Swahili Bible2

8

Aroni arekekha bisiindi bye tsitaala bya zaabu

18.1: Luky 25.31-40; 37.17-24Ari Umukasya waalomela Musa 2aboolele Aroni ari, “N’uba nga wareerewo tsitaala, urawo tsitaala musaafu khu bisiindi byatso, nio tsinyalise khuuwa buwaanga iburaangisi.” 3Aroni wafukiilila, waarawo tsitaala nga Musa n’amulomela. 4Shisiindi she taala shaba shaakholebwa mu zaabu isi bamalile khuukhupa ni nyoondo, khukhwaamila ilala aasi, khukhwoolela ilala khu ngaaki khu bimuli byeesi baaronakakho, nga shili musaambo inyene isi Umukasya aaba nga wabooleele Musa.

Khuupyeluusa ba Levi

5Lwanyuma ndi Umukasya waalomela Musa ari, 6“Niwawulewo ba Levi, khuubarusa mu baandu ba Isiraeli ba busheele, lwanyuma ubapyeeluuse, 7ubasiinge nga uraambisa kameetsi kakaasiinga bibyoonako. Lwanyuma ubalome batsye beebekekho litsuune liliili khu mibili kyaabwe, naluundi basiinge ni bikwaaro byaabwe.

8“Lwanyuma bali ni khuureerayo iwuunwa inyana, ni shipimo she buufu shishaakhila, nga baatubaasilemo kamafura ke kuusaala ku olivu. Naluundi baakha khuureerayo iwuunwa iye khaabili khuuba nga shiwaanwa she bibyoonako.

9“Lwanyuma Musa iwe, kane ubuusanise babaandu boosi ba Isiraeli, ukyelewo ureere ba Levi, ubeemise iburaangisi we Lisari yase Likhosefu. 10Nga bali iburaangisi we lisari ilyo, babaandu boosi ba Isiraeli, beetse babarekho kamakhono kaabwe. 11Aroni niye ukane awaaneyo ba Levi bano khuuba nga shiwaanwa khukhwaama mu baandu ba Isiraeli, nio banyale khuuba nga nibo babaakhola kumulimo kwase kuno.

12“Lwanyuma ba Levi beetse bare kamakhono kaabwe khu mirwe kye tsiwuunwa tsibili, nio lwanyuma ndweela iwaanibweyo khuuba nga shiwaanwa she shishoonako, ni iramile ndweela bakiwaaneyo nga isaayilo intsoshe, lwe khukhuuntsikhoyesa ise. 13Ureere ba Levi beemikhe a sheeso shase iburaangisi wa Aroni ni basooleli beewe, lwanyuma nibo bawaaneyo ba Levi, nga babawoonga isi ise.

14“Kumukholo kuno kane kwokyesanise kuri ba Levi ari bali barobole baase khukhwaama mu baandu ba Isiraeli babaaramile, bekyelile ba buraawa luundi babaase. 15Uryo nga waamalile khuupyeeluusa ni khuwoongayo ba Levi bano musaambo iyo, kane babe nga baakhila khukhola kumulimo mu Lisari Likhosefu. 16Ari baryo bekyeliile ilala babaase, belile mu shifwo abe shishaba she babaana besiinde baakiboole be ba Isiraeli. Ari bali babaase senyene. 178.17: Luky 13.2Khu mbuka isi nakhoonyelakho babaana besiinde baakiboole be ba Misiri, nakhalawo khukhwiwoongela bikiboole byoosi, nga babaana besiinde baakiboole be babaandu ni bye bisolo khuuba bibyase. 18Ne ari naroboole ba Levi bano khukhwiila mu shifwo she babaana besiinde baakiboole be babaandu ba Isiraeli. 19Naabawaanileyo nibo khuuba nga biwaanwa isi Aroni ni basooleli beewe, khukhwakaanisatsaka mu Lisari Likhosefu, khulwe babaandu ba Isiraeli boosi. Naluundi nibo kane babonatsake bari mbaawo bukosi bwoosi bubwoola khu ba Isiraeli, babaaba nga besyeendile aambi ni Lisari Likhosefu.”

20Musaambo iyo, Musa, ni Aroni atweela ni ba Isiraeli babaaramile boosi baawoongayo ba Levi, ni khuubonela ilala bari ba Levi bakhola byoosi byeesi Umukasya aalakila Musa ari bakhole. 21Baryo ba Levi bepyeeluusa khukhwaama mu byoonako, nga basiinga bikwaaro byaabwe. Lwanyuma Aroni waabareera aambi ni shisheeso, waabawaanayo khuuba nga shiwaanwa sha buraawa isi Umukasya. 22Lwanyuma lwa bino byoosi, ba Levi baatsya bakhola kumulimo kwaabwe mu Lisari Likhosefu, nga bayeetakho Aroni ni basooleli beewe, nga baloondelela byoosi byeesi Umukasya aalakila Musa.

23Ndi luundi Umukasya waalomela Musa 24bibiwaamba khu ba Levi ari, “Khukhwaamila khu miiko kabili na kiraano (25) khuuniina angaaki, buli mu Levi aakha khukhwoolelesa kumulimo kweewe mu Lisari lyase likhosefu, 25ne khukhwaamila khu miiko kamakhumi karaano (50), baakha khuuwola khukhwaama mu buraambi bwaabwe. 26Baryo kane babe nga bayeetakho busa ba Levi mu Lisari Likhosefu, ne nga sishibakhila nibo khuuba nga nibo babaakhola kimilimo babeene ta. Isaambo yino niyo isi uli ni khukhwoolelesamo kimilimo kino.”