Swahili Bible2

SHIITABO SHA MUSA SHE KHAANE SHEESI BALAANGA BARI

KHUUBALA

KHUKHWAANTSULA

Shiitabo shino she Khuubala shikhuwa luukano lwe babaandu ba Isiraeli mu mbuka ye kimiiko kamakhumi kane, khukhwaama nga ni baarura khu Lukiingi Sinaayi, khukhwoola isi boolela khu lwaakha lwe bwaamanyaanga lwe shibala sheesi Wele abasuubisa khuubawa. Lisiina lye shiitabo shino liwaambakana buulayi ni shishiindu shikhulu naabi shishakholebwa mu lukano luno, nga nisho, she khuubala babaandu ba Isiraeli, sheesi Musa aakhola nga bashiili khu Lukiingi Sinaayi. Ndi luundi aababala nga bali mu Mowabu, ibwaamanyaanga wa Yorudaani, mu muboolo kukweelakho. Mu mbuka iili akari e kimiboolo kibiili kye khuubala, babaandu ba Isiraeli baatsya mu Kadeshi Barineya, shishaba imwaalo we lulwaakha ni Kanaani, ne baakhaasikha khukhwiinjila mu shibala sha Kanaani nga basiintsiila ibweene iyo. Lwanyuma lwe khuumala kimiiko mikalikho mu shifwo isho, baakyeenda baatsya mu shifwo shishaba ibwaamanyaanga we luluutsi Yorudaani, nga nisho mweesi batweela khu nibo baarama baamenyamwo, naluundi nimwo mweesi babaaramile baasiintsiila nio beerekekha khukhwaambukha luluutsi khuutsya mu Kanaani.

Shiitabo she Khuubala nilwo luukano lwe babaandu, abe imbuka ikiindi bawamwo kamaani, ni khuurya khuukali, ni mbuka ikiindi baamiinyaalila Wele ni Musa, umuundu isi Wele umweene aarobora khuubaraangilila. Luukano luno lukhwookesanisa bubwiiyikinwa bwa Wele, ni khukhwiinaanayo khwa Wele isi babaandu beewe, abe yakhaba nga baaba batoro, naluundi nga baamiinyi, ni bubwiiyikinwa bwa Musa bubweloosela naabi, abe yakhaba nga alala ewulila ari waaluwile, waawamwo khuukana isi Wele ni isi babaandu beewe.

Inoondekhana iye bibiilimwo

Babaandu ba Isiraeli beŋoonaŋoona khuurura khu Lukiingi Sinaayi (1.1—9.23)

a. Khuubala khukhwanyoowa (1.1—4.49)

b. Kamakaambila kakaakhali matweela ni biilakilo (5.1—8.26)

c. Kamayiiya ke Khuubirakho ke khabili (9.1-23)

Khukhwaama khu lukiingi Sinaayi khuutsya khwoola i Mowaabu (10.1—21.35)

Bibiindu bibyakholekha nga bali i Mowaabu (22.1—32.42)

Lukyeendo khukhwaama i Misiri khuutsya i Mowaabu mu bwiimbi (33.1-49)

Biilakilo byeesi baafuna nga bashiili khukhwaambukha luluutsi Yorudaani ta (33.50—36.13)