17
Kameetsi khukhwaama mwibaale
(Khuubala 20.1-13)
117.1: Bala 20.2-13Lwanyuma lituuli lye ba Isiraeli lyoosi lyenyukha khukhwaama mu mubiimbi kwe i Siini, beelooselayo khuutsya mbola nga bakonela ano ni nawo. Baakhola shino khuuloondekhana ni byeesi Umukasya aabalakila khuukhola. Baatsya baakonela mu shifwo shishilaangibwa shiri Refedimu, ne abe mu shifwo isho mbaamo kameetsi keesi banyala baanywa ta. 2Nashiryo babaandu baarakikha khukhwiŋuluŋuunya isi Musa nga bamuloma bari, “Khuwe kameetsi khunywe.” Ne Musa waabareeba ari, “Shiina kila mulikho mwiŋuluŋuunya isi ise? Shiina kila mulikho mukhakilisa Umukasya?”
3Ne abe babaandu buulesa bwaabakhaasile, nashiryo beeloosela khukhwiŋuluŋuunya isi Musa nga bamulomela bari, “Musa, shiina kila iwe wakhurusa ifwe ni babaana beefwe, ni bibyaayo byeefwe, khukhwaama i Misiri, waakhureera ano uri khufwe buulesa?”
4Aryo Musa waaloomba isi Umukasya nga aloma ari, “Umukasya, kane ise ikhole indyeena babaandu bano? Bali aambi khukhuukhupa ise kamabaale bantsire!”
5Umukasya weelamo Musa waamulomela ari, “Roboramo baaraangilisi batweela khukhwaama mu baandu, mukyeende mwilooseleyo ibweeni we babaandu. Aamba imiimbo isi waraambisa khuukhupa luluutsi Nayilo, utsye ni nayo. 6Shimanye uri, ise kane imbe neemikhile khu lwaanda khu lukiingi Sinaayi17.6 Sinaayi: Lisiina lino alala lyamanyikhaa nga Horebu. Kane uwaambe imiimbo yoowo, ukhupe khu lwaanda, kane kameetsi kaamemo babaandu banywe.” Musa waakhola shino nga baaraangilisi be babaandu ba Isiraeli baliwo baaboone. 7Nashiryo Musa waatwiikha shifwo shino ari Masa ni Meriba17.7 Masa ni Meriba: Kamasiina kano mu Luheburaniya kamanyisa “Khuukhakilisa” ni “Khukhwiluŋuunya”, khulwekhuuba ba Isiraeli beŋuluŋuunya, naluundi baakhakilisa Umukasya nga bereeba bari, “Ne ilala, Umukasya ali ni nafwe namwe ta?”
Ba Isiraeli bawula ba Ameleki mu busoolo
8Nga ba Isiraeli bali i Refedimu, ba Ameleki baabebwakala. 9Nashiryo Musa waalomela Yoswa ari, “Roboramo basoolani, kumukaamba mutsye musoolanise ba Ameleki. Kumukaamba, ise ikhaatsye niimikhe khu lukiingi, nga naawaambile imiimbo ya Wele mu mukhono kwase.”
10Nashiryo Yoswa waakhola nga Musa n’amulakila, waatsya waasoolanisa ba Ameleki. Ne Musa ni Aroni, ni Huru, baaniina khu lukiingi khu ngaaki. 11Abe buli lweesi Musa enyusila kamakhono keewe angaaki, ba Isiraeli bawula ba Ameleki, ne abe buli lweesi Musa akwiisila kamakhono keewe aasi, ba Ameleki bawula ba Isiraeli. 12Ne kamakhono ka Musa ni koola khuufwiilila, baabukula libaale baamuwa khukhwikhalakho. Aroni ni Huru, nga baamwiimilekho iyi ni neeyi, baarama nga baawaambiliile kamakhono keewe angaaki. Kaarama mu shifwo shitweela khukhwoolisa inyaanga ni yakwa. 13Musaambo iyo, Yoswa waawula ba Ameleki mu busoolo, nga abeeraka boosi.
1417.14: Maka 25.17-19; 1 Sam 15.2-9Lwanyuma Umukasya waalomela Musa ari, “Bibiindu bibibeelewo mu khuwula buusoolo buno, birone mu shitabo. Naluundi ulooselekho sheesi ise isuubisa nga inooma ndi, babaandu ba Ameleki abo kane ise imbahesele ilala bawewo khu shibala, ilekhe khubawo umuundu ulibashebulila ta. Lwanyuma bibiindu bino ubisome mu likono lye angaaki Yoswa abiwulile.” 15Kila Musa ombekha shisheeso, waashilaanga lisiina ari, “Umukasya niye ibendela yase, uwunyalisile ise, khuuwula mu busoolo.” 16Musa waashisontsoola ari, “Khulwekhuuba mu busoolo ubwo, ise neyikina Umukasya! Ne Umukasya akhaasoolanisatsake ba Ameleki mu busoolo, khukhwaama mu muboolo mutweela khukhwoolisa khu muboolo kukuundi.”