45
Yusufu erumbula isi babaandaaye
145.1: Bur 7.13Lwanyuma lwa bino byoosi, Yusufu waalekha khunyalisa khukhwiikumisa luundi ta, kila alakila babaakaanisi beewe boosi khuurura ibulafu. Baryo boosi nga baarurire ibulafu, Yusufu weruumbula isi babaandaaye. 2Lwanyuma waalila kamasika luukali lulweene, shaakila ba Misiri baawulila, baatsya baashimanyisakho ni mu lubili lwa Faraawo. 3Yusufu waaboolela babaandaaye ari, “Ise Yusufu! Manya paapa wase ashiiliyo mulamu?” Ne baalebe bano ni baashiwulila baryo, buuri bwaabawaamba naabi, baalekha khunyalisa ni khuukanikha khuumwiilamo ta.
4Kila Yusufu alaanga babaandaaye ari besyeende aambi ni naye. Baryo nga baamalile khukhwisyeenda aambi, waabalomela ari, “Iseese niye waandaayeenywe Yusufu isi mwakulisa mu Misiri. 5Ari kumutaambo kukhabawaamba ta, namwe mwaarakikha khukhwiyikiitsa lwe khukhuungulisa ise ino ta. Iyo yaba ikhola ya Wele umweene, uwandumana ise khukhwiitsa ino, nio inyale khuuwonesa buulamu bwe babaandu. 6Ari kuno nikwo kumwiiko kwe khaabili, nga intsala ilya mu shibala, ne ishiramayo kimiiko kikiindi kiraano, nga mbaawo khuulima namwe khuukyesa ta. 7Ilala Wele aandumana ise iburaangisi weenywe, nio inyalise khuubayeeta muramewo nga baalamu mu shibala, ni khuubawonesa musaambo iya buraawa iyiyaangisa iri. 8Nashiryo sishili bari inywe mumwandumana ino ta, ne Wele umweene. Waayintsikyelisa ise khuuba umuundu wa Faraawo ufuura buukhulu mu shibala shino. Ise ari niye umukhulu mu shibala shino shoosi, ise ndi umuwuli mu Misiri muno!”
945.9: Bur 7.14Yusufu waalooselakho ari, “Nashiryo ari yuubakho mwiileyo, mutsye muboolele paapa wase muri, ‘Umwaana woowo Yusufu ashiiliwo mulamu. Wele waamukhola niye khuuba umuwuli wa Misiri, nashiryo yiitsa khaangu mu Misiri, ukhakyelewa ta. 10Ukhaamenyatsake mu shisiintsa she Gosheni, ubatsake aambi ni nase, iwe atweela ni babaana boowo, ni babetsukhulu boowo, ni kamasheese koowo, ni tsimbusi tsoowo, ni tsikhaafu tsoowo, na buli shiindu shoosi sheesi uli nasho. 11Nga uli mu Gosheni iyo, ise samweene intsya khukhulolelela, lwekhuuba ishiiliyo kimiiko kikiindi kiraano kye ntsala. Ise singana iwe, ni be muungo mwoowo, na buli shiindu shoowo shoosi khuufwa intsala ta.’ ”
12Yusufu weloosela ari, “Inywe mweesi, atweela ni waandaayase Benyamini, mwaamboone nga ise Yusufu samweene, niye uuli khuukanikha isi muli. 13Mwaakha khuutsya muboolele paapa bye shiriifwa shase sheesi indimo, ni bibiindu byoosi byeesi muboone. Lwanyuma muyuubekho khaangu mumureere ino.”
14Yusufu waakwa waandaaye Benyamini mu shifuba, waarakikha khuulila kamasika, ni Benyamini naye waalila. 15Yusufu n’aba nga ashiilila kamasika aryo, waakwa babaandaaye babaaramile buli mutweela mu shifuba. Lwanyuma lwa shino baarakikha khuukanikha isi ali.
16Kamakhuuwa ke bibiindu bino ni byawulilikha mu lubili lwa Faraawo, biri babaandaaye ba Yusufu beetsile, Faraawo ni baakhulu beewe boosi basangaala naabi. 17Kila Faraawo alomela Yusufu ari, “Lomela babaandaayo bapakhile bibiindu byaabwe khu sikilya tsaabwe, beeleyo mu shibala sha Kanaani. 18Khayo batsye bareere paapa woowo, atweela ni be tsiingo tsaabwe, beetse ino. Nase kane imbawe shiifwo shishifuura buulayi mu Misiri mwoosi, nabo kane balye biilayi byamwo byoosi. 19Naluundi ikhulakila ndi, babaandaayo batsye ni bikaari khukhwaama mu Misiri, bye khuutsya khusutilamwo babaana baabwe atweela ni baakyelama baabwe, batsye beetse ni paapa waabwe naye. 20Baboolele bakhatsya nga beyembeleele lwe bibiindu byaabwe byeesi kane balekhe ano mu Misiri ta, lwekhuuba shiifwo shishifuura buukhulu mu Misiri shili shishaabwe.”
21Baryo basooleli ba Isiraeli baakhola nga ni baabalomela khuukhola. Yusufu waabawa bikaari, musaambo isi Faraawo umweene aamulakila khuukhola, waabawa ni biilyo bibibamala bye lukyeendo. 22Yusufu waawa buli mutweela khu nibo ingubo ishaakha ndweela, ne Benyamini niye waamuwa bisiintsa bye feetsa bitoondo bitaru (300), ni tsingubo tsiraano. 23Ne isi paapa weewe, aamwakaanisa tsisikilya likhumi nga tsaasutile bibiindu bye mu Misiri bibifuura buulayi, tsisikilya tsitsiindi likhumi nga tsaasutile biilyo bibulungule, ni kimikaati, atweela ni biilyo bibiindi bye lukyeendo nga bakobola. 24Kila Yusufu asiibula babaandaaye khuutsya, ne ni baaba nga benyukha baatsya, waabalooselakho ari, “Mukhalomanila khu ntsila ta.”
25Baryo baalebe bano benyukha baarura i Misiri, baatsya isi paapa waabwe Yakobo mu Kanaani. 26Nga boolile baamuboolela bari, “Yusufu aliyo mulamu! Ari isi khulomela ano, niye umuwuli we shibala she Misiri shoosi.” Yakobo weesindukha naabi lwe kamakhuuwa kano, waalekha khushifukiilisa sheesi baamuboolela ta.
27Ne ni beloosela khuumuboolela biilomo byoosi byeesi Yusufu aababoolela nibo, indi lwanyuma waabona ni kamakaali khukhwaama mu Misiri keesi Yusufu aamwakaanisa khuumusuta, kamaani kaamukobolamwo, wewulila buulayi. 28Kila Isiraeli aloma ari, “Isho shaamalile, ise ari naamanyile ndi umusooleli wase Yusufu aliyo mulamu! Naakha khuutsya imubone, nga ishiili khufwa ta.”