40
Yusufu asontsoola kamarooro ke baabowe basheewe
1Lwanyuma lwe khuubirawo imbuka ifwiiti iri, umusaani ukabulila umuyiinga wa Misiri bye khuunywa byeewe, n’umuteekhi weewe umukhulu, baakhalasa umuyiinga. 2Faraawo wakhalalila naabi baakhulu bano boombi, 3kila babawaamba baabara mu mapuusu, kakaaba mu lwaanyi lw’omukhulu we baaliindi, nga nimwo mweesi baabowela Yusufu naye. 4Umukhulu we baaliindi yuno waarawo Yusufu khuuba nga niye ubaloolelela. Baryo baaba nga bamenya imbuka indeeyikho mu mapuusu umwo.
5Yabawo shiilo shitweela basaani bano boombi, uwakabulatsaka umuyiinga bye khuunywa n’umuteekhi, buli mutweela waaroora kamarooro, ne nga buli kamarooro kali ni sheesi kamanyisa. 6Antsye nga bwaasheele, Yusufu weetsa khuubabona nga ni bali, ne waabanyoola nga kumutaambo kwaabawaambile naabi. 7Shikila areeba baakhulu ba Faraawo bano ari, “Mwaabeele shiina shaleelo kila kumutaambo kwabetsuulekho kuri?”
8Nabo baamwiilamwo bari, “Ifwe feembi buli mutweela afunile kamarooro mu shilo, ne sikhulikho n’umuundu unyala waakakhuruumbulila ta.”
Kila Yusufu abeelamwo ari, “Wele niye unyalisa babaandu khusontsoola kamarooro. Ari inywe ni mumboolele kamarooro keenywe khubone.”
9Uyo uwakabulatsakila umuyiinga bye khuunywa byeewe niye uwanyoowa, waaboolela Yusufu ari, “Ise mu marooro kaase, naboone kuusaala kumusabibu iburaangisi wase. 10Ne khu kuusaala khweene khwabeelekho tsisakya tsitaru, tsaamelakho kamasaafu, tsaamulisa, lwanyuma khweetsakho kimisabibu kimirobe. 11Ise nabeele nga nawaambile shikopo sha Faraawo mu mukhono kwase, kila imbuta kimisabibu kimirobe ikyo, naakikhamulila mu shikopo isho. Lwanyuma naashimuyilila, naashimuwaambisa.”
12Lwanyuma kila Yusufu aloma ari, “Sheesi kamarooro koowo kamanyisa, nisho shino: Tsisakya tsitaru nibyo biifukhu bitaru. 13Nashiryo mu bifukhu bitaru, Faraawo atsya khukhurusakho iwe shitaambiso shoowo, akhulekhuule khukhwaama mu mapuusu muno. Kane akhwiiseyo mu shifwo shoowo nga umukabulila bye khuunywa byeewe. 14Ne nga woolileyo, nase ushebulilatsaka nga byaakhutsiliile buulayi. Ikhuloomba ndi uboolele umuyiinga bibimaambakho, manya naye waanjeeta khuurura mu mapuusu muno. 15Lwekhuuba ise baantsiba busa, baantsamisa mu shibala she ba Heburaniya, ni naari bona indi ano mu mapuusu, nga mbaawo shishiindu shiibi shoosi sheesi nakhola shishikila naaba muno ta.”
16Aryo umuteekhi umukhulu naye n’abona ari kamakhulu ke kamarooro kooyo kali kamalayi, kila naye alomela Yusufu ari, “Nase nafunile kamarooro. Ne mu kaase, ise nabeele nga netyuukhile bibiipo bibiilimo kimikaati bitaru khu murwe kwase. 17Ne mu shiipo shishabeele khu ngaaki khwe byasheewe, mwabeelemwo kimikaati kya Faraawo kya buli saambo. Ne shonyene ndi binywiinywi byeetsa byaarakikha khuukiliila khu murwe kwase.”
18Yusufu waamuloma ari, “Sheesi kamarooro koowo kamanyisa nisho shino: Bibiipo bitaru nibyo biifukhu bitaru. 19Nashiryo mu bifukhu bitaru, Faraawo atsya khukhuremakho kumurwe kwoowo, asuunge kumulaambo kwoowo khu kuusaala. Lwanyuma binywiinywi bye mu ngaaki kane biitse bilye kumubili kwoowo.”
20Nga ni byaba, khu shifukhu shishikhola khataru, shishaba nisho she khuushebulililakho kamasaalikha ka Faraawo, aryo waakabulila baakhulu beewe boosi kamayiiya. Lwanyuma waarumanisa baareera mu moni tsaabwe basaani tsana baabili, uwamukabulilatsaka bye khuunywa n’umuteekhi weewe umukhulu. 21Uyo uwamukabulilatsaka bye khuunywa, Faraawo waamukobosa khu buraambi bweewe ubwo, weloosela khukhwakaanisatsaka Faraawo. 22Ne uyo uwabatsaka umuteekhi weewe umukhulu, waamukhalila kwe khuufwa, baamusuunga khu kuusaala, ni bibyeene byaaba nga Yusufu n’ababoolela.
23Ne shonyene ndi, umusaani uwakabulilatsaka Faraawo bye khuunywa nga n’olayo, weebilila Yusufu, waalekha khushebulila byeesi aamulomba ta.