6
1Ne Umukasya waalomela Musa ari, “Ari kane ubone sheesi ise inakhola khu Faraawo. Khulwe bunyala bwase, kane Faraawo alekhuule babaandu baase batsye, khaba kane oole ni khuubatimisa busa khuurura mu shibala sheewe.” 26.2: Rak 17.1; 28.3; 35.11; Luky 3.13-15Ise niye Umukasya. 3Ise ni nabonekhela Iburayimu, nabonekhela Isaaka, naluundi naabonekhela ni Yakobo, ise nababonekhela nga n’indi Wele Umunyali uwa byoosi. Ne ise samweene sinabuula lisiina lyase isi nibo ta. 4Ise nakhola ikwangwaani ni nabo, nga imbalomela indi kane imbawe shibala sha Kanani, isi abe nibo bamenya nga babeetswa. 5Ni khuuminyisilakho ilala, ise naawuliile khukhwilootsa khwe ba Isiraeli, beesi ba Misiri balikho bakholisa buukulwa, nashiryo ise naashebuliile indakaano iyo. 6Ni nashiryo, lomela ba Isiraeli uri, “Ise ndi niye Umukasya, kane imbaruse mu khutaambisibwa khweesi balimo mu Misiri, imbaruse mu bukulwa bwaabwe. Kane nookesanise kamaani kamakali mu khubawonesa nga imba ba Misiri shitaambiso. 7Kane inywe mube babaandu baase, ni nase kane imbe niye Wele weenywe. Awo nio munyalise khuushimanya muri ise Umukasya Wele weenywe, niye ubarusile mu khutaambisibwa khwe ba Misiri. 8Kane imbayile inywe, imbawe shibala sheesi ise namala khaale khukhwitsuba ndi ikhaashiwe Iburayimu, Isaaka, ni Yakobo. Kane ise ishibawe shibe shisheenywe. Ise ndi niye Umukasya.”
9Musa waatsya waaboolela ba Isiraeli bibiindu bino byeesi Wele aamuboolela, ne baalekha khufukiilisa byeesi aloma ta, khulwekhuuba abe baweelemo khaale kamaani naluundi abe balikho babirisibwa buubi naabi.
10Kila Umukasya alomela Musa ari, 11“Tsya isi Faraawo umuyiinga wa Misiri, umulomele alekhuule ba Isiraeli batsye, barure mu shibala sheewe.” 12Ne Musa weelamo Umukasya nga aloma ari, “Ise ndi umuundu ukhamanya khuuwayo inganikha mu baandu ta! Ne waaboone uri ba Isiraeli baalobile khuurekeeresa bibyase, wambaasa uri umuyiinga wa Misiri, anyala waarekeeresa byeesi ise inoma?”
13Ne Umukasya waakanikha isi Musa ni Aroni, waabawa buurume khuuyilila ba Isiraeli ni Faraawo, naluundi waabalakila boombi khuumusa ba Isiraeli khukhwaama i Misiri.
Luruungo lwe lisaaye lya Aroni ni lya Musa
14Baaraangilisi be bikuuka baaba nibo bano: Rewubeni umusooleli wa Yakobo umukiboole, aaba ni babaana bano: Hanoko, Palu, Hesiloni ni Karimi. 15Simeoni umusooleli wa Yakobo aaba ni babaana bano: Yemweli, Yamini, Ohadi, Yakini, Zohari ni Shaulo, uwaba uw’omukhasi umu Kanani. 166.16: Bala 3.17-20; 26.57,58; 2 Kim 6.16-19Levi umusooleli wa Yakobo aaba ni babaana bano: Gereshoni, Kohasi ni Merari. Levi umweene aamenya woolisa kye buukhulu shitoondo shitweela ni kamakhumi kataru na musaafu (137). 17Basoleeli ba Gereshoni baaba nibo Libuni ni Shimeyi. 18Kohasi aaba ni basooleli bano: Amuramu, Isari, Heburoni ni Useli. Kohasi umweene aamenya woolisa kye buukhulu shitoondo shitweela ni kamakhumi kataru na kitaru (133). 19Basoleeli ba Merari baaba nibo: Mahali ni Mushi. Abo nibo be nda ya Levi, khuuloondekhana ni kimiboolo kyaabwe. 20Amurani aayila seenge weewe ulaangibwa Yosebedi, waamusaalamo babaana babili nga nibo, Aroni ni Musa. Amurani aamenya woolisa kye buukhulu shitoondo shitweela ni kamakhumi kataru na musaafu (137). 21Basooleli ba Isari baaba nibo: Kora, Nefeki ni Zikuri. 22Basooleli ba Useli baaba: Mishayeli, Elisafani ni Sitiri. 23Aroni aayila umukhasi isi balaanga bari Eliseba, umukhaana wa Aminadabu. Eliseba aasaala Nadabu, Abihu, Elieza ni Isamari. Eliseba aaba umukooko wa Nashoni. 24Basooleli ba Kora baaba: Asiri, Elukana ni Abiyasafu. 25Elieza umusooleli uwa Aroni, aayila mutweela khu bakhaana ba Putyeli, waamusaalamo Fenekasi. Ulwo nilwo luruungo lw’abo babaaba baaraangilisi be bikuuka be muunda iya Levi. 26Aroni ni Musa beene bano nibo beesi Umukasya aalomela ari, “Ni mutsye muruseyo ba Isiraeli khukhwaama i Misiri.” 27Nibo babaatsya baakanikha isi Faraawo umuyiinga uwa Misiri, bibiwaamba khu khurusayo ba Isiraeli mu Misiri.
Umukasya alakila Musa ni Aroni khuukanikha isi umuyiinga
28Khu shifukhu sheesi Umukasya aakanikha isi Musa nga ali mu Misiri, 29Umukasya aamulomela ari, “Ise niye Umukasya, boolela Faraawo umuyiinga uwa Misiri ibyo byoosi byeesi ise ikhuboolela iwe.” 30Ne Musa waakobolamo Umukasya nga aloma ari, “Iwe waamanya nga ise s’indi umukanikhi umulayi ta, kane Faraawo arekeerese byeesi ise inooma?”