Swahili Bible2

9

Khuusiima Wele

1O Umukasya, kane ise ikhusiimatsake iwe ni kumwoyo kwase kwoosi.

Kane ise imboolelesatsake buraambi bwoowo buulayi bwe kamakaanga bwoosi.

2Ise kane nikhoyatsakile luundi niitikitilatsakile mwiiwe,

kane niimbatsake kimyeenya khuubuyilisa lisiina lyoowo,

Iwe uli angaaki luukali.

3Iwe nga waabonekhele, baasiku baase batima belukha,

baakwa aasi luundi baahela.

4Lwekhuuba iwe mu khukhala kimisaango khwoowo uli uwa ŋali;

wikhala khu shitsoloŋo shoowo waakhala kimisaango mu bwa ŋali

washifuumbula uri ise siindikho ni kumusaango ta.

5Iwe wakhookhela babaandu be kamanaambo, waahesa abo babaali baboonaki;

singene bamanyikhanekho luundi biilo ni biilo ta.

6Baasiku beefwe baweelelewo ilala biilo ni biilo;

waasambulakile biriimba byaabwe,

singene abewo ubashebulila luundi ta.

7Ne Umukasya niye ali Umuyiinga biilo ni biilo;

waarekekhawo shitsoloŋo sheewe khweesi akhalila kimisaango.

8Niye awula shibala shoosi mu bukwalaafu,

akhalila kamanaambo koosi kumusaango mu bwa ŋali.

9Umukasya niye Lumako luwaangafu lulweene lw’abo babaakubyeengebwa,

niye isi belukhilayo mu mbuka iye bikosi.

10Ni naabo babafukiilila mwiiwe, O Umukasya, bakhwiyikina iwe,

lwekhuuba iwe siwayantsukhakho abo babeetsa is’uli ta.

11Ni mwiimbe nga muruuya Umukasya, niye uwikhala mu Sayuuni!

Ni muboolele kamanaambo koosi buraambi bweewe buulayi!

12Lwekhuuba Wele ashebulila abo boosi babataambisibwa;

niye s’ebilila khuulila khwaabwe ta,

naluundi awa shitaambiso abo babaabakholakho buubi.

13O Umukasya, n’umaambile ise shiisa,

n’ubone isaambo isi abo babaambiyila baantsiinisamo,

n’umbonese ise indekhe khuutsya imakoombe ta.

14Nio nase inyale khukhwiimikha khu ngaaki ni khuuruuya lubuyi lwoowo

akari mu baandu be mu Yerusalemu.

Inyale khukhwikhoya lwekhuuba iwe wambonesele ise.

15Babaandu be kamanaambo bakwiile mu malowo keesi babeene bayaba,

bawaambikhiile mu mireko kyeesi babeene baareka.

16Umukasya umweene weyokesaniile mu khukhala kimisaango mu bukwalaafu,

ni babaandu baabi bawaambikhiile mwiibyo byeesi babeene baakhola.

17Babaandu baabi boosi, ni naabo babekaana Wele,

baliitsya mu khuhela.

18Ne bataambi niye alibashebulila biifukhu byoosi,

ni kumwiyikino kweesi babaandu be aasi bali

ni nakwo singene kuwewo ta biilo ni biilo.

19Yinyukha, O Umukasya, ukhalekha babaandu baakhulekelesa baryo ta;

reera babaandu be kamanaambo koosi mu moni tsoowo ubakhalile kumusaango.

20O Umukasya, n’ubariise!

Lekha babaandu bamanye bari nibo bali babaandu buundu busa.