Swahili Bible2

5

Khuuloomba buyeeti khukhwaama isi Wele

1Rekeeresa bilomo byase, O Umukasya,

n’ureyo kumwoyo isi khukhwilootsa khwase.

2Rekeeresa khuulila khwase unjeete,

iwe Wele wase luundi Umuyiinga wase,

lwekhuuba ise nareerire khuulila khwase isi uli.

3O Umukasya, kumutikhinyi uwulila likono lyase;

antsye nga bwasheele ise imbaanayo khuuloomba khwase,

lwanyuma naaliindilila sheesi kane untsilemo.

4Lwekhuuba iwe s’uli Wele uwikhoyela bubwoonaki ta,

naluundi s’ufukiilila bubwoonaki bwakhwiitsa aambi ta.

5Iwe s’ufukiilila abo babeyiinga khukhwiitsa is’uli ta,

naluundi iwe ubiyila abo boosi babaakhola bye bubwoonaki.

6Iwe woonakisa abo boosi babaakanikha bye bubeeyi,

ulekelesa abo babaali be bituluungu naluundi be tsimbomelo.

7Ne ise, khulwe khuukana khwoowo khuukali,

kane ninjilatsake mu ntsu yoowo,

indyo ikhwisaayile iwe mu Lisaayilo lyoowo Likhosefu,

ni khuukhurya iwe khuukali.

8O Umukasya n’unaangirire ise khuukhola byeesi iwe ukana,

lwekhuuba baasiku baase bali baakali;

n’ungwalaasile kumukhoosi kwoowo ingukyeendatsakilemo.

95.9: Roma 3.13Lwekhuuba byeesi baasiku baase baloma sibiyikinikha ta,

lwekhuuba sheesi bakana nikhwo khukhwoonakisa.

Lulimi lwe baasiku silukanikha byaŋali ta,

naluundi byeesi bakanikha bili bye bubeeyi byonyene.

10O Wele, n’ubakhalile kumusaango luundi ubawe shitaambiso;

khali babeene bakwiile mu mireko kyaabwe.

N’ubasiindikhilise ibulafu khuurula mu moni tsoowo

lwe bibyoonako byaabwe biikali;

lwekhuuba nibo baakhuminyaaliile iwe.

11Ne khayo abo babaakhwiyikina iwe bekhoye,

baryo beembatsake lwe kumwikhoyo busheele.

Wamweene n’ubaliinde,

nio manya abo babaakhukana basangaalile mwiiwe.

12Lwekhuuba iwe, O Umukasya,

uwa tsikhabi abo babaakhola byeesi ukana.

Buulayi bwoowo bubaliinde nibo nga ingabo.