16
Iburamu, Hagari ni Ishimaeli
1Aluno Sarayi, umukyelama wa Iburamu, s’anyalisa khuusaalila Iburamu babaana ta. Ne aaba n’umukhaana umu Misiri uwaba umukulwa weewe isi baalaanga bari Hagari. 2Kila Sarayi alomela Iburamu ari, “Bona ise Umukasya waakhunyalisisa khuusaala babaana ta. Ari n’utsye ukone n’umukhaana wase umukulwa yuno, manya luukanile inyala naabayo ni lisaaye khuubirira mu niye.”
Aryo Iburamu waafukiilila sheesi Sarayi aamulomela. 3Sarayi waayila Hagari, waamuwa isi Iburamu khuuba ni naye. Shino shakholekha lwanyuma lwa Iburamu khuumenya mu Kanaani khuumala kimiiko likhumi kimibuufu. 4Musaambo iyo, Iburamu waakona ni Hagari, waaba shisoombo. Ne Hagari n’abona ari ali shisoombo, waarakikha khuulekelesa Sarayi nga amubirisaka buubi.
5Lwanyuma kila Sarayi alomela Iburamu ari, “Shihangafu she khutaambisibwa khwase shino sheetsile khulwoowo! Ise nakhuwa umukhaana yuno indi ubekho ni naye, ne ari bona lwekhuuba waashimanyile ari ali shisoombo, waarakikha khukhuundekelesaka ise. Ari inoomba ndi khali Umukasya akhalilewo khuubona naanu uwe shikosi, iwe namwe ise.”
6Iburamu naye waamwiilamwo ari, “Isho shili shaŋali. Ne umukhaana yuno ali umukulwa woowo, unyala waamukhola shoosi sheesi ukana khuumukhola.” Aryo Sarayi waarakikha khuubirisaka buubi umukhaana tsana yuno, shaakila waatitukha waatsya.
7Nga Hagari waatsiile wawooleele aambi ni khakheetsi iyo mu mubiimbi, khu kumukhoosi kukuutsya i Shuri, malayika w’Omukasya waamwiitsayo. 8Kila amureeba ari, “Iwe Hagari, umukulwa wa Sarayi, waama waheena, naluundi uli khuutsya waheena?”
Hagari naye waamwilamwo ari, “Ise ndi khuutitukha khu maayi Sarayi uwuniinda.”
9Lwanyuma malayika waamulomela ari, “Yiilayo isi maayi woowo ukhuliinda uyo, wiloosele khuuba umwakaanisi weewe.” 10Malayika w’Omukasya uyo waalooselakho ari, “Kane ikhuwe iwe lisaaye lye babetsukhulu liboofu naabi, beesi umuundu yeesi akhaalekhe khunyalisa khuubala ta.”
11Malayika ndi waamulooselakho ari, “Bona ari uli shisoombo, ulisaala umwaana umusiinde, ulimutwiikha lisiina uri Ishimaeli16.11 Ishimaeli: Lisiina lino shimanyisa shiri Wele awulila, lwekhuuba Umukasya waawuliile khuulila khwoowo lwe kumutaambo. 12Ne umusooleli woowo uyo, akhaabe nga isikilya iye mwirome, akhaabe umusiku we babaandu boosi, na buli muundu yeesi akhaabe umusiku weewe. Akhaamenye mu busiku ni baalebe beewe.”
13Kila Hagari ambaasa mu mwoyo kweewe ari, “Ilala, ilala ise naboone Wele, ne naaramawo nga ishiili umulamu khuushikanikhakho?” Isho shaakila waawa Wele lisiina ari, “Iwe uli Wele ubona.” 14Isho nisho shishikila isebele iyo iili akari a Kadeshi ni Beredi baakilaanga bari “Isebele iy’Omulamu umweene Uwumbona ise.”16.14 Umulamu Uwumbona ise: Isebele yino baakilaanga bari Beeri Lahayi Royi.
1516.15: Gal 4.22Aryo Hagari waasaalila Iburamu umwaana umusiinde, ni naye waamutwiikha lisiina ari Ishimaeli. 16Khu mbuka yino isi Hagari aasaalila Ishimaeli abe Iburamu oolesa kimiiko kamakhumi shinaane na kisesaba (86) kye buukhulu.