Swahili Bible2

3

Ruse anyoola umuseetsa

1Shifukhu shitweela, Nawomi waalomela Ruse ari, “Mukhaana wase, ari imbuka yoolele ise khuukhufunilayo umuseetsa uukane akhulolelele, nawe ube ni muungo. 2Ne shebulila Bowazi umweene mukuunda mweesi ubeelatsakile ni bakhaana babaamuraambila, nga wangala bikala; ali umulebe weefwe. Angoloobe e shaleelo ano, atsya khuwuula seyiri mu liwuulilo lyeewe. 3Ari nawe ngana wisiinge buulayi, wiyakhe kamafura, ukwaare tsingubo tsoowo tsitsifuura buulayi. Lwanyuma utsye isi anaraambila shaleelo, ne singana niye waakhubonakho ta, khukhwoolesa nga waamalile khuulya ni khuunywa. 4Ngana iwe wimenielese buulayi isi atsya khukona mu shilo shino. Nio nga waakonile, utsye winyuse shishibiimbo sheewe i bikyele, winjilemo ukone abikyele. Ni naye lwanyuma kane akhuboolele shiina she khuukhola.”

5Kila Ruse elamo ari, “Ise kane ikhole byoosi byeesi ulomile.” 6Aryo wenyukhilamo waatsya isi liwuulilo mweesi Bowazi aaba araambila, waatsya waakhola buli shiindu shoosi sheesi maayi masaala weewe Nawomi aamulomela khuukhola.

7Ari nga Bowazi waamalile khuulya ni khuunywa, nga wetsuule isangaalo, waatsya waakona liilo aambi ni shiyuuyi sha seyiri. Ruse naye weetsa nga asoota mbola, wenyusa shishibiimbo, waakona aambi ni bikyele byeewe. 8Nga yoolele shiilo khukari, Bowazi aaba ashuukha ari, weyaanga khuubona nga iliyo umukhasi uwaba waakonile aambi ni bikyele byeewe. 9Kila amureeba ari, “Iwe naanu?”

Ruse weelamo ari, “Musakhulu, ise umukhaana woowo Ruse. N’ubalaayise shishibiimbo shoowo umiimbekho, lwekhuuba iwe niye umulebe wase uuli ni khukhuundoleelela ise.”

10Bowazi weelamo ari, “Umukasya akhuwe ikhabi namukhaana. Iwe wokyesanisile ikifunisi ingali khuufuura iyanyoowa isi wakholela maayi woowo umumasaala. Lwekhuuba khali waatsiile khukhwiweentsela basooleli, khababe bayiindifu namwe bataambi. 11Shikila ari, ukharya ta namukhaana. Ise kane ikhukholele shoosi sheesi uloombile. Lwekhuuba babaandu boosi be mu shiirimba baamanya bari iwe uli umukhasi uwe lukoosi naabi. 123.12: Ruse 2.20Shili sha ŋali shiri ise ndi umulebe, ne iliyo umulebe ukuundi uuli aambi naabi khuufuurakho ise. 13N’urame ano khukhwoolesa kumutikhinyi, khubone noola waafukiiliile khuuyila ikifunisi iy’omulebe khuukhulolelela iwe, kane shibe shilayi. Ne noola ta, ise ikhwitsubila mu lisiina ly’Omukasya ndi, ise kane noolelese ikifunisi iyo. Nashiryo n’ukone ano khukhwoolesa kumutikhinyi.”

14Aryo Ruse weelayo waakona aasi, ne antsye bwatsya khusha kumutikhinyi mu mamilimili, aaba wenyukhile khaale, lwekhuuba Bowazi aamulomela ari, ikhabawo umuundu ushimanyakho ari yabawo umukhasi uweetsawo ta. 15Bowazi waamulomela ari, “Reera ano ingubo isi webiimbilile, ukibalaayise.” Bowazi waamutsukhilamo bipimo bya seyiri waakitsusa, waamala waakimwityuukhisa. Lwanyuma Ruse wenyukha waakobolayo mu shiriimba. 16Nga woolele ingo, maayi masaala weewe Nawomi waamureeba ari, “Bikhutsiiliile biryeena mukhaana wase?”

Ruse naye waamusontsoola byoosi byeesi Bowazi aamukholela. 17Waalooselakho ari, “Bowazi ambeele bipimo bino bya seyiri khuukhureerera, lwekhuuba s’akanile ise ingobole is’uli nga s’indi na shiindu ta.”

18Nawomi waamuboolela ari, “Yinyindaalila uliindekho ubone shishinakholikha, ukharya ta, mukhaana wase. Lwekhuuba umusaani uyu s’akane awole ta, khukhwoolesa nga ilomo iyi yaaweele shaleelo shino.”