Swahili Bible2

EKITABO KYA MUSA EKYOKUNA EKYETEBWA

OKUBALA

Enhandhula

Ekitabo ky’Okubala kyogera ku ebyo ebyatuuka ku Baisiraeli, mu ntangama ey’emyaka kumpi amakumi ana, okuva lwe baava ku lusozi Sinai, okutuusa lwe baatuuka ku nsalosalo ey’e buvandhuba, ey’ensi Katonda ye yabasuubiza okubagha.

Eriina ery’Ekitabo kino, lyoleka ekirala ku ebyo ebikulu ebyogerwaku, era ekyo nga n’eky’okubala abantu. Musa yabala Abaisiraeli nga bakaali kusitula kuva mu biketezo bya lusozi Sinai. Kabiri yairamu okubabala mu Moabu, e buvandhuba w’omwiga Yorudani, nga ghabiseegho emyaka ng’amakumi ana.

Mu kiseera ekyaligho ghagati gh’okubala abantu okw’emikuzi egyo ebiri, Abaisiraeli baaja e Kadeshi Barinea ku nsalosalo y’e Kanaani ey’oku luuyi olw’omukono omusaadha olw’e buvandhuba, aye baaloba kusobola kuviira eyo, kwingira mu nsi Katonda ye yaasuubiza.

Nga bamaze emyaka kamaala mu kiketezo ekyo, Abaisiraeli abo baaja mu kiketezo eky’e buvandhuba w’omwiga Yorudani. Olwo abandi ku bo baasenga eyo, ate abandi baategeka okusomoka Yorudani, okwingira mu Kanaani.

Ekitabo ky’Okubala kyogera ku bantu emikuzi kamaala abaatyanga era ni bawangamu amaani nga ghaligho obuzibu. Abantu abo baadheemeranga Katonda era baadheemeranga ni Musa, Katonda oyo ye yataagho okubakulembera. Ekitabo kino era kyogera ku Katonda omwesigwa, alabirira abantu be olubeerera, nga tafiireeyo ku bunafu bwaibwe waire ku budheemu bwaibwe. Era kyogera ku bunhiinkiivu ate n’olundi ku butali buguminkiriza, Musa bweyali nabwo mu kugheereza Katonda era n’abantu be.

Ebirimu nga bwe biiraganwaku

Abaisiraeli beetegeka okuva ku lusozi Sinai 1:1—9:23

a. Okubala Abaisiraeli okwasooka 1:1—4:49

b. Amateeka n’ebiragiro ebya buli nsambo 5:1—8:26

c. Ekibinuko eky’Okubitizibwa eky’omukuzi ogwokubiri 9:1-23

Okuva ku lusozi Sinai okutuuka e Moabu 10:1—21:35

Ebyaligho mu Moabu 22:1—32:42

Olugendo okuva e Misiri okutuuka e Moabu 33:1-49

Musa bye yasikirira Abaisiraeli nga bakaali kusomoka Yorudani 33:50—36:13