22
Kamakaambila ke khukhwiiliyaasa
1“Umuundu ni eeba iyeeyi namwe lisheese ne waalikhoonya, namwe waalikulisa, ali ni khuuliha ni tsiyeeyi tsiraano. Ne lisheese ali ni khuuliha ni kamasheese kane. 2Umuundu n’anyoola umwiifwi nga waafunile intsu yeewe wengiilemo alikho eeba, ne waakhupa umwiifwi uyo waamwiira, s’abakho ni kumusaango ta.
3“Ne siinga umuundu uyo akhupa weera umwiifwi uwiitsile khukhwiiba waamwiira kumuusi, aba ali ni kumusaango.
“Umwiifwi aakha khuuliha byeesi ebile. Ne siinga aba nga s’ali na shiindu shoosi ta, baakha bamukulise umweene, ni kamapeesa bakaraambise khuuliha byeesi ebile. 4Shishaayo sheesi ebile ni bamunyoola nga ali ni nasho shishiili shilamu, oba ali ni iyeeyi namwe isikilya namwe lisheese, buli shitweela ali ni khuushiliyila kimiluundi kibili.
5“Umuundu n’alekha bibyaayo byeewe byaalya biilyo mu mukuunda kw’omuundu ukuundi, ali ni khuubukula khu bifuura buulayi khukhwaama mu mukuunda kweewe umweene, aliyile uyo uwe kumukuunda.
6“Umuundu n’awaambisa buuyi ne bwaatsya bwoosha biilyo bya beene mu mukuunda namwe byeesi baamala khaale khuubuunga, uwaambisile ali ni khuuliha umweene we biilyo bibyoonakisibwile.
7“Umuundu n’akhubiikhisa iwe ifeetsa yeewe, namwe bibiindu byeewe bibiindi, ne lwanyuma baabiiba khukhwaama mu ntsu yoowo. Ne umwiifwi n’anyoolikhana, ali ni khuubiliyila kimiluundi kibili. 8Ne ni balekha khunyoola umwiifwi ta, umweene uwe ntsu mweesi baabibiikha ali ni khukhwiitsa isi baakayi, okesanise oba niye uwibile bibiindu ibyo namwe ta.
9“Babaandu babili ni bakhaabisanila khu shiindu, oba iyeeyi, namwe isikilya, namwe lisheese, namwe shikwaaro, namwe shishiindu shoosi shishiiba nga shaakoraanile, nga buli mutweela aloma ari shili shisheewe, kumusaango kuno bali ni khuukureera isi baakayi. Uyo isi umukayi aba waakhaliile kumusaango khuumufuura, ali ni khuuliyila uwashe bibyoola kimiluundi kibili kye shishiindu isho.
10“Umuundu n’ayila wowashe isikilya, namwe iyeeyi, namwe lisheese, namwe shishaayo shoositsana khuumwaayisila, ne shaafwa, namwe shaakholikhakho shiindu shoosi, namwe shaakoraana baalekha khushibonakho luundi ta, 11ali ni khukhwitsubila uwashe mu lisiina ly’Omukasya ari niye mbaawo sheesi akholile khu shaayo isho ta. Umwene uwe shishaayo ali ni khufukiilila khukhwitsuba ukhwo, ni nashiryo s’aliyila umweene washo ta. 12Ne nga beebile shishaayo nga abe shili mu makhono keewe, ali ni khuuliyila umweene washo. 13Tsisolo tse mwirome ni tsibwakala shishaayo isho tsaashilya, ali ni khuureera bujulisi, nio alekhe khuliyila umweene we shishaayo ta.
14“Umuundu n’atsya wo washe waaloomba shishaayo ne shaafuna buwaangafu namwe shaafwa nga shili mu makhono keewe, ali ni khuuliyila umweene uwasho mu bwitsufu. 15Ne shishiindu ni shikholikha khu shaayo isho nga umweene uwasho aliwo, uyo ushiloombile s’amuliyila ta. Ni iba bari abe shishaayo shino baashipaangisile khuuraamba, kamapeesa abe keesi uyo aweeleyo, kaba kamala khuuliha.
Kamakaambila ke buulamu bwa busheele
1622.16: Maka 22.28,29“Umusaani siinga awooya umukhaana isi bashiili khuselela ta, wetubaasa ni naye, ali ni khuuwaanayo bye khuukhwa, umukhaana uyo ekyele umukhasi weewe. 17Ne paapawe w’omukhaana uyo n’aloba khuuwa umusaani uyo umukhaana weewe, umusaani uyo ali ni khuuwaanayo bye khuukhwa isi bawaanayo khulw’omukhaana uuli indungubaasi.
1822.18: Maka 18.10,11“Umuundu yeesi uuli umulosi ali ni khukhwiiribwa.
1922.19: Lev 18.23; 20.15,16; Maka 27.21“Umuundu yeesi uwaamba shisolo waakona nasho nga umuseetsa namwe umukhasi weewe, ali ni khukhwiiribwa. 2022.20: Maka 17.2-7 Umuundu uwaanayo biwaanwa isi ba wele babaandi, waalekha khuwaanayo isi Umukasya ta, uyo ali ni khukhwiiribwa.
2122.21: Luky 23.9; Lev 19.33,34; Maka 24.17,18; 27.19 “Mbaawo khuubirisa buubi namwe khuumiinilisa umwiitswa ta. Khebulila muri nanywe mwabeene mwaba babeetswa mu Misiri.
22“Banamulekhwa ni baafuubi mukhababirisa buubi ta. 23Ni mubabirisa buubi, ne baandilila ise nga bakana buyeeti, kane imbatimiilile imbayeete. 24Lirima lyase kane libe liikali naabi, ni nase kane niire basaani musiinywe, nio akile bakhasi baabwe nabo bekyele banamulekhwa, ni babaana baabwe bekyele baafuubi.
2522.25: Lev 25.35-38; Maka 15.7-11; 23.19,20 “Nga wekopisile mutweela khu baandu baase uuli umutaambi kamapeesa, ukhamuloma khuukhukoboselakho ni kamafuurisa ta. 2622.26: Maka 24.10-13 Umuundu nga waakhuweele shikwaaro sheewe khuuwaambilila ari nio umwikopese kamapeesa, uli ni khuushimwiisilayo nga antsye bushiili khukhwilabula ta. 27Khulwekhuuba isho nisho sheesi ebiimba mu shilo. Ne busa aba kane ebiimbe shiina? Nga umuundu uyo waalilile isi ise ndi, kane ise imwiilemo, khulwekhuuba indi uwe shiisa.
2822.28: Bur 23.5 “Mbaawo khuukanikhatsaka buubi khu Wele, namwe khuutsuba abo babaali baawuli boowo ta.
29“Muli ni khuuyubakho khukhuumba ise biwaanwa bibyaama mu likyesa lyeenywe ni bibyaama mu vini yeenywe.
“Umwaana umukiboole uwesiinde muli ni khuumuwaanayo isi ise. 30Mwaakha mukhole shishiindu sheene nisho shitweela khu byaayo byeenywe ni kamasheese keenywe, khuuwaanayo bikiboole isi ise. Ne muli ni khuubilekha khuumala biifukhu musaafu nga bili ni maawaabwe, nio khu shifukhu she shinaane mubiwaaneyo isi ise, Wele weenywe.
3122.31: Lev 17.15 “Muli ni khuuba babaandu baase baarobore, babaali bakhosefu isi ndi. Ni nashiryo mukhalya inyama iye shishaayo sheesi isolo iye mwirome yirire busa ta, muli ni khuukiwa tsiimbwa tsikilye.”