14
Iburamu awonesa Loti
1Khu mbuka iyo, Amurafeli umuyiinga wa Shinari, ni Ariyoki umuyiinga wa Elasari, ni Kedorilawomeri umuyiinga Elamu, ni Tidali umuyiinga Goyiimu, 2baatsya bebwakala Bera, umuyiinga wa Sodomu, ni Birisha, umuyiinga Gomora, ni Shinabu, umuyiinga wa Adima, ni Shemeberi, umuyiinga wa Zeboyiimu, n’umuyiinga wa Bela. Bela alala shishimanyikhaane nga Zowari. 3Bayiinga bano baraano, betubaasa atweela, baara kamaye kaabwe atweela mu Litila lya Sidimu, alala isi balaanga bari Dedi Si14.3 Dedi Si: Niyo inyaantsa iye kumuunyu. 4Abe khuumala kimiiko likhumi na kibili kimibuufu, baaba nga bawulibwa n’umuyiinga Kedorilawomeri. Ne mu mwiiko kukuukhola likhumi na kitaru, baakhalawo khuumuminyaalila.
5Kila mu mwiiko kwe likhumi na kine umuyiinga Kedorilawomeri atweela ni basheewe, baatsya bebwakala, luundi baawula babaandu ba Refayimu mu Ashiterosi-Karinayimu, ni ba Zuzi mu Hamu, ni ba Emi mu Shave-Kiriyasayimu. 6Ni khuulooselakho baatsya baawula babaandu ba Hori, mu shibala she mu ngoongo sha Edomu14.6 Edomu: Mu lulomo Luheburaniya baashilaanga bari Seyiri, khuutsya khukhwoolela ilala i Eli-Parani, shishiili aambi ni kumubiimbi. 7Khukhwaama awo, baashuukha baatsya i Eni Mishipati, alala shishimanyikhaane nga Kadeshi. Lwanyuma baawaamba shibala shoosi shishaba she ba Amaleki, baawula ni babaandu ba Amori boosi, babaaba bamenya mu Hazazoni-Tamari.
8Lwanyuma kila nabo bayiinga nga, umuyiinga wa Sodoma, n’uwa Gomora, n’uwa Adima, n’uwa Zeboyiimu, n’uwa Bela, babuusanisa kamaye kaabwe, baatsya bebuusila mu Litila lya Sidimu 9khuutsya khuusoolana ni Kedorilawomeri umuyiinga wa Elamu, ni Tidali umuyiinga wa Goyiimu, ni Amurafeli umuyiinga wa Shinari, ni Ariyoki umuyiinga wa Elasari, bayiinga bane nga basoolanisa bayiinga baraano. 10Ne Litila lya Sidimu lino abe lyaayitsulamwo kamalowo ni kamalowo. Shikila bayiinga uwa Sodomu, n’uwa Gomora, ni baaba nga batitukha khukhwaama mu busoolo atweela ni kamaye kaabwe, baalala baakwaka mu malowo ako. Ne babaaramile baatitukha, belukhila mu shibala she mu ngoongo. 11Baryo baasiku baabwe baatsya bayaaya bye buyiindifu khukhwaama mu Sodomu ni mu Gomora, ni bye khuulya byaabwe byeene, lwanyuma baakhuumba baatsya. 12Ni Loti, umwaana wa wandaaye wa Iburamu, uwaba nga amenya mu Sodomu, naye baamuyililamwo atweela ni bye buyiindifu byeewe byoosi.
13Khu mbuka yino, Iburamu umu Heburaniya, aaba nga amenya aambi ni kimisaala kye kamaani kikyaba kya Mamure umu Amori. Mamure atweela ni babandaaye Eshikolu ni Aneri, baaba nga bali be buusaale ni Iburamu. Yabawo umuundu mutweela uwatitukha khukhwaama isi buusoolo bwaba, weetsa waashiboolelakho Iburamu. 14Shikila Iburamu nga n’ashiwulila ari umulebe weewe Loti naye baamuyililemo nga umubowe, waalaanga atweela basaani beewe baaleekele mu bye busoolo, baboola bitoondo bitaru ni likhumi na shinaane (318), babaasaalikhila muungo mweewe. Aryo waatsya ni nabo nga aloonda khu bayiinga baane tsana abo, khukhwoolela ilala i Dani.
15Mu shilo isho, waakabananisamwo liiye lyeewe, khuutsya bebwakale baasiku khukhwaama mu soonda tsoosi. Baryo baatsya babebwakala, baabawula, naluundi baabatimisa khuutsya khwoola i Hoba, shishaba ingaaki wa Damasiko. 16Musaambo iyo, Iburamu waakobosa bibiindu byeesi baayaaya byoosi. Aryo waakobosa n’umwaana wa wandaaye, Loti ni bye buyiindifu byeewe byoosi, atweela ni bakhasi, na buli muundu yeesi abe isi baawaamba.
Melekizedeki asabila Iburamu tsikhabi
17Aryo Iburamu waakobola lwanyuma lwe khuuwula umuyiinga Kedorilawomeri ni bayiinga babaandi abo. Umuyiinga wa Sodomu weetsa khukhwakaanana Iburamu mu Litila Shave, alala lyeesi abe balaanga bari Litila ly’Omuyiinga.
1814.18: Heb 7.1-10Ni Melekizedeki umuyiinga wa Salemu, uwaba umusaayi wa Wele Uuli angaaki luukali, waareera kumukaati ni viini, 19kila awa Iburamu tsikhabi nga amulomela ari,
“Khali Wele uwe Angaaki Lukali, akhuweele iwe tsikhabi,
Niye Umubuumbi we Likulu ni Shibala
20Naluundi aruuyibwe naabi
Wele uwe Angaaki Lukali
uwakhunyalisile iwe khuuwula baasiku boowo!”
Aryo Iburamu waawa Melekizedeki shitweela she likhumi she bibiindu byoosi byeesi aaba nabyo.
21Umuyiinga wa Sodomu kila alomela Iburamu ari, “Sheesi ise ikhukanakho nibo babaandu baase bonyene. Ne unyala weramisila bye buyiindifu byoosi.”
22Naye Iburamu weelamwo umuyiinga wa Sodomu ari, “Ise naamalile khaale khukhwitsuba isi Umukasya Wele Uwe Angaaki, nga niye Uwabuumba Likulu ni Shibala, 23nga inoma ndi mbaawo shishiindu shoosi shishiili shishoowo, sheesi ise kane niiramisile ta, abe yakhaba khaawutsi, namwe lukoye lulubowa shilaalo ta! Nio iwe ulekhe khuuloma uri ise naayiindiile khulwe bibiindu byoowo ta. 24Ari kumukabo kwase khayo kube biilyo byeesi basaani baase baaliile byonyene. Ne lekha basaale baase bano Aneri, ni Eshikolu, ni Mamure, bayile kumukabo kwaabwe.”