Swahili Bible2

10

Umukasya ayeeta babaali buubi

1O Umukasya, lwashiina wiimikha aleeyi?

Lwashiina wiibisa nga ifwe khuli mu mbuka iye bikosi?

2Babaandu baabi beyiinga bakubyeenga bataambi;

khali baaba babeene bawaambibwiile mu mireko kyaabwe kyeesi baba baarekile.

3Baboonaki bebuyila lwe khukhwiwuuma khwaabwe khuubi,

n’umuundu we kumuluungo atyaaba luundi wekaana Umukasya.

4Babaandu baboonaki mu khwiyiinga khwaawe sibenaanayo khuuweentsa Wele ta;

nibo mu byambaaso byaabwe baloma busa bari, “Wele s’aliwo ta.”

5Baboonaki mu buli byeesi bakhola bibatsiila buulayi.

Ne isaambo isi Wele akhalamo kimisaango, nibo sibakimanya ta.

Nibo balekelesa baasiku baabwe boosi.

6Mu myoyo kyaabwe bambaasa bari “Mbaawo shishinyala shaabakhaasa ta,”

naluundi bari “Mbaawo bukosi bwoosi biilo ni biilo ta.”

710.7: Roma 3.14Mu bilomo byeesi bakanikha byetsuulemo khuutsuba, ni buwombesi, ni khuumiinikhilisa;

baanguyilisa naabi khuukanikha bilomo bibiikhalasa ni bye tsimbomelo.

8Nibo beebisa, beereka mu byaalo,

nga baliindilila khukhwiira babaandu babaakhalikho ni kumusaango ta.

Bekhala bebuula babone abo babaakhenyala ta,

9beebisa beereka busa nga italanyi niyibisa mwifuluma.

Beebisa banyale khufwakhila bataambi,

babayile nga babaakhweeselesa mu mireko kyaabwe.

10Basaambakilila aasi abo babaakhali ni kamaani ta,

baraambisa kamaani kaabwe khuurekula batoro babaakhupa aasi.

11Baboonaki bambaasa mu myoyo kyaabwe bari, “Wele waayibilila!

Webiimbiliile mu moni, s’atsya khukhubona ta!”

12O Umukasya, yinyukha! O Wele yinyusa kumukhono kwoowo,

uyeete abo babaakholaka shiisa.

13Lwashiina baboonaki balekelesa Wele?

Mu myoyo kyaabwe baloma bari, “Wele s’akhuwa ifwe shitaambiso ta.”

14Ne iwe Wele ubona, waalolelela kumutaambo kuno ni khuutaambisibwa khuno.

Iwe busheele uli mwirekefu khuuyeeta.

Umuundu ukhenyala ta ewaanayo mu makhono koowo,

lwekhuuba iwe busheele uli umuyeeti we baafuubi.

15Funiaaka kamaani ke babaandu baboonaki ni baabi;

n’ubawe shitaambiso lwe buubi bwaabwe bweesi bakholele

khukhwoolesa ni kane baweelewo ilala.

16Umukasya niye Umuyiinga biilo ni biilo;

kamanaambo kakaakhamwisaaya ta kaliihela,

kakoraane karurewo mu shibala sheewe.

17O Umukasya, iwe uwulila babaandu boowo be aasi byeesi baloomba,

kane winaaneyo isi bali ubeesemo kamaani.

18Iwe uwulila khuulila khwaabo babaamiinilisibwa ni khwaabo babaali baafuubi;

iwe kane ukhalewo nga umanya uri nibo sibali ni kumusaango ta,

nio babaandu buundu be mu shibala balekhe khubariisariisa ta.