42
Babandaaye ba Yusufu batsya i Misiri
1Yakobo n’ashimanyakho ari mu Misiri mwabayo biilyo, waalomela basooleli beewe ari, “Lwashiina mwikhalaawo mwalolelanila busa muryo?” 242.2: Bur 7.12Kila alooselakho ari, “Ise naawulila bari mu Misiri iliyo biilyo. Nashiryo nimwinyukhe mutsyeyo, mukule biilyo mureere, khulekhe khufwa intsala ta.”
3Baryo babandaaye ba Yusufu likhumi benyukha baatsya kwe Misiri khuukula biilyo. 4Ne Yakobo waalekha khufukiilila Benyamini waandaaye umukyeekhe wa Yusufu, khuutsya ni nabo ta, lwekhuuba aarya ari inyala khuubayo buukosi bubunyala bwaamukwakho. 5Musaambo iyo, basooleli ba Isiraeli baaba batweela khu baandu babaatsya i Misiri, khuukula biilyo, lwekhuuba mu shibala sha Kanaani nayo yabayo intsala ingali.
6Khu mbuka iyo, Yusufu niye uwaba gafana wa Misiri yoosi, naluundi uwaba nga aloolelela bye khuukulisa babaandu babaama buli aandu oosi biilyo. Nashiryo babaandaaye nabo nga boolile, baatsya isi ali, baafukhamila nga beenamisa kimirwe kyaabwe aasi khwiloba. 7Ne Yusufu ni aababona, waabamanya buulayi, ne wekholisaka busa nga ukhabamanyile ta. Kila abareeba ni buurafu buukali ari, “Inywe mwaama waheena?”
Nabo baamwiilamwo bari, “Ifwe khwaama mu shibala sha Kanaani, khweetsile khuukula biilyo.”
8Ne abe yakhaba nga Yusufu aamanya babaandaaye buulayi naabi, nibo sibaamumanyakho ta. 942.9: Rak 37.5-10Lwanyuma kila ashebulila kamarooro keewe keesi aaroora nga ashiili mwaana, nga kabawaamba khu nibo. Kila abalomela ari, “Inywe mweetsile khuuyama busa. Mulikho mukana mumanye oba nga shibala sheefwe shili ni buuliindi bubumala namwe ta.”
10Nabo baamwiilamwo bari, “Taawe, musakhulu. Ifwe khuli babaakaanisi boowo, khweetsile busa khuukula biilyo. 11Ifwe khuli babaana b’omuundu mutweela, khuli babaandu baalayi, sikhweetsile khuuyama ta.”
12Yusufu naye waabeelamwo ari, “Mubonekha muryo. Mweetsile khuumanya oba shiibala sheefwe shili ni bye khukhwiiliinda biilayi namwe ta.”
13Nabo baamwiilamwo bari, “Musakhulu, ifwe babaakaanisi boowo, khwasaalikha babaana likhumi na babili, babaana b’omuundu mutweela mu shibala sha Kanaani. Waandaayeefwe mutweela waafwa, n’ukuundi useembayo waaramile ingo ni paapa weefwe.” 14Ne Yusufu waaboomelakho nga aloma ari, “Nga niimalile khaale khuuloma, inywe mweetsile ano khuuyama shiibala shino. 15Ari ingana khuubakhaka inywe musaambo yino: Ilala imbetsubila mu lisiina lya Faraawo ndi, simunarura ano ta, khuurusakho nga waandaayeenywe umukyeekhe waamalile khukhwiitsa. 16Ni murumane mutweela khusiinywe atsye amureere ano, babaaramile mweesi mutsya khukona mu mapuusu, nio khunyale khuubatsema khufune bituufu bibyeene. Nga akhuba shiryo ta, mu lisiina lya Faraawo, inywe mweetsile khuukhuyama ifwe.” 17Ni abweene awo, waabara boosi mu mapuusu khuumala biifukhu bitaru bibuufu.
18Uri khu shifukhu she khataru, Yusufu weetsa waabalomela ari, “Ise ndi umusaani uurya Wele. Inywe siinga mukhola sheesi imbalomela, kane muwone. 19Inywe khukhwookesanisa muri muli basaani baalayi, ari lekha mutweela khuusiinywe arame mu mapuusu ano. Inywe babaaramile musute biilyo mwiileyo, mubiyilile be muungo mweenywe babaali buubi ni ntsala. 20Ne shonyene ndi, muli ni khuukobola ano ni waandaayeenywe umukyeekhe uyo. Isho kane shookesanise shiri, byeesi mukanikhile bili bya ŋali. Ni nanywe singene mwiiribwe ta.” Nabo baryo baafukiilisana ni sheesi aaloma. 21Lwanyuma beelomela bonyene na bonyene bari, “Ilala bino byeesi khuli khuutaambisibwa bino, khulikho khutaambisibwa lweebyo byeesi khwakhola khu waandaayeefwe. Ifwe khwabona butsiina bweesi aabiramwo nga n’akhwikoontselela, ne khwaalekha khwiinaanayo ta. Isho nisho shishikilile buwaangafu buno bwoosi bukhwoolilekho buri.”
2242.22: Rak 37.21,22Kila Rewubeni abeelamwo ari, “Ne ise sinababoolela ndi mukhakholakho umwaana uyo buubi bwoosi ta? Ne inywe mwaandekelesa ise, mwaalekha khuumbuliilisa ta. Ari nafwe khuli khuuliyilibwa lwe khuufwa khweewe.” 23Ne mu bino byoosi, nibo sibaamanya bari Yusufu aaba waamanyile byeesi bali khuuloma ta, lwekhuuba aaba ali khuuraambisa umuundu ubashuusila biilomo. 24Lwanyuma Yusufu waabarurawo, waatsya iyo yenyene waarakikha khuulila kamasika. Nga waamalile aryo, waakobola waakanikha isi bali luundi. Aryo waalakila baaloondamwo Simeoni, baamubowa kimikosi nga boosi babona.
Babaandaaye ba Yusufu bakobolayo i Kanaani
25Yusufu waawa babaakaanisi beewe biilakilo khuupakhila tsiwootswa tse basaani abo, batsitsusakile ilala buulayi, lwanyuma bakobosemu tsinusu tseesi beetsa ni natso khuukula biilyo, babalooselekho ni bibiindi bibikanibwa lwe lukyeendo. Shino shakholebwa nga niye n’abalakila. 26Baryo baalebe bano baabowaka biilyo byaabwe khu sikilya tsaabwe, baawaamba lukyeendo lulubeesayo iwaabwe.
27Ne ni boola mu shifwo shitweela nga antsye bwelabuule, bakana khuuwolakho, nio bushe beloosele, mutweela khu nibo waakaangulula iwootswa yeewe, nga akana khuuwa isikilya yeewe bye khuulya, waanyoolamwo tsinusu tseewe nga tsili khu ngaaki mu wootswa. 28Kila alaanga babaandaaye waabaloma ari, “Bona tsinusu tsase baatsikobosilemo. Itsishiina mu wootswa.” Boosi ni baabona shino, buuri bwaabawaamba, kila beelomela bari, “Ne ndi Wele waakhukholile shiina shino?” 29Baryo ni boola isi paapa waabwe Yakobo mu shibala sha Kanaani, baamuboolela byoosi bibyabakholekhakho. 30Baamuboolela bari, “Umusaani umweene, umuwuli we Misiri, akhukanikhileyo ni buurafu buukali naabi, nga aloma ari ifwe khwatsiile khuuyama shibala sheewe. 31Ne ifwe khwaamuboolela khuri, ‘Sikhweetsile khuuyama shibala ta. Ifwe khuli basaani baalayi. 32Fweesi atweela khuli babaana likhumi na babili, ba paapa mutweela. Mutweela waafwa, n’ukuundi useembayo waaramayo ni paapa weefwe mu Kanaani.’ 33Ne umusaani uyo, umuwuli we Misiri, waalooselakho ari, ‘Ari ngana khubatsema khuumanya oba muli basaani baalayi musaambo yino: Mutweela khusiinywe atsya khurama ano ni nase, inywe babaaramile mweesi musute biilyo muyilile be muungo mweenywe, babaali buubi ni ntsala. 34Mutsye mundereere waandaayeenywe umukyeekhe. Isho shintsokesanise shiri inywe muli basaani baalayi, ne akhuba babeetsile khuuyama ta. Lwanyuma lweebyo nio imbalekhuulile waandaayeenywe unaba waaramile ano, muryo mwiiloosele khuukhola bye khuukulaana mu shibala shino.’ ”
35Uri lwanyuma bakaangulula tsiwootswa tsaabwe, buli mutweela waanyoolakamwo tsinusu abe tseesi baatsya khukulila biilyo. Baryo boosi atweela ni paapa waabwe ni baabona shino, buuri bwaabawaamba luukali lweene. 36Kila Yakobo alomela angaaki ari, “Ari mukana ise ifwiile babaana baase boosi? Yusufu waafwa, Simeoni naye ari bona s’aliwo ta, ari ndi mukana khuuyila Benyamini naye! Bino byoosi bilikho biimbirisa ise buubi naabi!”
37Lwanyuma kila Rewubeni elamwo paapawe ari, “Siinga indoba khukobosa Benyamini nga umulamu isi uli, wiira babaana baase besiinde abo boombi. Lekha Benyamini atsye ni nase, inamuliinda, imukobose buulayi.”
38Ne Yakobo waamwiilamwo ari, “Umwaana wase singene atsye ni nanywe ta. Waandaaye waafwa, ari niye waarama yenyene. Ari siinga ibawo shishiindu shikosi shishimukwakho nga muli muntsila, kumutaambo ukwo kunyala kwaantsira, naaweela imakoombe mu busakhulu buno.”