Swahili Bible2

16

Khuuloomba khwe khukhwiyikina

1O Wele, n’uniinde lwekhuuba iwe niye isi ise ndimakayo waniinda.

2Ise inoma Umukasya wase ndi, “Iwe uli Umukasya wase,

biilayi byoosi byeesi ise ndi nabyo byaama isi iwe.”

3Babaandu bakwalaafu ni baba mu shibala baba babeyikinwa,

ni kumwikhoyo kwase kumukali kubawo khulwaabwe.

4Babaandu babaakhalawo khukhwisaaya ba wele babaandi

bereerakho kumutaambo kumukali.

Ise singene nitubaase mu khuwaanayo

tsisaayilo tsaabwe tse khukhwiira bisolo ta,

namwe ise singene nisaaye ba wele baabwe ta.

5Umukasya, iwe niye sheesi ndi nasho nga she buusikha bwase;

Iwe niye uwuntsitsusa ise ni tsikhabi,

buulamu bwase bwe buraangisi buli mu makhono koowo.

6Ise bye kumukabo kwase byoosi byaantsiliile buulayi;

kumukabo kwase kuli kumulayi ilala.

7Ise imbuyilisa Umukasya lwekhuuba niye aamba ise kamakhula,

ni mu shilo namwo kumwoyo kwase kungaambila.

8Ise namanya ndi Umukasya ali ni nase busheele,

ali aambi ni nase singene injiyaane ta.

9Isho shikila kumwoyo kwase kwitsula kumwikhoyo,

ni buulamu bwase bwaaba nga buli mu lukoosi.

1016.10: Bur 13.35Lwekhuuba iwe s’undekha ise khuutsya imakoombe ta,

namwe s’unyala waalekha umukhosefu woowo khuubola ta.

1116.11: Bur 2.25-28Iwe untsokesa ise kumukhoosi kwe buulamu;

mu moni tsoowo iliyo kumwikhoyo kumwitsufu,

mu mukhono kwoowo kumulayi

mulimo bibireera kumwikhoyo biilo ni biilo.