Swahili Bible2

5

Babaandu baanyaalu

1Umukasya waalomela Musa 2khuulakila babaandu ba Isiraeli ari, “Ni murusewo umuundu yeesi khukhwaama mu kaambi uuli ni buulwaale bwe bikeenge, namwe umuundu yeesi uulikho ni shishibeena khuurura mu mubili kweewe, na buli muundu yeesi uwaambilekho khu mulaambo. 3Ni muruse babaandu babaali baanyaalu boosi ibulafu we kaambi, nio ikaambi ilekhe khuba inyaalu ta. Lwekhuuba ise samweene imenya mubweene umwo, akari mu baandu baase.”

4Baryo babaandu ba Isiraeli baawuliilisa byeesi Umukasya aabalakila khuubirira mu Musa, baarusa babaandu baanyaalu boosi khukhwaama mu kaambi.

Khuusasula lwe shishoonako shishikholebwele

55.5: Lev 6.1-7Indi luundi Umukasya waalomela Musa, 6khuuboolela babaandu ba Isiraeli ari, “Siinga nga umuundu yeesi akhola shishoonako shoosi, waalekha khuba umwiyikinwa isi Umukasya ta, naluundi woonakisa isi uwashe, 7umuundu uyo aakha khukhwibiiyisa shishoonako sheewe. Naluundi umuundu uyo aakha khuusasulila uyo isi onakisiile mu bwitsufu, ni khuutubaasakho khasiintsa khatweela khe kharaano. 8Ne siinga umuundu uyo alekha khuuba n’umulebe weewe unyala khukhwakaanila bibiindu bibisasulibwa ibyo, bibiindu ibyo ari biba bibyase, ni nase kane imbisasulile umusaayi. Ni khuulooselakho khu biindu bibisasulibwa ibyo, waakha khuureera ni limiiku isi umusaayi, khuuliwaanayo lwe bibyoonako. 9Buli shiwaanwa sha buraawa isi ba Isiraeli bareera isi umusaayi, bibiili bikhosefu byoosi, bili ni khuuba by’omusaayi. 10Nashiryo buli musaayi ali ni khukhwibiikhila biwaanwa byeesi bamureerere.”

Umukhasi isi umuseetsa ambaasilisa khuuba nga waayeyaane

11Indi ndi Umukasya waalomela Musa 12-14khuulakila babaandu ba Isiraeli ari: “Siinga ibawo umusaani yeesi isi libuba liwaamba, lwekhuuba ambaasilisa umukyelama weewe khuuba nga alikho ayeyana n’umusaani ukuundi. Ne lwa shino, siinga nga umusaani uyo aba nga s’ali ni bukakafu bubumala ta, lwekhuuba umukhasi waashibiikha nga shimoonyo, lwe khuutaambawo bajulisi, ate nga mbaawo umuundu uwamuwaamba nga ayeyana ta. 15Umusaani ufwaana aryo, aakha khuuyila umukyelama weewe uyo w’omusaayi, nga ayililakho ni buufu buunose bwa seyiri, khuuba nga shiwaanwa lwe kumusaango ukwo. Khu shiwaanwa she buufu isho, bakhatsukhakho kamafura ke kuusaala ku olivu, namwe khuurakho bubaane bwoosi ta. Lwekhuuba shino shili shiwaanwa shiwaanibwa lwe khukhwaambaasilisa busa khw’omuseetsa, nio manya afune bukakafu.

16“Lwanyuma umusaayi areere umukyelama tsana, amwiimise iburaangisi we shisheeso sh’Omukasya. 17Ibweene iyo, umusaayi awaambe kameetsi kamakwalaafu akatsukhe mu shibuumba, akatubaasemo ni lifukhuulu liliili aasi khu mukhe kwe lisari likhosefu. 18Lwanyuma akaangululake litsuune ly’omukhasi, amuwaambise shiwaanwa she buufu tsana mu makhono keewe. Ne umusaayi awaambe shibuumba shishiilimwo kameetsi kamalulu kakaareera shitsubo. 19Lwanyuma umusaayi akhole umukyelama yuno khuukhola shishitsubo nga amulomela ari, ‘Iwe siinga uba nga wakhuyeyanakho n’umusaani yeesi ta, mbaawo shiibi shishikane shikhwoolekho, shishireerebwa ni kameetsi kano ta. 20Ne siinga iwe uba nga waayeyanekho n’umusaani ukuundi yeesi, ukhali umuseetsa woowo ta, 21khali Umukasya akholile lisiina lyoowo liba shitsubo mu baandu boowo. Naluundi khali Umukasya akholile bisiintsa byoowo bye shimoonyo biniaala bilekha khusaalakho umwaana ta, niinda yoowo yoosi ibiimba. 22Lekha kameetsi kano kengile muunda mwoowo, kakile inda yoowo yoosi ibiimbe, ni bisiintsa byoowo bye shimoonyo biniaale.’

“Umukhasi naye elemo ari, ‘Ilala ifukiilila ndi, siinga mba nga iliwo sheesi ikholile, lekha ibyo byoosi bikholekhekho khwiise.’

23“Lwanyuma umusaayi arone shitsubo shino mu shitabo, akyelewo ashisiinge ni kameetsi keekhe mu shibuumba shishiilimwo kameetsi kamalulu. 24Nio lwanyuma umusaayi akhole umukhasi anywe kameetsi tsana kamalulu ako kakaareera shitsubo, katsye muunda mweewe, kamureerere butsiina. 25Umusaayi ndi abukule shiwaanwa tsana she buufu khukhwaama mu makhono k’omukhasi, abuwaambe abuwaaneyo nga shiwaanwa isi Umukasya. Lwanyuma abuyile abure khu sheeso. 26Abukulekho buulala, abwooshele khu sheeso, nga shiwaanwa shishooshe. Lwanyuma lwayo, umukhasi tsana aakha khuunywa kameetsi kamalulu tsana ako.

27“Ne siinga umukhasi uyo aba nga waayinyaalutaka lwe buyeyani, webirisaka buubi isi umuseetsa weewe, kameetsi keesi anyweele kane khaangukho kamureerere butsiina bwe khulekha khusaalakho babaana ta, naluundi kane ekyele shitsubo isi babaandu beewe. 28Ne siinga aba nga wakhukholakho shishiindu shiibi shoosi ta, kumubili kweewe singene kubekho butsiina bwoosi ta, naluundi aryo kane anyalise khusaala babaana.

29-30“Lino nilyo likaambila lilikane liraambe isi umusaani abeela ni libuba, waaba nga ekanakana umukhasi weewe, nga amwaambaasilisa khuuba nga wakholile bye buyeyani. Umusaayi aakha khubona ari umukhasi emikha iburaangisi wase, nio umusaayi mweene aloondelele bilakilo bino byoosi. 31Umusaani niye singene abekho ni she khukhwikiitsibwa ta, ne umukhasi siinga nga anyoolekhana nga kumusaango kwaamufuurire, kane etyuukhe busiro bwe shitaambiso isho.”