44
Shikopo shishareebwa mu wootswa
1Lwanyumakho Yusufu waalakila umwakaanisi weewe ari, “Yitsusaka tsiwootswa tse babaandu bano ni biilyo, basute nga ni banyala, naluundi wisakemo ni tsinusu tsaabwe mu wootswa tseene. 2Lwanyuma ure shikopo shase mu wootswa iy’omukyeekhe mweene, wisemo tsinusu tseene abe tse khuukula biilyo.” Umwakaanisi waakhola isho sheesi aamulomela khuukhola.
3Antsye ni bwabuluukha kumutikhinyi, baasibula baalebe bano khuutsya atweela ni tsisikilya tsaabwe. 4Baryo ni baaba nga baakyeendilekho lukyeendo luumbi luri khukhwaama mu shiriimba, Yusufu waarumana umwakaanisi we muungo mweewe, nga amulomela ari, “Yuubakho uloonde khu baandu abo khaangu. Nga waabanyoolile, ubareebe uri, ‘Lwashiina mukholile shishiindu shiibi nga isho, ate nga ifwe khwabakholeele biilayi byonyene? Lwashiina mwiibile shikopo sheewe sheesi anyweelamwo? 5Shikopo shino nimwo mweesi niye anyweelatsakila, naluundi nisho sheesi araambisatsaka khuukanikha bibiitsya khuubawo iburaangisi. Ilala mwaakholile shishiindu shiibi naabi.’ ”
6Aryo umwakaanisi uyo n’abaloondakho waabanyoola, waababoolela biilomo bino byeesi Yusufu aabalomela bibyeene. 7Kila nabo bamwiilamwo bari, “Musakhulu, lwashiina uli khuuloma biilomo bibifwaana biri? Ifwe babaakaanisi boowo, abe sikhunyala khwaakhola shishiindu shishifwaana shiri ta! 8N’ushebulile uri, ifwe khwakobosa khukhwaama i Kanaani tsinusu tseesi khwanyoola mu wootswa tseefwe makiboole. Ari abe khunyalisa khuryeena khukhwiiba i feetsa namwe i zaabu khukhwaama mu ntsu y’omukoosi woowo? 9Nashiryo musakhulu, siinga ibawo mutweela khusiifwe unyoolikhana nga ali ni shikopo isho, umukhoonyelawo, ni nafwe babaaramile khwikyela baakulwa boowo.”
10Kila naye abeelamwo ari, “Isho shiilayi, ne uyo isi inyoola ni nasho kane abe umukulwa wase, ni nanywe babaaramile kane mube balekhuule khuutsya.” 11Baryo boosi baayubakilisa khuuruuraka tsiwootswa tsaabwe aasi, buli mutweela waakaangulula iyeewe. 12Lwanyuma umwakaanisi uyo waatsya nga emenieelesa mbola mbola buli iwootswa, khukhwaamila khu y’omukhulu umweene, khuutsya khukhwoolela ilala khu y’omukyeekhe. Ni oola khu wootswa iya Benyamini, waanyoolamwo shikopo. 13Shino shaakila baalebe bano boonuulaka bikwaaro byaabwe lwe kumutaambo kumukali. Baakhalawo baabowaka tsiwootswa tsaabwe khu sikilya, baashuukha beelayo mu shiriimba.
14Yuda ni babaandaaye ni boolayo mu shiriimba, baanyoola nga Yusufu ashiili ingo. Kila batsya baakwa aasi khwiloba iburaangisi weewe. 15Yusufu waabareeba ari, “Shikholwa shiina shino sheesi mukholile? Abe mwaakhumanya muri ise mu bunyala bwase inyala naashifumbula ta?”
16Kila Yuda elamwo ari, “Musakhulu, ari ifwe khukhwiilemo khuryeena? Kane khwookesanise khuryeena khuri sikhulikho ni kumusaango ta? Wele umweene waakhwookesanisile ari ifwe khulikho shiibi! Ari ifwe feesi khuli baakulwa boowo, ifwe babaaramile ni nooyo unyoolikhaane nga ali ni shikopo mu wootswa yeewe.”
17Ne Yusufu waabeelamwo ari, “Taawe! Ise sinyala naabawa inywe mweesi shitaambiso ta! Uyo unyoolikhaane ni shikopo yenyene, niye uutsya khuba umukulwa wase. Inywe babaaramile mweesi ni mwiileyo isi paapa weenywe ni lukoosi.”
Yuda ekoontselela khulwa Benyamini
18Kila Yuda esyeenda aambi waatsya isi Yusufu, waamulomela ari, “Musakhulu naakhwiikoontseleele, n’ufukiilise ise inganikhekho ni nawe ilomo ifwiiti iri. Ise naamanyile indi uli ni buunyala bubwoolana ni bw’omuyiinga umweene. 19Musakhulu, iwe wamweene wakhureeba ifwe uri, ‘Paapa weenywe ashiiliyo mulamu, namwe muliyo ni waandaayeenywe ukuundi?’ 20Nafwe khwakhwiilamwo khuri, ‘Khuliyo ni paapa weefwe, ne ali umusakhulu naabi, ni waandaayeefwe umukyeekhe uwasaalikha mu miiko kyeewe kye buusakhulu ikyo. Waandaaye w’omwaana yuno waafwa khaale, nashiryo niye yenyene uwaramawo muunda ya maayi weewe, shaakila paapa amukana naabi.’ 21Iwe wakhulakila ifwe khutsye khumureere ino, nio unyale khuumubonakho wamweene ni tsimoni tsoowo. 22Nafwe khwakhuboolela khuri umusooleli uyo s’anyala weetsa ni nafwe ta, lwekhuuba siinga alekha paapa, paapa anyala waafwa na khufwa. 23Lwanyuma wamweene waakhureewula uri, nga khwaakhumureera ta, sikhunyala khwaakhubonakho iwe luundi ta.
24“Nashiryo ifwe ni khweelayo isi paapa weefwe, khwamuboolela byoosi nga ni byaba, byeesi iwe waloma. 25Lwanyuma waakhulakila ari khukobole ino khukule biilyo. 26Ne nafwe khwaamwiilamo khuri, ‘Sikhunyala khweelayo i Misiri ta, khuurusakho nga khuli ni waandaayeefwe umukyeekhe. Lwekhuuba gafana s’anyala waakhufukiilisa ifwe khuumubonakho ta, khuurusakho nga umwaana uyo ali ni nafwe.’ 27Isho shaakila paapa weefwe waakhushebusa ifwe ari, ‘Mwaamanya muri umukyelama wase Rakeli, aasaalila ise babaana basooleli babili bonyene. 28Mutweela waayindekha waatsya khaale. Ifwaana tsisolo tse mwirome, tsamulya, siindilayo luundi khuumubonakho ta. Lwekhuuba imbuka yaabirawo indeeyi naabi. 29Ne ari siinga ndi muyila yuno naye, ne bukosi bwaamukwakho, kumutaambo kweesi munandeerera mu busakhulu bwase buno, kunaba mukali naabi kuntsire na khuntsira, niikhe i makoombe.’ ”
30-31Yuda weloosela nga aloma ari, “Ni nashiryo musakhulu, ifwe siinga khwiilayo isi paapa wase, nga khwaalekhile umusooleli yuno ino, ne paapa waabona nga sikhuli n’umusooleli ta, atsya khufwa. Buulamu bweewe bukana naabi umusooleli uyu. Naluundi mu miiko kyeewe kye busakhulu kino, ifwe kane khube khwamureerere kumutaambo kukumwiira bwiiri. 32Ise neemikhawo nga umuloleleli we buulamu bw’omwaana yuno. Ise netsubila paapa wase ndi, nga umwaana waakhukobola ni nafwe ta, kumusaango kuba khusiise buulamu bwase bwoosi! 33Ni nashiryo musakhulu, ari ise niye unarama ano, ikhwakaanise iwe nga umukulwa woowo, ne lekha umusooleli yuno eleyo ingo ni babaandaaye. 34Lwekhuuba ari ise inanyalisa ndyeena khukhwiilayo isi paapa wase nga umusooleli s’ali ni nase ta? Ise singana naabona buwaangafu bubwoola khu paapa wase ta.”