Swahili Bible2

7

Khuuloomba isi Wele khw’omuundu utaambisibwa

1O Umukasya Wele wase, ise nilukhila is’uli;

n’umbonese ise khukhwaama isi abo babaaweentsa khukhuuntsira ise,

naluundi unduse mu bukosi

2nio balekhe khukhuundyenuulakamo ise nga italanyi n’ikhola sheesi ilya ta,

naluundi balekhe khukhuumbila isi bakana

nga mbaawo unyala khukhuumbonesa ise ta.

3O Umukasya Wele wase,

noola iliwo shishiindu sheesi nakhola nga shino,

noola iliwo shiibi shoosi sheesi ise nakhola,

4noola iliwo musaale wase yeesi isi ise nalyamo luwomelo,

namwe noola nga iliwo umusiku wase isi natsiinisa

nga mbaawo ilomo yoosi ta,

5lweesho khayo baasiku baase baandimise bamaambe,

baasambakilile aasi luundi baantsire,

baryo baandekhe nga naakalamiliile busa mwifukhuulu.

6O Umukasya, yinyukha ni lirima lyoowo liikali usoolanise baasiku baase;

O Wele wase, siisimukha unjeete!

Iwe wamweene lakila uri abewo bwa ŋali mu khukhala kimisaango.

7Lekha babaandu boowo be mu manaambo koosi babusane bakhwibotokhelele iwe,

uryo ube umuwuli waabwe boosi nga uli khu shitsoloŋo shoowo mu ngaaki.

8O Umukasya, iwe niye umukayi we babaandu boosi,

uryo n’ungaye ise, nga bukwalaafu bwase ni buli,

naluundi iwe waamanya uri ise s’indikho kumusaango ta.

97.9: Bimb 2.23Iwe uli Wele umukwalaafu wimenielesa kimyoyo ni bibyambaaso,

n’umalewo buubi bwe baboonaki,

ne abo babaali bakwalaafu ubawandalase.

10Wele niye ingabo yase mweesi nibisa,

niye awonesa uyo uwe kumwoyo kumulayi.

11Wele niye umukhali we kimisaango uwaŋali,

buli busheele ekiitsa baabi.

12Ne babaandu baabi ni balekha khukhwibiiyisa ta,

Wele kane awakale lurima lweewe;

waafuumbile buyiingo bweewe waaburekekhelele khuulasa;

13luundi waarekekhele bye busoolo byeewe bibihesa,

waarekekhele buyiingo bweewe bwe kumulilo.

14Ni mubone nga babaandu baabi ni bambaasa khuukhola buubi,

betsuule bibyambaaso bye bumoyaani,

luundi bibisaala bubeeyi.

15Barekekhela bashaabwe kimireko nga bayaba kamalowo,

ne babeene ndi bashuukha baakakwamo.

16Bumoyaani bwaabwe bushuukha bwaabakobolela babeene,

ni buutsiina bwe bituluungu byaabwe bubakobolela nibo.

17Ise kane isiimatsake Umukasya lwekhuuba niye ali uwaŋali,

naluundi kane ise niimbatsake kimyeenya kye khuuruuya lisiina ly’Omukasya,

niye uli angaaki luukali.