Swahili Bible2

19

Obuvunaanizibwa bw’omuntu eri Katonda n’eri muntu mwine

1Musengwa yaalagira Musa 2akobere ekikunsu kyonakyona eky’Abaisiraeli ati: “Mubenga batukuvu, kuba nze Musengwa Katonda waimwe ndi omutukuvu.19:2: Lev 11:44-45; 1 Pet 1:16 3Kiisi muntu ku imwe ate nga mu ise n’inhina ekitiisa, era akuzenga olunaku olwa Sabbato nga bwe nalagira. Ninze Musengwa Katonda waimwe.19:3: Kuv 20:8, 12; Ma 5:12, 16

4“Mutanvangaku ni musinza bitali Katonda, era muteekoleranga misambwa mu byuma bisaanuusiibwa ni mugisinza. Ninze Musengwa Katonda waimwe.19:4: Lev 26:1; Kuv 20:23; 34:17; Ma 27:15

5“Bwe munaaghangayo, eri nze Musengwa Katonda, omusengo ogugheebwayo olw’okutabagana, munaagughangayo mu nsambo egwaine nga bwe nabalagira, memale olwo ngusiime. 6Emamba ey’ekigheebwayo ekyo enaalibwanga ku lunaku olwo ensolo lw’eitibwa, ni ku lunaku olunaiririranga. Era emamba enaasigalangagho n’etuuka ku lunaku olwokusatu enaayokebwanga bwokebwe, 7kuba olwo enaabanga ng’efuuse etali nongoofu. Era bw’enaalibwanga ku lunaku olwo olwokusatu, tiiganhenga kusiima musengo ogwo. 8Kiisi anaagiryangaku anaabonerezebwanga olw’obutagha kintu kya Musengwa Katonda ekitukuvu ekitiibwa kyakyo, era omuntu oyo anaabanga nga takaabalirwa mu bantu bange.

9“Bwe munaabanga mukungula ebirime byaimwe, mutamalirangayo irala ebisembayo ku mbibi dh’enimiro dhaimwe, oba okwirayo einhuma okulonderera ebyo ebiba bisigaireyo.19:9-10: Lev 23:22; Ma 24:19-22 10Era mutairangayo inhuma mu masamba gaimwe ag’emizabbibu okusoloza egyo egyerabiirwa okusala oba okulonderera egiba gikunkumwike. Ebyo byonabyona mubirekeranga abaavu n’abasenze. Ninze Musengwa Katonda waimwe.

11“Mutaibanga, mutakupankupanianga, era mutaguyaguyanga.19:11: Kuv 20:15, 16; Ma 5:19, 20 12Mutalayiriranga bwereere liina lyange eitukuvu ni mulyonoona. Ninze Musengwa Katonda waimwe.19:12: Kuv 20:7; Ma 5:11; Mat 5:33

13“Mutanhigirizanga muntu yeenayeena, oba okumunhagaku ekikye. Empeera ey’omukozi gw’okozesa oteekwa okugimugheerangagho ku lunaku lwene olwo lw’amaze omulimo.19:13: Ma 24:14-15 14Mutakolimiranga musigha, era mutateeranga mutulu kitimuguunha mu ngira ni yeekontolaku. Aye mutyenga nze Musengwa Katonda waimwe.19:14: Ma 27:18

15“Musalenga emisango mu butuufu. Muteekubiranga ku luuyi lwa mwavu, era mutatiisanga mukombe maiso.19:15: Kuv 23:6-8; Ma 16:19 16Otasansaanianga ngambo mu bantu bo, era oteesimbangagho kulumiriza muntu yeenayeena mu musango ogusobola okumuviiramu okwitibwa. Ninze Musengwa Katonda.

17“Otakyaghanga muntu yeenayeena n’omwegemerera, aye omunenianga byaweera agho, olobe kugwa mu kibi olw’oyo.19:17: Mat 18:15 18Oteesasuulizanga ku muntu yeenayeena, oba okumukyagha n’omwegemerera. Aye ogonzanga muntu mwino ng’oti ni bwe weegonza mwene. Ninze Musengwa Katonda.19:18: Mat 5:43; 19:19; 22:39; Mar 12:31; Luk 10:27; Rom 13:9; Gal 5:14; Yak 2:8

19“Mugemenga ebiragiro byange. Otaganhanga nsolo dho kuzaalagana na dha kika kindi. Otasiganga mu nimiro yo nsigo dha bika bibiri. Otavaalanga kivaalo kya ngoye dha bika bibiri ebirukiirwa aghalala.19:19: Ma 22:9-11

20“Omusaadha yeenayeena bw’anaabanga n’omwiru omukazi mu buliri, eyamala okwandhula omusaadha owundi, aye ng’omusaadha eyayandhulwa akaali kusasula bintu, era ng’omwiru akaali kugheebwa idembe, omusaadha abaire n’omwiru omukazi oyo anaabonerezebwanga ghalala n’omwiru omukazi oyo. Aye tibaitibwenga, kuba omwiru omukazi aba akaali kugheebwa idembe. 21Omusaadha oyo aidha kuleetanga ku mulyango gwa Weema ey’Okundhagaanirangamu, entaama enume nga n’ekigheebwayo ng’omutango. 22Kabona aidha kukozesanga ekigheebwayo ekyo, okukola omukolo ogw’okutukuza omusaadha oyo mu maiso gange, olw’ekibi kye yakola, era ndidha kumusonighanga.

23“Bwe mulituuka mu nsi Kanaani ni musimba emiti egy’ebibala egya buli nsambo, ebibala byagyo tibiibenga birongoofu okumala emyaka esatu. Era mutabiryangaku okumala emyaka esatu egyo. 24Mu mwaka ogwokuna, ebibala byonabyona bija kumpeebwa, ng’ekigheebwayo ekitukuvu olw’okuneebaza. 25Aye mu mwaka ogwokutaanu, muliba ba idembe okulya ku bibala byagyo. Ebyo byonabyona bwe mulibituukiriza, emiti gyaimwe giribala inho. Ninze Musengwa Katonda waimwe.

26“Mutalyanga mamba ng’ekaalimu omusaayi. Mutakolanga bya bulogo oba eby’okulagulwa.19:26: Mainh 9:4; Lev 7:26-27; 17:10-14; Ma 12:16, 23; 15:23; 18:10 27Mutakendeezanga ku nviiri dhaimwe edh’omu mbali, oba okukendeeza ku birevu byaimwe.19:27-28: Lev 2:5; Ma 14:1 28Muteesalasalanga ku mibiri gyaimwe ng’akamanhiso ak’okulira abafu, oba okwetonaku endhola olw’okwewoomya. Ninze Musengwa Katonda.

29“Mutayonoonanga baghala baimwe nga mubaghaayo okukozesebwa nga bamalaaya ab’omu masabo, kuba ensi eidha kwidhula empisa embi.19:29: Ma 23:17 30Mukuzenga olunaku lwa Sabbato, era mutenga ekitiisa mu kifo kyange Ekitukuvu. Ninze Musengwa Katonda.19:30: Lev 26:2

31“Mutajanga kwebuuza ku basamize, oba ku balogo. Mutabaagalanga ye bali, kuba baidha kubafuula abatali balongoofu. Ninze Musengwa Katonda waimwe.19:31: Ma 18:11; 1 Sam 28:3; 2 Bakyab 23:4; Isa 8:19

32“Mutenga ekinhagansi mu bantu abakairiighe, era mubaisengamu ekitiisa. Era muntyenga nze Musengwa Katonda waimwe.

33“Mutabisanga bubi basenze abaasenga mu nsi yaimwe.19:33-34: Kuv 22:21; Ma 24:17-18; 27:19 34Mubabisenga ng’oti Baisiraeli banaimwe abazaale baamu, era mubagonzenga ng’oti ni bwe mwegonza beene, kuba mwena mwali basenze mu nsi Misiri. Ninze Musengwa Katonda waimwe.

35“Mutakupankupanianga muntu yeenayeena nga mukozesa ebipimo ebitali bituufu mu kupima obuleeyi, oba obuzito, oba obungi obw’ebintu.19:35-36: Ma 25:13-16; Nsa 20:10; Ezek 45:10 36Mukozesenga minzaani entuufu nga n’ebipimo byonabyona bituufu. Ninze Musengwa Katonda waimwe, eyabatoola mu nsi Misiri. 37Mugemenga amateeka gange n’ebiragiro byange, era mubigonderenga. Ninze Musengwa Katonda.”