Swahili Bible2

5

Musa ni Aaroni nga bali mu maiso ga kyabazinga ow’e Misiri

1Ebyo nga biwoire, Musa ni Aaroni baaja ye kyabazinga ow’e Misiri baamukoba bati: “Musengwa Katonda, Katonda wa Isiraeli akoba ati, leka abantu be baje mu irungu bakolere eyo ekibinuko eky’okumusinza.” 2Aye kyabazinga yaabakoba ati: “Musengwa Katonda naani, ye ndi n’okuwulira era ni ndeka Abaisiraeli okuja? Nze tiidhi Musengwa Katonda oyo, era tiidha kuleka Baisiraeli kuva ghano.” 3Baamukobera bati: “Katonda ow’Abaheburayi yatweyolekera era buti tuli kukusaba otuleke tuje mu irungu nga tutambula olugendo olumala enaku eisatu, tugheereyo eyo omusengo eri Musengwa Katonda waife oyo; kuba bwe tutakola tutyo asobola okutusindikira obulwaire obubi, oba okutusindikira olutalo baatwita baatumalagho.” 4Aye kyabazinga yaakoba Musa ni Aaroni ati: “Lwaki muli kwenda okutoola abantu ku mirimo gyaibwe? Muje mukole gye muteekwa okukola.” 5Era kyabazinga yaakoba ati: “Mubona abantu abagheze obwaga agho mu nsi, nga kabiri mwenda kubawuumuza baleke agho emirimo gye bateekwa okukola!” 6Ku lunaku lwene olwo kyabazinga yaalagira Abamisiri abaasalanga amakatala, n’Abaisiraeli abaakakanga banaibwe emirimo 7yaabakoba ati: “Okuva n’olwaleero mulekere agho okufuniranga abantu eisubi ery’okukozesanga amatoofaali nga bwemubaire nga mukola. Mubasindike baje balyesololeze beene. 8Aye ate mutakendeeza ku mughendo gwa matoofaali ge bali n’okuwumba buli lunaku. Kuba bakongoze tibenda kukola, kyebava ni baba agho nga bansiniriza bati, ‘Tuleke tuje tugheeyo omusengo eri Katonda waife.’ 9Abantu abo mubongere emirimo emikalangufu babe nga bakola inho, babule ekiseera eky’okuwulirisa eby’obuguya.”

10Kale Abamisiri abaasalanga amakatala, n’Abaisiraeli abaakakanga banaibwe emirimo, baaja baakobera abantu bati: “Kyabazinga akobye ati takaabafunira isubi. 11Muje beene, mufune eisubi lyaimwe woonawoona ghe musobola okulifuna. Ate omughendo ogw’amatoofaali ge muli n’okuwumba buli lunaku tigukendeireeku naire.” 12Kale abantu baasaatuukira mu biketezo byonabyona ebya Misiri nga baagala eisubi. 13Abamisiri abaasalanga amakatala, nga babadeeba buli kaseera bati: “Mumaleyo omughendo ogw’amatoofaali aga buli lunaku agaabasalirwa, nga bwe mwakolanga nga babafunira eisubi.” 14Era baagwa ku Baisiraeli be baataagho okukaka banaibwe emirimo baabakuba nga bababuuza bati: “Lwaki omughendo ogw’amatoofaali ge muli n’okuwumba buli lunaku tiguwoireeyo olwaleero?”

15Agho Abaisiraeli abaakakanga banaibwe emirimo baaja, baalirira kyabazinga bati: “Isebantu kyabazinga, lwaki obisa otyo abairu bo? 16Tibakaatugha isubi, aye ate baatukaka okukuba amatoofaali. Era bona eno, abairu bo tukubwa inho ate nga omusango guli ku bantu bo beene.” 17Aye yaabairamu ati: “Muli bakongoze timwenda kukola. Era kye muva ni munsiniriza muti, ‘Tuleke tuje tugheeyo omusengo eri Musengwa Katonda waife.’ 18Muje mukole! Ghazira isubi lija kubagheebwa. Ate muteekwa okuwumba amatoofaali mu bungi obwabuliidho ng’eira.” 19Abaisiraeli abaakakanga banaibwe emirimo baabona nga batuuse ku budaaga okukobwa bati, “Mu buli ngeri timukendeeza ku bungi bwa matoofaali ge mubairenga nga muwumba buli lunaku okuva einhuma ere.”

20Bwe baali bava ye kyabazinga baayagaana Musa ni Aaroni abaali agho nga babateegereire, 21baabakoba bati: “Musengwa Katonda aboine kye mukoze, era aidha kubasalira omusango gubasinge! Kuba mutuleeteire okukyayibwa kyabazinga n’abakungu be, era mwabaleetera okuba n’ensonga ye banaavangaku okutwita.”

22Agho Musa yaira ye Musengwa Katonda yaasaba ati: “Wo Musengwa Katonda, lwaki oleese obuzibu ku bantu bano? Lwaki wantuma nze. 23Kuba kasookanga ndidha kwogera ni kyabazinga mu liina lyo, kyabazinga oyo atuusiiza ku bantu bano obuzibu kamaala, aye iwe waaloba kubatoola mu buzibu obwo.”