagho mu Korintho. Mu kiseera ekyo Korintho kyali kibuga eky’Abagureki ekikologho era ekyalingamu abantu abaavanga mu biketezo byonabyona eby’ensi. Era n’ekyali ekibuga ekikulu omwatyamanga omufuzi omukulu Omuroma eyafuganga eisaza ly’e Roma eryayetebwanga Akaya. Kyali kimanhiibwa olw’eby’obusuubuzi byakyo ebyali bikula embiro, n’okwemanha okw’abantu baakyo, n’obwenzi obwali bubunie kumpi buli ghantu, n’ensinza edh’ensambo kamaala.
Ebintu ebikulu omutume bye yasinga okutaaku amaani ni bino: Ekikunsu eky’Abaikiriza mu Kurisito okuba nga kyekutulakutulamu, obwenzi, obufumbo n’ebikolwa by’omu bufumbo, ensonga edhigema ku muntu nga bw’awulira mule mu mwoyo gwe, entegeka y’Ekikunsu ky’Abaikiriza mu Kurisito, ebirabo ebya Mwoyo Mutukuvu era n’okuzuukira. Omutume oyo ayoleka ensambo Amawulire Amalungi ye googera ku bintu ebyo ghaigulu, ng’akozesa obumanhi bungi.
Enkenga eyeikumi n’eisatu omuli okugonza kw’ayogeraku ati n’ekitone ekisinga byonabyona obulungi mu bitone Katonda by’agha abantu be, yandiba nga n’esinga dhoonadhoona edhiri mu kitabo kino okumanhibwa.
Ebirimu nga bwe biiraganwaku
Enhandhula 1:1-9
Obukunsukunsu obuli mu Kikunsu eky’Abaikiriza mu Kurisito 1:10—4:21
Eneebisa enkalamu ghagati gh’abasaadha n’abakazi era n’obulamu obw’amaka 5:1—7:40
Abakurisito n’abatali bakuristo 8:1—11:1
Ensinza n’obulamu obwa abo abali mu Kikunsu eky’Abaikiriza mu Kurisito 11:2—14:40
Okuzuukira kwa Kurisito n’okw’abo abamwikiriza 15:1-58
Ebyagheebwa Abakurisito ab’omu Buyudaaya 16:1-4
Ebya Paulo ku bubwe, n’eby’okufundikira embaluwa eno 16:5-24