Swahili Bible2

9

Kamayiiya ke Khuubirakho ke khaabili

19.1: Luky 12.1-13Mu mweesi kukuunyoowa, kwe mu mwiiko kwe khabili, khukhwaama nga ba Isiraeli ni baarura mu Misiri, Umukasya waakanikha isi Musa mu mubiimbi kwa Sinaayi, nga amulomela ari, 2“Babaandu ba Isiraeli baakha khuulya kamayiiya ke Khuubirakho mu mbuka inyene iyaakhila, 3khu shifukhu she likhumi na bine, she kumweesi kuno, angoloobe, nga muloondelela bilakilo ni kamakaambila kaasho.” 4Aryo Musa waaboolela babaandu ba Isiraeli khuulya kamayiiya ke Khuubirakho. 5Kila khu shifukhu she likhumi na bine, she kumweesi, angoloobe, baashikholela mu mubiimbi kwa Sinaayi. Babaandu baaloondelela bilakilo byoosi byeesi Umukasya aawa Musa.

6Ne aabawo batweela khu baandu ba Isiraeli, babaaba nga baawaambile khu mulaambo kw’omuundu, isho shaakila baalekha khuba babaakhila khuutsya khukhwiisaaya Umukasya ta, ni khuulya kamayiiya ke Khuubirakho ta. Kila beetsa isi Musa ni Aroni, baabareeba bari, 7“Abe yakhaba nga ifwe khwawaambile khu mulaambo kw’omuundu, lwashiina ifwe nafwe khukhalya kamayiiya ke Khuubirakho, ni khuuwaanayo tsisaayilo tsintsoshe isi Umukasya, khu mbuka inyene iyaakhila, atweela ni babaandu bano boosi?”

8Musa naye waabeelamwo ari, “Nimuliindekho, imale khuutsya mu Lisari Likhosefu, niireebekho imbone sheesi Umukasya analoma khu lomo yino.”

9Umukasya waalomela Musa 10khuutsya khuuboolela babaandu ba Isiraeli ari, “Siinga mutweela khwiinywe, namwe mutweela khu betsukhulu beenywe awaambakho khu mulaambo, shamureerera khuuba umunyaalu, namwe siinga uba nga uli khu lukyeendo, unyala wetubaasa atweela mu khulya kamayiiya ke Khuubirakho. 11Ne shino shaakha khuukholekhela angoloobe e shifukhu she likhumi na bine she kumweesi kukwiilakho. Lisheese lye Khuubirakho lyaakha khuuliibwa ni kumukaati kukukhalimo kamamela ta, atweela n’isuufwa. 129.12: Luky 12.46; Yok 19.36Ikhabawo inyama yoosi iramawo khukhwoola kumutikhinyi, namwe ikhabawo khuufuniaakakho likuumba na litweela ta. Mwaakha khuubona muri muloondelela biilakilo bino. 13Ne umuundu yeesi ukane abe nga aakhila buulayi, naluundi nga s’ali mu lukyeendo ta, ne ndi waalekha khwitubaasa mu khulya Kamayiiya ke Khuubirakho ta, umweene uyo singene abalikhe khuuba mutweela khu baandu baase ta. Lwe lomo iyo, aakha khuuweebwa shitaambiso, lwekhuuba siwaweeleyo shiwaanwa khu mbuka iyaakhila inyene ta.

14“Ne siinga ibawo umuundu yeesi umwiitswa umenya musiinywe, anyala waabetubaasakho, siinga aba nga waaloondeleele bilakilo byoosi. Lwekhuuba bilakilo bili bitweela byeene bibiwaamba khu buli muundu yeesi, oba ali umwikhali, namwe umwiitswa.”

Lifuumbi libiimba khu Lisari Likhosefu

(She Lukyeendo 40.34-38)

15Khu shifukhu khweesi baamalila khuusimikha i Lisari Likhosefu bari, abawo lifuumbi lilyeetsa lyaakibiimbakho, nga angoloobe libonekha nga kumulilo, ni shiilo shoosi khukhwoolesa kumutikhinyi. 16Shaabatsaka shiryo buli shifukhu, nga lifuumbi likibiimbakho kumuusi, ne mu shilo lyaabonekha nga kumulilo. 17Abe buli lweesi lifuumbi linyukhila lyaarura khu Lisari, abe babaandu ba Isiraeli benyukha baarakikha khuukyeenda luundi. Ne isi abe lifuumbi liikhila luundi lyaabiimba khu weema, abe ndi babaandu bekhala baakhola i kaambi iye khuuwolakho. 18Abe buli lweesi Umukasya abalakila, babaandu ba Isiraeli benyukha baarakikha khuukyeenda luundi. Ndi abe nga waabalakiile luundi, beemikha baakhola ikaambi baawolakho. Abe buli lweesi lifuumbi liikhila lyaabiimba khu Lisari, abe babaandu nabo sibakyeenda ta, ne baarama busa mu kaambi yaabwe. 19Abe yakhaba nga lifuumbi lyaamenyile imbuka indeeyi naabi khu Lisari, babaandu nabo abe baliinda baalekha khukyeenda ta. 20Ne abe imbuka ikiindi lifuumbi liikha lyaabiimba khu Lisari biifukhu bikyeekhe biri, ne abe buli lweesi Umukasya abalakila khuurama mu kaambi, baarama, ne ndi lweesi abalakila khukyeenda, baakyeenda. 21Ne abe ndi imbuka ikiindi, lifuumbi libiimba khu Lisari khukhwaama angoloobe khukhwoolesa kumutikhinyi. Ne nga abe lyenyusibwilekho, nabo benyukha baaliloondakho isi litsya. Abe buli lweesi liimikhila mu shifwo shitweela, nabo nga beemikha, baakhola i kaambi abweene awo, baamenya awo. 22Shino shabatsaka shiryo imbuka yoosi, oba abe khuumala biifukhu bibili, namwe kumweesi mutweela, namwe kumwiiko mutweela, namwe abe khumenya khufuurisakho awo. Shonyene shaba ndi baaba bali ni khuuloondelela eena isi lifuumbi lyabatsaka, abe nga lyaramilewo khu Lisari imbuka indeeyi, nabo ba Isiraeli abe bamenya abweene awo, abe buli lweesi linyukhila, nabo abe benyukha baarakikha khuliloondakho. 23Nibo baaloondelelatsaka bilakilo by’Omukasya byeesi aabawatsaka khuubirira mu Musa, abe nga waabalakiile khuukyeenda, baakyeenda, ne nga abe waabalakiile khuurama mu shifwo shitweela, nga barama.