11
Shitaambiso shimaliilisi ni Khuubirakho
Musa areewula ba Misiri
1Umukasya waalomela Musa ari, “Indi khuutsya khureera khu Misiri shitaambiso shishiindi shitweela shonyene, shiimaliilisi. Lwanyuma lwe shitaambiso isho, kane Faraawo abalekhuule inywe mutsye. Ilala kane abatimise busa khuurura mu Misiri. 2Ari tsya ulomele ba Isiraeli khuutsya khuloomba babeesanwa baabwe babaali ba Misiri, khuubawakho izaabu ni ifeetsa.”
3Kila Umukasya akhola kimyoyo kye ba Misiri khuuba kimilayi isi ba Isiraeli. Naluundi, Musa abe ali umuundu uwe shiriifwa naabi mu Misiri mwoosi, ikhaba isi baaraangilisi be mu Misiri.
4Musa waatsya waalomela Faraawo sheesi Umukasya atsya khukhola, nga aloma ari, “Nga aambi shiilo khukari, Umukasya atsya khubira mu Misiri. 5Na buli oosi mu Misiri isi abira, kane buli mwaana umusooleli uwasaalikha nga umukiboole, buli aandu oosi, afwe. Khukhwaamila khu mukiboole uwa Faraawo uwikhala khu shitsoloŋo sheewe, ni khukhwoolela ilala khu mukiboole uwe baraambi be aasi. Ikhaba shiikiboole shiseetsa sha buli shaayo nasho kane ifwe. 6Nio shikile ibewo luwuungu luukali mu Misiri, lulukhabatsakawo ta, naluundi lulukhalibatsakawo luundi ta. 7Ne mu ba Isiraeli, siikhaabeyo buwaangafu bwoosi namwe khuulila ta. Ikhaabeyo khuusila khuukali, ilekhe khubayo ikhaba imbwa yonyene khuusama ta. Nio shino shikile inywe mumanye muri Umukasya awukhanisawo akari e ba Misiri ni ba Isiraeli. 8Kane abo babaali baawuli atweela ni nawe mu Misiri, beetse isi ise ndi baantsinamile, nga baantsikoontselela khuurusa ba Isiraeli mu shibala sheenywe. Lwanyuma lwebyo, ise ikhaaraangilile babaandu baase khuurura mu Misiri.”
Lwanyuma nga Musa wetsuule lirima, waakyeenda waarurawo isi Faraawo, waatsya.
9Kila Umukasya alomela Musa ari, “Faraawo singene arekeerese byeesi iwe uloma ta. Shino kane shikile bye kamakaanga byase biloosele busa buukali mu Misiri.” 10Musa ni Aroni baakhola bye kamakaanga byoosi bibyakanibwa mu moni tsa Faraawo. Ne Umukasya waakila kumwoyo kwa Faraawo kwaaba ni shikili, waalekha khulekhuula ba Isiraeli khuurura mu Misiri khuutsya ta.