10
Shitaambiso she Tsisike
1Umukasya waalomela Musa ari, “Kobolayo isi Faraawo ni babaandu beewe, khulwekhuuba baaminyaaliile ise, nio shikile ikhole bye kamakaanga bino byoosi mu shibala shaabwe. 2Shino shakholikhile nio shikile inywe muboolele babaana beenywe bye kamakaanga bino, ni saambo isi ise imbirisilemo ba Misiri. Nashiryo kane boosi bamanye bari ise ndi Umukasya.”
3Nashiryo Musa ni Aroni baatsya isi Faraawo baamulomela bari, “Umukasya Wele uwe ba Heburaniya alikho areeba ari iwe kane woolise liina nga winiinisila mu moni tseewe? Nga s’ukana waaba umuwolu ta? Bari lekhuula babaandu beewe batsye nio banyalise khuumwisaaya. 4Khulwekhuuba nga waalobile khuubalekhuula, kumukaamba Umukasya akhaasiindikhe tsiisike tsiibwakale shiibala shoowo shoosi. 5Kane tsibe buli aandu nio akile mulekhe khubona ni liloba ta. Kane tsilye bilimwa byeesi kamararara kaalekha khukhwoonakisa ta, tsilye ni bisaala byoosi. 6Kane tsitsule mu lubili lwoowo, ni muntsu tsye baaraangilisi be mu buwuli bwoowo, ni tsye ba Misiri boosi. Kane tsibe mu bukali bweesi ikhaba bakuuka boowo bakhaabonakho ta.” Lwanyuma Musa waarura mu lubili waatsya.
7Kila baaraangilisi mu buwuli bwa Faraawo bamulomela bari, “Uwe lukoosi, kane ifwe khwikhaliilikhe umusaani yuno ni biwaangafu byeesi akhureerera ifwe khukhwoolisa liina? Shiina kila ukhalekha babaandu bano baatsya besaaya Umukasya Wele waabwe? Iwe s’ubona uri Misiri yoonakisibwile ta?”
8Kila umuyiinga arumanisa balaanga Musa ni Aroni bakobola, waabalomela ari, “Ari naabafukiilisile ni mutsye mwisaaye Umukasya Wele weenywe. Ne khuunyoowa ingana imanye abo babaali khuutsya.” 9Musa welamo ari, “Buli mutweela ali ni khuutsya, baahele ni baasakhalu beene. Khuli ni khuutsya ikhaba ni bibyaayo byeefwe byoosi, khulwekhuuba khuli ni khuukhola kamayiiya nga khwisaaya Umukasya.”
10Kila Faraawo amwiilamo nga abatyaabila ari, “Ise niitsubila ilala ndi, siindibafukiilisakho na lutweela mutsye ni baakyelama beenywe atweela ni babaana ta! Lwekhuuba shibonekha lubuula shiri, mulikho murekekha bisaayuumba 11Nga mukana khukhwisaaya Umukasya, yila basaani bonyene, khulwekhuuba isho nisho sheesi mukana.” Kila batimisa Musa ni Aroni khuurura isi Faraawo.
12Umukasya waalomela Musa ari, “Yinyusa kumukhono kwoowo khu Misiri. Kane nga waakholile uryo tsiisike tsiibwakale Misiri yoosi, tsilye buli shiindu shoosi sheesi kamararara kalekhile.” 13Nashiryo Musa wawaamba imiimbo yeewe waakyokeselela khu Misiri, waakila Umukasya waasiindikha ikhuungu yaawuutsa mu Misiri mwoosi kumuusi ni shiilo, nga yaama ibwaamanyaanga. Bwatsya khusya kumutikhinyi, nga tsiisike tsyetsuule buli aandu oosi. 1410.14: Bimb 9.2,3Tsisike tsaaba nga tsyetsuule buli aandu, ni babaandu mu Misiri abeele bashiili khubonatsakho tsiisike tsingali nga tsino ta. Naluundi siyaabatsakawo tsiisike tsingali nga tsino tsiri mu Misiri luundi ta. 15Tsyakwa buli aandu khu shibala shoosi, shaamaliha busa. Tsaalya bilimwa byoosi ni n’ebyo bibyaanakho bye khuulya, byeesi abe kamararara kaalekhawo. Mbaawo kuusaala, namwe shiilimwa, namwe lunyaasi lulwarama mu Misiri ta. 16Kila Faraawo alaanga Musa ni Aroni mu bwaangu naabi, abalomela ari, “Ise noonakile isi Umukasya Wele weenywe, ni isi inywe mwabeene. 17Nashiryo, ise naabekoontseleele, ndi ni munoombele isi Umukasya Wele weenywe kumuluundi kukuundi, aakamise tsiisike khukhwoonakisa bibiindu.”
18Nashiryo Musa waarura mu lubili lwa Faraawo, waatsya khuloomba isi Wele. 19Kila Umukasya asiindikha ikhuungu iye kamaani khukhwaama ibukwanyaanga, yaawuutsa tsiisike tsoosi, yaatsimalila mu Nyaantsa isi balaanga bari Imbesemu. Mbaawo ikhaba isike na ndweela iyarama mu Misiri ta. 20Ne Umukasya waakhola kumwoyo kwa Faraawo khuuba kwe shikili, waakila waalekha khulekhuula babaandu ba Isiraeli khuutsya ta.
Shitaambiso she Shishiilima
21Kila Umukasya alomela Musa ari, “Kolola kumukhono kwoowo ukuloselele mu ngaaki, nio ibewo shishiilima shikali shimaliyise Misiri yoosi.” 2210.22: Zab 105.28; Bimb 16.10Aryo Musa waakolola kumukhono kweewe khuukuloselela mu ngaaki, waakila abawo shishiilima shikali naabi mu Misiri yoosi, khuumala biifukhu bitaru. 23Mu mbuka yino yoosi, ba Misiri baalekha khubona bashaabwe ta, namwe baalekha khurura mu ntsu tsaabwe ta, khuumala biifukhu bitaru. Ne ba Isiraeli isi baaba yaba iliyo buwaanga.
24Kila Faraawo alaanga Musa waamulomela ari, “Ni mutsye mwisaaye Umukasya. Ni mutsye ni babaana beenywe boosi, akhali singene mutsye ni bibyaayo byeenywe ta.”
25Ne Musa waamwiilamo ari, “Ne mbo shikanibwa ifwe khuuwaanayo isaayilo ni bye saayilo iye khukhwoosha, nga khwisaaya Umukasya Wele weefwe. 26Ni bibyaayo byeefwe byoosi khuli ni khuutsya ni nabyo, mbaawo sheesi khulekha inyuma ta. Khulwekhuuba ni nabyo bili ni khukhwisaaya Umukasya Wele weefwe. Ifwe sikhumanya bibikanibwa mu khwisaaya Umukasya ta, akhali khukhwoolisa nga khwoolileyo.”
27Ne Umukasya waakhola kumwoyo kwa Faraawo khuuba kwe shikili, waakila waalekha khulekhuula babaandu ba Isiraeli khuutsya ta. 28Kila Faraawo alomela Musa ari, “Indurewo utsye! Ukhakhakakho waakobola isi ndi luundi ta. Waamala waakobola ano, kane ufwe.” 29Musa waamwiilamo ari, “Ilala nga n’ulomile, iwe singene umbonekho ise luundi ta.”