8
1Kila Umukasya alomela Musa ari, “Tsya isi Faraawo, umulomele uri Umukasya walakiile ari ulekhuule babaandu beewe batsye bamwisaaye. 2Ne nga waalobile khubalekhuula, kane asiindikhe tsikhele tsimalatane shibala shoosi. 3Luluutsi Nayilo kane lwiitsulemo tsikhele, nio tsaame mu bweene umwo tsisalanile khukhwoolisa ni mu lubili lw’omuyiinga, ni mu shiseenge sheewe mweesi akona. Kane tsitsye tsiitsule ni muntsu tsye babaakaanisi beewe, ni muntsu tsye babaandu boosi. Kane tsitsye khukhwoolisa ni mu bifwo mweesi bateekhela, tsingile ni mu bifuluuya byeesi bateekhelamo biilyo. 4Tsikhele kane tsisuniaakile khu buli muundu, ni khu muyiinga mweene, khu baandu babaraamba mu lubili lweewe, ni khu buli muundu yeesi mu Misiri.”
5Musa waalomela Aroni ari, “Aamba imiimbo yoowo mu mukhono, ukyokeselele khu meetsi ke mu Misiri koosi, nio akile tsikhele tsiitsuulemo, tsimalatane liiloba lye mu Misiri lyoosi.”
6Nashiryo Aroni wawaamba imiimbo yeewe, waakyokeselela khu meetsi ke mu Misiri koosi, shino shaakila tsikhele tsyaamalatana mu Misiri yoosi. 7Ne baalakusi nabo baaraambisa kamaani kaabwe ke khuulakula, baryo baakhola tsikhele tsyaamalatana liiloba lye mu Misiri lyoosi.
8Lwanyuma Faraawo walaanga Musa ni Aroni, waabalomela ari, “Inywe siinga muloomba Umukasya waandusakho khusiise ni khu baandu baase tsikhele tsino tsaatsya, kane indekhuule babaandu batsye bamwisaaye niye.”
9Musa waamulomela ari, “Iwe khalawo imbuka isi ukana ise inoombe Umukasya, tsikhele tsyaakamise khuubasunakho khusiinywe, tsirure mu ntsu tseenywe, tsiileyo tsinyoolikhane mu luutsi Nayilo lwonyene.”
10Umuyiinga waamukobolamo ari, “N’uloombe kumukaamba.” Musa waaloma ari, “Kane shikholebwe nga n’ulomele, nio buli mutweela amanye ari mbaawo wele uli nga Umukasya Wele weefwe ta. 11Tsikhele tsikhaakooranewo khukhwaama mu ntsu tseenywe tsoosi, tsilekhe khubonekhakho luundi ta, akhali tsinyoolikhane mu Nayilo mwonyene.”
12Nashiryo Musa ni Aroni baarura isi Faraawo baatsya. Musa wekoontselela Umukasya khu biwaamba khu khele itsyo, nga abe n’afukiilisana ni Faraawo. 13Umukasya waakhola nga Musa n’amuloomba, kila tsikhele tsitsyaba mu ntsu ni khu liloba lilyoomu busa tsoosi tsaafwa. 14Baabusaasa tsikhele tsitsifwiile mu bifwo bibikhali bitweela ta, shibala shoosi shaawunya buubi. 15Ne umuyiinga n’abona ari buli shitweela sheelileyo nga abe amataayi, wookesanisa shikili sheewe luundi, nga abe Umukasya n’aloma. Umuyiinga waaloba khuuloondelela bya Musa ni Aroni.
Shitaambiso she Tsinyeende
16Kila Umukasya alomela Musa ari, “Lomela Aroni awaambe imiimbo yeewe akikhupe aasi khu lifukhuulu, likyele tsinyeende mu Misiri mwoosi.”
17Nabo baakhola nga Umukasya n’aloma, Aroni wenyusa imiimbo yeewe, waakikhupa khu lifukhuulu. Shino shaakila tsinyeende tsyasaama luundi tsaalamaka busa khu baandu ni khu bisolo byoosi. Buli lifukhuulu lyoosi mu Misiri lyeekyela tsinyeende. 18Babaalakula nabo baakhaka nga ni banyala ni kamakhula kaabwe koosi ke khuulakula, bari nabo bakhole tsinyeende tsisaame, ne bakhaasikhana. Nashiryo tsinyeende tsaarama nga tsisaama khu baandu ni khu bisolo.
198.19: Luka 11.20Kila babaalakula baboolela Faraawo bari, “Kano kali kamaani ka Wele.” Ne shitweela busa, nga Umukasya n’aloma, Faraawo waarama nga ali ni shikili, waalekha khurekeeresa byeesi baaloma ta.
Shitaambiso she Tsiisame
20Lwanyuma Umukasya waalomela Musa ari, “Kumukaamba kumutikhinyi yinyukha utsye isi Faraawo, umuliindiilile nga eekha khu luutsi, umulomele uri, Umukasya waakhulakiile ari ulekhuule babaandu beewe batsye bamwisaaye. 21Ne nga waaminyaalile, kane isiindikhe tsiisame khu baandu, tsisalanile khu shibala shoosi. Kane tsisame tsiibuuse muntsu tsye ba Misiri tsoosi, naluundi tsibalaamekho mwabeene. 22Ne khu shifukhu isho, shisiintsa she Gosheni isi babaandu baase bamenya, ikhaashikhole nisho shibe sha buraawa, nio ikile tsisame tsilekhe khukhwibuusayo ta. Shino kane shikile nawe umanye uri khu shibala khulikho Umukasya. 23Kane ise indewo lulwaakha akari e babaandu baase ni baboowo. Lutsya khwoola kumukaamba, khaabonelo khano khakhaabe khaakwiilewo.”
24Ni bwasha, Umukasya waakhola nga n’aloma. Kimisame kimikali kimyeene kyengila mu lubili lwa Faraawo, ni muntsu tsye babaakaanisi beewe. Ni mu shibala she ba Misiri shoosi, sheetsula tsisame. 25Kila Faraawo arumanisa khuumulaangila Musa ni Aroni waabalomela ari, “Ni mutsye mwisaaye Wele weenywe, ne mumwisaayila ano mu Misiri.”
26Ne Musa wamukobolamo ari, “Seshinyalikha ifwe khukhwisaayila Wele mu Misiri ta. Khulwekhuuba ifwe kane khuwaaneyo tsisaayilo isi Umukasya tsitsiili she kumusilo isi ba Misiri. Ni khukhola shino nga ba Misiri baakhuloleleele, kane bakhukhupe ifwe kamabaale. 27Ifwe khuli ni khuukyeenda lukyeendo lwe biifukhu bitaru khuutsya mu mubiimbi, nio khuwaaneyo isaayilo nga Umukasya Wele weefwe ni kane akhulakile ifwe khuukhola.”
28Kila Faraawo amwiilamo aloma ari, “Kane ise imbalekhuule khuutsya khwisaaya Umukasya Wele weenywe mu mubiimbi. Ne singene imbafukiilise mutsye aleeyi ta. Ne nyoowa unoombelekho ise nio.”
29Lwanyuma Musa weelamo ari, “Bona nga n’indura ano indi, intsya khukhuloombela iwe isi Umukasya, indi kumukaamba tsisame tsikooranewo, khukhwaama khusi iwe, ni babaandu boowo, ni linaambo lwoowo lyoosi. Ne akhali ndi khanambaase ndi kumuluundi kuno singane ubawombese busa ta, ne kane ulekhuule babaandu batsye khukhwisaaya Umukasya.” 30Nashiryo Musa waarura isi Faraawo, waatsya waaloomba isi Umukasya. 31Umukasya waakaanila khuuloomba khwa Musa, aryo waarusawo tsisame khukhwaama khu Faraawo, ni khu bakaanisi beewe, ni khu baandu boosi, aalekha khubawo isame akhaba indweela iyarama ta. 32Ne ndi kumuluundi kuno nakwo, Faraawo waarama nga okesanisa shikili, waaloba khulekhuula babaandu khuutsya ta.