Swahili Bible2

4

Kumulimo kwe khakuuka kha Kohasi

1Umukasya waalomela Musa ni Aroni ari, 2“Ngana ubale babetsukhulu ba Kohasi umu Levi, nga uloondelela bukuuka bwaabwe ni tsiingo tsaabwe. 3Nga urona kamasiina ke basaani baboolisa kimiiko akari a kataru (30) ni karaano (50) babanyala khuuraamba kumulimo kwe bubwakaanisi mu tabenakuulo y’Omukasya. 4Kumulimo kane kuubatsake kwe khuusuta bibiindu bikwalaafu bibiraambisibwa mu tabenakuulo.”

5Umukasya waalooselakho ari, “Khu mbuka isi ba Isiraeli kane babe nga beerekekhile khuukyeenda khuurura mu kaambi, Aroni ni basooleli beewe kane benjile mu tabenakuulo, basute ingubo isi baatiimba, iyawukhanisa Isanduuku ikhosefu ni tabenakuulo yoosi. Lwanyuma ingubo yino bakibiimbe khu ngaaki khwe Sanduuku. 6Lwanyuma khu ngaaki khwayo barekho lihaafu lye mbusi, nio lwanyuma balooselekho ingubo imbuusi. Nga bino byoosi byaweele, basobekhemo kimirongoolo kikisuta.

7“Ni shishiindi Aroni ni basooleli beewe bali ni khuuraambisa ingubo imbuusi, bakyaale khu meetsa iye kumukaati kumukwalaafu. Lwanyuma khu ngaaki khwayo barekho tsisowaani, bipwaakhuli bye bubaane, ni bikhopo, ni tsimuka tse viini, ni khuutubakho kumukaati kumweene. 8Lwanyuma nga baamalile khuukhola baryo, khu ngaaki babiimbekho ni ngubo imbesemu pe, ni khu ngaaki khwayo baalekho lihaafu lye mbusi, nio ndi lwanyuma basobekhemo kimirongoolo kikisuta.

9“Kane ndi babukule ingubo ikiindi imbuusi, babiimbe khu ngaaki khwe shisiindi khweesi itaala yiimikha, ni tsitaala tsakhwo tseene, ni bibisimisa, ni bifuruuya, atweela ni tsimuka tse kamafura ke kuusaala ku olivu kakaaraambisibwa musaambo tsitsikhali ndweela. 10Bino byoosi kane ndi bibiimbibwekho ni lihaafu lye mbusi lyeesi bahalile buulayi, nio lwanyuma babire khu bikaari bibisuta.

11“Ni khu sheeso she zaabu kane babiimbekho ni ngubo imbuusi, nio lwanyuma babiimbekho ni lihaafu lye mbusi lyeesi bamalile khuhalaka buulayi, nio lwanyuma basobekhemo kimirongoolo kikisuta. 12Nio lwanyuma Aroni ni basooleli beewe bayile bibiindu bibiraambisibwa mu shifwo shikhosefu bino, babibowe mu ngubo imbuusi. Nio lwanyuma khu ngaaki khwabyo babiimbekho lihaafu lye mbusi lihalake buulayi, nio ndi baryo babire khu mirongoolo kikisuta. 13Bali ni khuurusawo likokhe khukhwaama khu sheeso, lwanyuma balibiimbekho ni ngubo inandaafu. 14Khu ngaaki khwe ngubo iyo, bekhasekho bibiindu byoosi bibiraambisibwa khu sheeso, nga nibyo, bifuruuya, tsiwuuma tse tsinyama, bitiiyo, ni bikaraaya bye khuuwaanyakila kameetsi. Lwanyuma lwayo bino byoosi kane babibiimbekho ni lihaafu lye mbusi lihalake buulayi, nga bashiili khusobekhamwo kimirongoolo kikisuta.

15“Biryo nga bibiindu bino byoosi byaaweele buulayi, nga imbuka iye khuururawo yoolile, ba Levi be mu shikuuka sha Kohasi nibo babaakane beetse basute bibiindu bikhosefu bino, ni bibiindi bibitsiilakho khu Lisari Likhosefu. Ne shonyene ndi, Aroni ni basooleli beewe baakha khuubona bari, bibiindu bino byaamalile khaale khuurekekhebwa, ni khuubiimbibwakho buulayi nio ilekhe khubawo n’umuundu na mutweela khube mu shikuuka sha Kohasi, ubiwaambakho bibyeene nga babisuta, shishinyala shaabareerera khuuhela. Bino byoosi nibyo bye khuukhola byeesi be mu shikuuka sha Kohasi bali ni khuukhola, buli lweesi baaba nga bali khu lukyeendo.

16“Ni Eliyazari umusooleli wa Aroni, niye utsya khuuba nga aloolelela kamafura tsana, ni bubaane bubuwunya buulayi, biwaanwa bye bilime bibyoomu, ni kamafura ke kuusaala ku olivu, kakaaraambisibwa mu khwaawula ni khuubiita. Naluundi Eliyazari niye uuli ni khuubona ari Lisari Likhosefu, ni bibiindu bibiilimo, atweela ni bibiindi bibiliitsilakho, babilolelela buulayi.”

17Umukasya waalomela Musa ni Aroni ari, 18“Ukhafukiilisakho babaandu be mu bukuuka bukyeekhe bwe mu Kohasi bwaafwa bwahela ta. 19Bakhakholakho shishiindu shoosi shishikila shaabareera aambi ni bibiindu bikhosefu, shishinyala shaakila baafwa ta. Ne khuubona ndi shino sishikholekha shiryo ta, Aroni ni basooleli beewe nibo babaakane batsye benjile mu Lisari Likhosefu, bakabanane kimilimo kyaabwe, ni buusiro bweesi buli mutweela anyala khuusuta. 20Ne siinga ba Kohasi batsya benjilayo mu Lisari Likhosefu, lwanyuma baabona byeesi basaayi balikho bakhola, lwe khuurekekha khuusuta bibiindu bikhosefu, kane bafwe.”

Buuraambi bwe be shikuuka sha Gereshoni

21Umukasya waalomela Musa luundi ari, 22“Ingana ubale bukali bwe basooleli ba Gereshoni, nga utsiila khu bukuuka bwaabwe bukyeekhe, ni tsiingo. 23Ukhole luruungo lwe basaani babaali akari e kimiiko kamakhumi kataru (30), ni karaano (50), babanyala bakhola kumulimo buulayi kwe khukhwakaanisa mu Lisari Likhosefu ly’Omukasya. 24Bano nibo kane babe nga bakhola kumulimo kuno, 25kane babe nga nibo babaasutatsaka tsingubo tsitsitiimbibwa mu Lisari Likhosefu mukari, ni bibikibiimbakho bye bulafu, ni lihaafu lye mbusi lyeesi bahalaka buulayi lilibiimbakho khu ngaaki, ni ngubo isi batiimba imulyaango, 26ni tsingubo tseesi batiimba tsaatsuungatsuunga mu lwaanyi lulwibotokhelela Lisari Likhosefu, atweela ni ngubo isi batiimba ni kimikosi kyakhwo isi babowa ibwinjililo we mulwaanyi. Ba Gereshoni bano bali ni khuukhola shoosi shishinyalikhana khubona bari bibiindu bino babilolelela buulayi. 27Nibo bali ni khuukhola buli shiindu shoosi sheesi Aroni ni basooleli beewe babalakila khusuta, ni na shiina sheesi bakhila khusuta nga bakyeenda. 28Kino nikyo kimilimo kyeesi ba Gereshoni baakha khukhola mu Lisari Likhosefu. Isamari umusooleli wa Aroni niye ukana abone ari bibiindu bino byoosi babikhola buulayi.”

Kumulimo kwe khakuuka kha Merari

29Umukasya weloosela khuuboolela Musa ari, “Mu basooleli ba Merari, ngana ubabalile mu bukuuka bwaabwe bukyeekhe ni tsiingo tsaabwe, 30ukhole luruungo lwe basaani babaali akari e kimiiko kamakhumi kataru (30) ni kamakhumi karaano (50), babaakane banyalise khukhwakaanisa mu Lisari Likhosefu ly’Omukasya. 31Ba Merari bano nibo babaakane basute tsifuremu tse lisari ni bisiintsasiintsa bibiindi nga nibyo kimibya, kimisiindi, ni bye khukhwiimisamwo, 32ni kimisiindi kikiyeeta khukhwiimisawo lulwaanyi, nga waareerekho ni bye khukhwimiisamwo, ni bitsaangi bye lisari, ni kimikosi kyakhwo. Babaandu ba Merari bano baakha khuumanya biindu shiina bibyeene byeesi bali ni khuusuta. 33Kino nikyo kimilimo kyeesi babaandu be mu bukuuka bwa Merari baakha khuukhola mu bwakaanisi bwaabwe bwe mu lisari. N’umuraangilisi waabwe niye Isamari umusooleli wa Aroni, ukane abone ari byoosi bikholikha buulayi.”

Khuubala khwe ba Levi

34Baryo Musa ni Aroni atweela ni baaraangilisi be ba Isiraeli babala babaandu be mu shikuuka sha Kohasi, nga batsiila khu tsiingo tsaabwe. 35Baakhola luruungo lwe basaani babaali akari e kimiiko kamakhumi kataru (30) ni kamakhumi karaano (50), babaaba banyala khukhwakaanisa mu lisari ikhosefu. 36Bukali bwaabwe bwaba bikana bibili, bitoondo musaafu, ni kamakhumi karaano (2,750). 37Buno nibwo buukali bwe babaandu be mu tsiingo tse ba Kohasi, babaaba nga bakaanisa mu lisari ikhosefu, beesi Musa ni Aroni baabala, nga baloondelela shilakilo sheesi Umukasya aawa Musa.

38Buukali bwe basaani be mu Gereshoni nga batsiila khu tsiingo tsaabwe, 39babaaba boolesa kimiiko akari e kamakhumi kataru (30) ni kamakhumi karaano (50), abe babanyala khukhwakaanisa mu lisari likhosefu, 40baakhola luruungo lwoolesa babaandu bikana bibili, bitoondo bisesaba, ni kamakhumi kataru (2,630). 41Buno nibwo bukali bwe babaandu be mu tsiingo tse ba Gereshoni, babaaba nga bakaanisa mu lisari likhosefu, beesi Musa ni Aroni baabala, nga baloondelela shilakilo sheesi Umukasya aawa Musa.

42Bukali bwe basaani be mu Merari nga batsiila khu tsiingo tsaabwe, 43babaaba boolesa kimiiko akari e kamakhumi kataru (30) ni kamakhumi karaano (50), abe babanyala khukhwakaanisa mu lisari likhosefu, 44baakhola luruungo lwoolesa babaandu bikana bitaru, ni bitoondo bibili (3,200) 45Buno nibwo bukali bwe babaandu be mu tsiingo tse ba Merari, babaaba nga bakaanisa mu lisari likhosefu, beesi Musa ni Aroni baabala, nga baloondelela shilakilo sheesi Umukasya aawa Musa.

46Ba Levi bano boosi beesi Musa ni Aroni atweela ni baaraangilisi be ba Isiraeli baabala, nga batsiila khu tsiingo tsaabwe, 47babaaba bali akari e kimiiko kamakhumi kataru (30), ni kamakhumi karaano (50), nga nibo babanyala bakaanisa mu lisari likhosefu, ni khuuraamba kimilimo kyamwo kimisiro, 48luruungo lwaabwe lwoolesa babaandu bikana shinaane, bitoondo biraano, ni kamakhumi shinaane (8,580). 49Khusiintsila khu likaambila ly’Omukasya isi Musa, buli musaani aaronebwa khu luruungo. Na buli mutweela waaweebwa kumulimo kweewe khuukhola namwe khukhwakaanisa.