Swahili Bible2

36

Buusikha bwe bakhasi bakhwaalikhe

1Shifukhu shitweela, baaraangilisi khukhwaama mu khakuuka khakyeekhe kha Gileyadi, umwaana wa Makiri, uwe mu shikuuka sha Manase, umwaana wa Yusufu, baatsya isi Musa ni isi baaraangilisi babaandi ba Isiraeli 236.2: Bala 27.7baamulomela bari, “Umukasya aakhulakila iwe khuukabila babaandu ba Isiraeli liiswa nga ukhupa bukokha. Naluundi aakhulakila khuukabila busikha bw’omulebe weefwe Zelofehadi isi bakhaana beewe. 3Ne siinga bakhaana bano batsya bakhwaalikha khu basaani babaama mu bikuuka bya Isiraeli bibiindi, buryo busikha ubwo buba bukhurusibwakho khusiifwe, bwaaba bwe shikuuka isho mweesi umukhaana aba wakhwaalikhile. Nashiryo, busikha ubwo buba sibushiili bubweefwe ta. 4Nashiryo siinga Kumwiiko kwe Serukho mu Isiraeli ni kulyoola, busikha ubwo bwoosi bulitubaasibwa khu shikuuka mweesi bakhaana ba Zelofehadi bakhwaalikha, shikile bibiindu ibyo byoosi bibe nga byaarusibwile khu shikuuka she baakuuka beefwe.”

5Aryo Musa waaboolela babaandu ba Isiraeli sheesi Umukasya aamulakila khuukanikha ari, “Isho sheesi be mu shikuuka sha Manase baloma shili shaŋali. 6Nashiryo Umukasya waalakiile ari bakhaana ba Zelofehadi banyala bakhwaalikha khu muundu yeesi isi basiima, ne khurusakho ndi umuundu uyo ali ni khuuba nga aama mu shikuuka sha paapa waabwe. 7Buusikha bw’omuundu yeesi mu Isiraeli sibwaakha bwaakhalisa khuutsya mu shikuuka shishiindi ta. Buli mutweela aakha khukhwiiwaamba khu busikha bwe bakuuka beewe babeene. 8Buli mukhaana yeesi uyila kumukabo kwe liiswa mu shikuuka shoosi sha Isiraeli, aakha khukhwaalikha khu musaani uwe mu shikuuka sha paapawe sheene. Musaambo yino, buli muundu wa Isiraeli yeesi anyale khuuyila busikha bwe bakuuka beewe babeene. 9Nashiryo mbaawo busikha bwoosi bubuuli ni khuukhalisa khukhwaama mu shikuuka shitweela khuutsya mu shikuuka shishiindi ta. Buli shikuuka shili ni khuurama nga nisho shishiliinda busikha bwasho.”

10Baryo bakhaana ba Zelofehadi baakhola nga Umukasya n’alakila Musa. 11Bakhaana ba Zelofehadi bano baaba nibo Mahila, Tiruza, Hogula, Milika, ni Nowa. Baakhwaalikha khu basaani babaaba shaananyina shaabwe muunda ya paapa waabwe. 12Baatsya bakhwaalikhaka mu bukuuka bukyeekhe bwe mu shikuuka sha Manase, umwaana wa Yusufu. Buryo busikha bwe liiswa lya paapa waabwe bwarama mu shikuuka isho.

13Kano niko kamakaambila ni biilakilo byeesi Umukasya aawa Musa khuuwa babaandu ba Isiraeli, nga bashiili khu musaleela kwa Mowabu, aambi ni luluutsi Yorudaani, shanjelekha wa Yeriko.