41
Yusufu asontsoola kamarooro ka Faraawo
1Lwanyuma lwe kimiiko kibili nga kyaabirirewo, Faraawo naye waaroora kamarooro, nga kaloma kari: Aaba nga weemikhile khu ndulo khwe luluutsi Nayilo. 2Lwanyuma waabona tsikhaafu tsiinere buulayi musaafu, nga tsiniina khukhwaama mu meetsi ke luutsi Nayilo ulwo, tsaarakikha khukhwaayila mu makhalaamba ke khu ndulo khwe kameetsi. 3Lwanyuma lweetso, tsikhaafu tsitsiindi musaafu, tsitsaba nga tsaateela, tsaaŋayila ilala, natso tsaaniina khukhwaama mu meetsi. Natso tseetsa tseemikha aambi ni tsikhaafu tsinere tsana khu ndulo khwe kameetsi. 4Lwanyumakho, tsikhaafu tsitsateela, luundi tsitsaŋaha itso, tsaatuukhuunya tsikhaafu tsiinere itso tsaatsimalawo. Khaangukho Faraawo waasisimukha mwiilo.
5Uri liilo limuwaamba luundi, waafuna kamarooro kakaandi. Indi mu kano, waabona biikala bye ŋaano musaafu, nga biimiliwu, nga byaaroba bibonekha buulayi naabi, nga byoosi byaatsowela khu lusakya lutweela. 6Lubaluba, abonekhawo biikala bibiindi musaafu nabyo, nga byaaŋaha, bibonekha buubi naabi, bibyookhebwa ni mbewo imbile iye bwaamanyaanga. 7Biikala bibyaŋaha bino, byaatsya byaamilaka biikala biimiliwu tsana musaafu ibyo, byaabimalawo. Kila ndi Faraawo waasisimukha, weenyoola nga nako kali kamarooro busa.
841.8: Dan 2.2Ne kumutikhinyi antsye ni bwasha, wewulila nga kumutaambo kwaamuwaambile naabi, shikila arumanisa baalakusi ni basaani be kamakyesi mu Misiri khukhwiitsa. Aryo waababoolela kamarooro keewe, ne yaalekha khuubawo na mutweela ukasontsoola ta.
9Lwanyuma umusaani tsana uwakabulilatsaka umuyiinga bye khuunywa byeewe waashebulila, kila aloma ari, “Shaleelo naashebuliile abe sheesi naakhila khuukhola. 10Lutweela nga iwe, O Faraawo, nga ni wakhukhalalila ifwe, ise atweela n’umuteekhi woowo umukhulu, iwe wakhura ifwe mu mapuusu mu lwaanyi lw’omuliindi umukhulu. 11Ne ifwe feembi khwafuna kamarooro mu shilo sheene nisho shitweela. Ne kamarooro keefwe kaaba ni khuusoontsolebwa khukhukhafwaanana ta. 12Khwakaboolela umusooleli umu Heburaniya, uwaba umubowe atweela ni nafwe, nga niye umwakaanisi w’omukhulu we baaliindi. Niye aanyalisa buulayi naabi khuukhusoontsoola ifwe sheesi kamarooro ka buli mutweela khuusifwe kaamanyisa. 13Nga waakhusoontsolile aryo, bibiindu byakholikhila ilala nga n’akhuboolela ifwe, iwe waangobosa khu mulimo kwase kuno, ne umuteekhi umukhulu baamusuunga.”
14Isho shaakila Faraawo waarumanisa ari bamureerere Yusufu. Baatsya baamurusayo khaangukho mu mapuusu. Naye aryo waamala khuubekakho litsuune lyeewe, waashuusa bikwaaro byeewe, weetsa weemikha i buraangisi wa Faraawo. 15Kila Faraawo amuboolela ari, “Naroorire kamarooro, ne mbaawo n’umuundu na mutweela uwanyalile khuukasontsoola ta. Ne baambooleele khaale bari iwe unyala khusontsoola kamarooro buulayi busa.”
16Yusufu naye waamwiilamo ari, “Iseese khu bwase sinyalisa ta, ne Wele niye ukane akhuwe khuusontsoola khweesi iwe ukana.”
17Lwanyuma Faraawo waarakikha khuuboolela Yusufu kamarooro ari, “Mu marooro, ise nabeele nga neemikhile khu ndulo khwe luluutsi Nayilo. 18Lwanyuma naabona tsikhaafu tsiinere buulayi musaafu nga tsaama aasi mu meetsi ke luluutsi ilwo, tsaarakikha khukhwaaya kamakhalaamba. 19Indi luundi naabona tsikhaafu tsitsiindi musaafu, tsitsateela nga tsaaŋayila ilala, tseesi abe ikhaabonatsakakho mu Misiri muno ta, nga natso tsaama mu meetsi mweene. 20Lwanyuma tsikhaafu tsana tsitsateela tsaaŋaha tsino, tsaatuukhuunya, tsaamalilawo ilala tsikhaafu tsiinere buulayi itso, tsitsanyoowa khuurura mu meetsi. 21Ne abe yakhaba nga tsamala khuutsilya tsiryo, tsikhaafu tsitsateela itso, sitsabonekhakho nga tsitsiliilekho shishiindu shoosi ta. Lwekhuuba tsarama nga tsili tsindeele busa, nga ni tsaba makiboole. Lwanyuma lweesho, naasisimukha.”
22“Indi lwanyuma naaroora kamarooro kakaandi. Khu muluundi kuno, nabona biikala musaafu bye ŋaano, nga biimiliwu, nga byaaroba bibonekha buulayi naabi, nga byoosi byaatsowela khu lusakya lutweela. 23Lwanyuma lwabyo, naabona biikala bibiindi musaafu nga byaŋaha, bibonekha buubi naabi, bibyookhebwa ni mbewo imbile iye bwaamanyaanga. 24Biikala bibyaŋaha bino byamilaka biikala biimiliwu ibyo byoosi. Kamarooro kano naakabooleele balakusi, ne mbaawo na mutweela uwanyalile khuukaasontsoolela ise ta.”
25Lwanyuma Yusufu naye weelamwo isi Faraawo ari, “Kamarooro kano koombi kamanyisa shishiindu nisho shitweela. Wele ali khuukhubimbulila iwe sheesi atsya khukhola. 26Tsikhaafu tsinere musaafu itso, tsimanyisa kimiiko musaafu, naluundi biikala musaafu bye ŋaano ibyo, nabyo bimanyisa kimiiko musaafu, ne khuurusakho ndi kamarooro ako koombi kamanyisa shishiindu shitweela. 27Tsikhaafu musaafu tsitsateela, tsitsaŋaha tsitseetsa lwanyuma itso, ni biikala bye ŋaano musaafu bibyaŋaha, byookhebwa ni mbewo imbile iye bwaamanyaanga ibyo, byoosi bimanyisa kimiiko musaafu kye ntsala ingali. 28Nga ni malile khaale khuukhuboolela, Wele ali khuukhwookesanisa iwe sheesi atsya khukhola. 29Itsya khubawo kumusalo kwe biilyo mu shibala she Misiri shino shoosi khuumala kimiiko musaafu kimibuufu. 30Ne lwanyuma lweekyo, ikheetseyo kimiiko kikiindi musaafu kye ntsala imbi naabi mu Misiri, shikile kimiiko musaafu kye kumusalo kifwaane nga kikikhaabawo. Shikhaabe shiryo lwekhuuba intsala ikhaalye, naluundi ikhaabe iye kamaani. 31Intsala ikhaalye, ikhaabe imbi naabi, ilekhe khubawo n’umuundu na mutweela ulinyala khushebulilakho ari yabawo imbuka iye kumusalo mu shibala shino ta. 32Ilomo iyakilile kamarooro kano kaakhubonekhela kimiluundi kibili, imanyisa iri, Wele waakhaliilewo ilala sheesi atsya khukhola, era shitsya khwoolelela mu khaangu naabi.
33“Ari ise indeera shishambaaso ndi, uroboleyo umuundu uweetsula kamakhula ni khuumanya, umurewo khuuba nga niye ulolelela shiibala she Misiri shino shoosi. 34Wiileyo uroboleyo baakhulu babaandi babaakane batsye mu shibala she Misiri shino shoosi, babuusakekho shitweela she kharaano khu biilyo byeesi bakyesile, mu miiko kino musaafu kye kumusalo. 35Baryo nga baamalile khuubuusilisa biilyo bino byoosi mu miiko kye kumusalo kikiitsa ikyo, babireere, babire mu bunyala bwa Faraawo. Lwanyuma babibuunge mu birara mu biriimba, biliindibwe buulayi. 36Biilyo bibuunge ibyo, bikhaayeete shibala shino she Misiri luukali naabi, nga kimiiko kye ntsala ikyo kyoolile. Musaambo iyo, babaandu sibaakhahele lwe ntsala ta.”
Yusufu bamuloonda khuuba Gafana wa Misiri
37Faraawo atweela ni babaakaanisi beewe boosi baabona nga kamakhula keesi Yusufu aareera kamalayi. 38Kila Faraawo abareeba ari, “Iliyo umuundu ukuundi ufuurakho yuno buulayi isi kane khunyoole, uwetsulamwo umwoyo wa Wele?” 39Shikila ashuukhila Yusufu waamulomela ari, “Khukhwaama nga Wele umweene n’akhubiimbuliile iwe bino byoosi, shili sha lubuula busa shiri, mbaawo umuundu ukuundi uuli ni kamakhula ni khuumanya nga iwe ta. 4041.40: Bur 7.10Nashiryo ari indi khuukhuurobola iwe khuuba niye ulolelela bye buwuli byoosi bye mu lubili lwase. Ni babaandu baase boosi kane bawulilatsake biilakilo byoowo. Mu bunyala, iwe kane ubatsake umuundu ukhola khabili khukhwiila khuusiise.”
Yusufu nga niye uwula Misiri
41Lwanyuma Faraawo waalomela Yusufu ari, “Bona ari indi khuukhurobora iwe khuuba umuwuli we shibala sha Misiri.” 4241.42: Dan 5.29Aryo Faraawo wefuula intsiyi yeewe iye buyiinga, waakikwaarisa khu lwaala lwa Yusufu. Lwanyuma waamukwaarisa biikwaaro bibimulikhamulikha busa, waamukwaarisa ni kumunyololo kwe zaabu mu milo mweewe. 43Naluundi waamuwa likaari lyeewe lilikhola khabili khuukyeendatsakilamwo. Aryo buli aandu oosi isi atsyatsaka, baakhulu babaatsyatsaka iburaangisi weewe, baalomatsakila babaandu bari, “Lekha umukhulu abire! Lekha umukhulu abire!” Musaambo iyo, Yusufu waaroborebwa khuuba umuwuli wa Misiri yoosi. 44Indi luundi Faraawo waalomela Yusufu ari, “Iseese niye umuyiinga, ne mbaawo umuundu yeesi ukane enyuse kumukhono41.44 Khukhwinyusa kumukhono: Shimanyisa khuukholakho shishiindu shoosi kweewe, namwe shikyele sheewe mu Misiri muno, nga iwe waakhumufukiilisa taawe.”
45Aryo Faraawo waatwiikha Yusufu lisiina ari Zafenasi Paneya41.45 Zafenasi Paneya: Lisiina lino limanyisa liri Wele akanikha luundi ali Umulamu, lwanyuma waamuwa Asenasi, umukhaana wa Potifera, umusaayi we Oni, khuuba umukyelama weewe. Aryo Yusufu waatsya nga akyeenda mu shibala she Misiri shoosi.
46Yusufu aaba nga oolesa kimiiko kamakhumi kataru kye buukhulu khu mbuka isi aarakikhila bubwakaanisi bweewe isi umuyiinga wa Misiri. Yusufu waaba nga arura mu lubili lw’omuyiinga, waatsya nga akyeenda khuumalatana shiibala she Misiri shoosi. 47Mu miiko musaafu kye kumusalo ikyo, yabawo biilyo biikali naabi buli aandu oosi. 48Aryo Yusufu waatsya nga abuusanisa biilyo bye kumusalo ibyo, waabibuunga mu biriimba. Mu buli shiriimba, waaba nga abuungamwo biilyo bibyalimibwa mu nimilo tsitsiili aambi ni nasho. 49Yusufu aabuunga biilyo biikali naabi, byafwaana busa nga kumuyekhe kukuuli khu ndulo khwe nyaantsa. Lwekhuuba imbuka yoola, baakhasikha khuubipimaka, ni khuumanya buukali bwabyo.
50Ne nga kimiiko kye ntsala kishiili khukhwoola ta, Yusufu aasaala ni Asenasi, umukhaana wa Potifera, babaana besiinde babili. 51Yusufu waatwiikha umukiiboole ari Manase, lwekhuuba aaloma ari, “Wele waanjeetile ise khukhwiibilila biwaangafu byeesi nabamwo atweela ni be muungo mwa paapa wase boosi.” 52Waatwiikha umwaana weewe uwe khaabili lisiina ari Efurayimu, lwekhuuba aaloma ari, “Wele wambaalayisiile mu shibala shishaba she kumutaambo kwase.”
53Lwanyuma lwa bino byoosi, kimiiko tsana musaafu kye kumusalo kyaawakho. 5441.54: Bur 7.11Kiryo kimiiko musaafu kye ntsala kyaarakikha, nga Yusufu n’aloma. Intsala yaalya buli aandu oosi mu shibala, ne mu Misiri yabayo biilyo biikali naabi mu birara byaabwe. 5541.55: Yok 2.5Lwanyuma intsala ni yarakikha khuulya ba Misiri nabo, baarakikha khuulilila umuyiinga nga bakana biilyo. Kila Faraawo abalakila ari, “Ni mutsye isi Yusufu, ne muli ni khuukhola shoosi sheesi abalakila khuukhola.”
56Intsala ni yaba nga yeebinile buli aandu oosi mu shibala isho, Yusufu wekulakawo birara, waarakikha khuukulisaka biilyo isi ba Misiri. Lwekhuuba intsala yaba ngali naabi oosi. 57Isho shaakila babaandu baamaka buli aandu oosi mu manaambo kakaandi khukhwiitsa i Misiri khuukula biilyo, lwe ntsala iyabayo ngali.