Swahili Bible2

17

Khuuloomba khw’omuundu ukhalikho kumusaango ta

1O Umukasya, wulila khukhwilootsa khwase khwa ŋali,

niwinaaneyo urekeerese byeesi ikhuloomba.

N’uwulile khuuloomba khwase khwa ŋali.

2Iwe wenyene niye umanyile uri ise siindikho kumusaango ta,

lwekhuuba iwe waamanya sha ŋali nga ni shili.

3Iwe waamanya bibiili mu mwoyo kwase,

abe waakheetsa mu shilo wantsema,

singene unyoolemo ilomo yoosi imbi mwiise ta.

Ise singanikhakho ilomo yoosi imbi ta.

4Ise siindi nga babaandu babaandi ni bali ta;

babaakanikhaka bilomo biibi,

ise naakhuuloondelela tsintsila tsaabwe tse bituluungu ta.

5Busheele ise injeendela mu mikhoosi kyoowo,

naakhururatsakamo taawe.

6O Wele, ise inoomba isi iwe, khulwekhuuba iwe untsilamo.

Aso n’ureke khukhuru khwoowo,

uwulile byeesi ise ikhuloomba.

7Niwokyesanise khuukana khwoowo khwe kamaani,

iwe Umuwonesi waabo babaatitukhila is’iwe,

khu mukhono kwoowo kumulayi iliyo buwonesi.

8N’uniinde ise nga shisikye ni shibiimba khu moni iye mukari,

n’umbise mu shisiisa she tsindaaha tsoowo.

9Umbonese khukhwaama khu babi babaanangana ise,

ni khukhwaama khu baasiku baase babaambiyila ise,

babaantsibotokhelela nga bakana khukhuuntsira.

10Nibo sibalikho ni shiisa ta,

ne bakanikha bye khukhwiyiinga byonyene.

11Ari baantsibotokheleele, nga buli isi intsya baandeerekho tsimoni.

Baandolelela nga baweentsa kumukhoosi kwe khukhuungwiisa ise aasi.

12Bali busa nga italanyi iyibuulila isaanyi yayo,

bali busa nga italanyi inyana iyirekekhile khuutyeenuulakamo isaanyi yayo.

13O Umukasya, niwinyukhe usoolanise baasiku baase ubawule!

N’uwonese buulamu bwase khukhwaama isi baabi nga uraambisa lurima lwoowo.

14O Umukasya n’umbonese khukhwaama isi babaandu baabi,

isi babaandu babaali na byoosi byeesi bakana mu buulamu bwe shibala.

N’ubawe bibiindu biikali byeesi iwe wabaŋoonaŋoonela,

ni babaana baabwe bafune bibibamala,

ni bibiindi biramewo bibilimala ni babetsukhulu baabwe.

15Ne ise ndikhubonakho lwekhuuba s’indikho ni shiibi ta;

ise n’indisisimukha inditsusibwa ni kumwikhoyo,

ni tsimoni tsase tsilikhubonakho khuusi iwe nga n’uli.