Swahili Bible2

1

Elimeleki ni be muungo mweewe batsya i Mowabu

1Mu biifukhu byeesi Baakayi baaba nga nibo baawuli, yabawo intsala ngali khu shaalo. Umusaani mutweela uwe Beselehemu she mu Yuda, atweela n’umukhasi weewe, ni basooleli beewe babili, baawuuya baatsya khuumenya mu shibala sha Mowabu. 2Lisiina ly’omusaani uyo abe bari Elimeleki, nily’omukhasi weewe abe bari Nawomi, ni basooleli beewe babili abe bari Maloni ni Kiliyoni. Bano boosi baaba be mu shikuuka sha Efuraasi, mu Beselehemu she mu Yuda. Baryo baatsya i Mowabu baamenyatsaka iyo. 3Elimeleki waafwa waalekha Nawomi atweela ni basooleli beewe boombi. 4Basooleli bano baayila bakhasi ba Mowabu. Abe lisiina lya mutweela bari Orupa, nily’okuundi bari Ruse. Ne lwanyuma lwe kimiiko likhumi khuubirawo, 5Maloni ni Kiliyoni nabo baafwa. Aryo Nawomi waarama yenyene busa nga s’ali ni babaana namwe n’umuseetsa ta.

Nawomi ni Ruse bakobolayo i Beselehemu

6Lwanyuma Nawomi waawulila bari Umukasya waawa babaandu beewe tsikhabi, nga abawa kumusalo kwe biilyo, kila niye ni bakhaana beewe baamasaala beŋoonaŋoona khuurura mu Mowabu, beeleyo mu Yuda. 7Aryo niye ni bakhaana beewe baamasaala boombi, baasimama lukyeendo khukhwaama mu shiifwo mweesi baaba bamenya, baawaamba intsila ibayila khukhwoola mu shibala sha Yuda.

8Nawomi waalomela bakhaana beewe baamasaala bano ari, “Inywe buli mutweela naakoboleyo ingo weewe, atsye amenye ni maayi weewe. Ise imbaloombela ndi khali Umukasya abawaambiile inywe shiisa, nga nanywe ni mwaba be shiisa isi baseetsa beenywe ni isi nase. 9Umukasya abawe inywe mweembi tsikhabi, buli mutweela anyoole umuseetsa ukuundi, abe ni muungo.”

Aryo Nawomi waabakwa mu shifuba, nga abasibula. Ne nibo baalila kamasika, 10nga baloma bari, “Ifwe khukana khuutsya ni nawe, khumenye ni babaandu boowo.”

11Ne Nawomi waabeelamo ari, “Bakhaana baase, inywe nimwiileyo iweenywe. Lwashiina inywe mukana khuutsya ni nase? Inywe mwambaasa muri ise ndi kane isaaleyo babaana babaandi babanyala khuubayila inywe babe baseetsa beenywe? 12Inywe ni mukoboleyo ingo weenywe bakhaana baase, lwekhuuba ise ari ndi umuloosi naabi, naabirisawo imbuka iye khuuba n’umuseetsa ukuundi. Ne abe yakhaba nga ishiiliyo ni khuusuubila, naaba n’umuseetsa mweene shiilo shino, naasaala babaana basooleli babaandi, 13munyala khuubaliinda baatsowa baabayila inywe? Inywe munyala mwaamenya busa khuubaliinda nibo? Taawe bakhaana baase, ise kumutaambo kumaamba naabi khulweenywe, khuubona nga Umukasya waayimikha khuusoolana ni nase.”

14Baryo ndi baalila luundi kamasika. Orupa niye waakwa masaala weewe mu shifuba waamusibula, weelayo iwaabwe. Ne Ruse niye waamwiibowakho. 15Kila Nawomi alomela Ruse ari, “Bona wangooyo weelayo iwaabwe isi babaandu beewe ni isi ba wele beewe! Nawe lwashiina ukhatsya ni naye?”

16Ne Ruse waamwiilamo ari, “Ukhaantsikoontselela ise khuukhulekha iwe ta, namwe bari niileyo iweefwe ta. Isi kane utsyatsake, nase niyo isi kane intsyatsake, isi kane ukonatsake, nase niyo isi kane ingonatsake. Babaandu boowo kane babatsake babaandu baase, ni Wele woowo, kane abatsake Wele wase. 17Isi utsya khufwiila, nase niyo isi ikhaafwiile, nase isiikhibwe ibweene iyo aambi ni nawe. Umukasya khali ambeele ise shitaambiso, niibawo shishiindu shoosi shishinyala khukhuuntsawukhanisa ise ni nawe, akhali khuufwa.”

18Ne Nawomi n’abona nga Ruse waakhaliilewo ilala khuutsya ni naye, waakamisa khuumuloma ari eleyo iwaabwe.

19Baryo baatsya boola i Beselehemu, ne nga booleleyo shiriimba shoosi shaasangaala lwe khuubabonakho. Kila bakhasi babaaba bamenya ibweene iyo bereeba bari, “Ne nga ilala uyu niye Nawomi?”

20Lwanyuma kila Nawomi abeelamo ari, “Mukhanaangakho luundi muri Nawomi ta. Ari munaanga muri Mara1.20 Mara: Mara shimanyisa khuululuwa, buulamu bwa Nawomi bwaba bwaaluluwa, lwekhuuba Umunyali wa byoosi, waayikholela ise bibiluluwa byoonyene. 21Ise ni naama ano, naatsya nga ndi na buli shiindu, ne ari bona nga Umukasya n’angobosile, waangobosile busa. Ari lwashiina munaanga muri Nawomi? Umukasya waayishuukhakho, waakhola buulamu bwase khuuba buululu naabi.”

22Baryo Nawomi n’umukhaana weewe umumasaala uwe Mowabu, imbuka isi boolela i Beselehemu, boola khu mbuka iye likyesa lya seyiri1.22 Seyiri: Seyiri byaba biilyo bye Bayudaaya bibiili nga iŋaano, mweesi baamisatsaka buufu nga lilikho lirakikha.