Swahili Bible2

35

Biriimba byeesi baakabila ba Levi

135.1: Yos 21.1-42Nga babaandu ba Isiraeli bashiili khu musaleela kwa Mowabu, aambi ni luluutsi Yorudaani, shanjelekha wa Yeriko, Umukasya waalomela Musa ari, 2“Lakila babaandu ba Isiraeli bakabilekho ba Levi khukhwaama khu kimikabo kye liiswa kyeesi bakhaafune, bitweela khu biriimba nabo bamenyemwo, ni kamaayilo ke bibyaayo. 3Biriimba kane bibatsake bibyaabwe bye khuumenyamwo, ni kamaayilo kabe ke bibyaayo byaabwe, ni bisolo byaabwe bibiindi. 4Kamaayilo kane karakikhatsakile khu kamatikiiyi ke biriimba, khuumalakho tsimita nga bitoondo bine ni kamakhumi karaano (450), khuutsya khu buli lubeka. 5Kamaayilo kaakha khukhwoolesa tsimita bitoondo syeenda (900) buubalaayi, nga tsipimibwa khu buli lubeka, ne shiriimba shibe khukari khwako.

6“Muli ni khuuwa ba Levi biriimba bisesaba bye khuumulilamwo, mweesi umuundu yeesi anyala waatitukhila, n’aba nga waakhoonyile uwashe nga waakhutsililila ta. Ni khuuloosela khu byeene ibyo, muli ni khuubawa biriimba bibiindi kamakhumi kane na bibili (42). 7Baryo ba Levi khuuyilila atweela babe ni biriimba kamakhumi kane na shinaane (48), atweela ni kamaayilo kakaabibotokheleele. 8Buukali bwe biriimba byeesi ba Levi bali ni khuufuna, khukhwaama khu buli shikuuka, bwaakha khuusiintsiila khu buboofu bwe liiswa lyeesi shikuuka isho shayila. Bikuuka biboofu bili ni khuuwayo biriimba biikalikho khuufuurakho bikuuka bikyeekhe.”

Biriimba bye khuumulilamwo

(Kamakaambila 19.1-13; Yoswa 20.1-9)

935.9: Maka 19.2-4; Yos 20.1-9Lwanyuma ndi Umukasya waalomela Musa 10khuutsya aboolele babaandu ba Isiraeli ari, “Nga mwambukhile luluutsi Yorudaani, mwenjiile mu shibala sha Kanaani, 11muroborayo bitweela khu biriimba, bibe biriimba bye khuumulilamwo, mweesi umuundu anyala waatitukhila, siinga aba nga waakhoonyile uwashe nga waakhutsililila ta. 12Biriimba bino kane bibatsake bye buumuli, siinga nga balebe b’omuundu ufwiile bakhakakho khukhwiiliyaasa. Shino kane shiyeete umuundu isi baambaasilisa khuuba nga weerire, anyoowe khuwotsesebwakho ni baakayi. 13Biriimba bino byaakha khuuba biriimba bisesaba, 14nga bitaru biba khu lubeka lutweela lwa Yorudaani, ni bibiindi bitaru bibe mu shibala sha Kanaani. 15Biriimba bino bisesaba kane bibatsake bye buumuli isi babaandu ba Isiraeli, ni isi babeetswa babaamenya akari musiinywe. Umuundu yeesi ukhoonya uwashe nga waakhutsililila ta, atitukhile mubweene umwo.”

Kamakaambila kakawaamba khu khwiira

Umukasya waaloma luundi ari, 16“Ne siinga umuundu araambisa shishuuma sha ayoni waakhupa uwashe waamwiira, umweene uyo aba ali umwiiri, naye aakha eribwe. 17Namwe ndi siinga umuundu araambisa libaale waakhupa uwashe waamwiira, umweene uyo naye aba umwiiri, naye aakha eribwe. 18Namwe ndi siinga umuundu araambisa shisaala waakhupa uwashe waamwiira, naye aba umwiiri, umweene uyo aakha khukhwiiribwa. 19Mutweela khu balebe b’omuundu uwiiribwile, naye aba ali ni buufunisi bwe khukhwiira umuundu umwiiri uyo. Siinga aba nga waamwakaanaanekho, aakha khuumwiira.

20“Namwe siinga umuundu abiiyila uwashe, shaakila waamusiindikha waakwa aasi, namwe waamutsukutsayo shishiindu shoosi, shaakila waafwa lwe khuutsililila, 21namwe mu busiku bwe angaaki, waamukhupa bifuusi, shaakila umuundu uyo waafwa, umukhupile aba ali umwiiri, naye aakha khukhwiiribwa. Mutweela khu balebe b’omuundu uwiiribwile aba ali ni bufunisi bwe khukhwiira umwiiri uyo, siinga nga amwaakaananakho.

22“Namwe siinga umuundu asiindikha uwashe isi akhaabiyilakho ta, namwe waamutsukutsayo shishiindu shoosi shaakila waafwa akhali khuutsililila ta, 23Namwe ndi nga waakhumubona ta, ne waamukwiisakho liibaale lyaamwiira, ate nga abe s’alikho umusiku weewe, namwe waakhumubiiyilakho ta, 24babaandu be mu shiriimba baakha khukhwiitsa atweela, bawotsese kumusaango ukwo, khuubona oba nga ali ni kumusaango, khuusiintsiila khu makaambila namwe ta. 25Babaandu boosi baakha khuuwonesa umuundu uweerire uwasheewe uyo, khukhwaama khu balebe b’omuundu uweeribwa, lwanyuma bamusiindikhe eleyo mu shiriimba she khuumulilamwo, sheesi elukhilamwo. Umuundu uyo aakha khuumenya ibweene iyo khukhwoolesa nga umusaayi ufuura buukhulu waamala khuufwa. 26Ne siinga umuundu uweera uwasheewe uyo, arura khukhwaama mu shiriimba she khuumulilamwo isho, abe mweesi ali, 27ne umulebe w’omuundu uwafwa waamunyoola naye waamukhoonya, umuundu uyo s’abakho ni kumusaango kwe bubwiiri ta. 28Nashiryo umuundu ulikho kumusaango kwe bubwiiri uyo, aakha khuumenya mu shiriimba she khuumulilamwo isho, khukhwoolesa umusaayi ufuura buukhulu naye n’afwa. Aryo lwanyuma lwe khuufwa khw’omusaayi ufuura buukhulu, anyala ari waakobolayo ingo weewe.

29“Bino kane bibatsake biilakilo isi babaandu ba Isiraeli boosi, mu miboolo kyoosi kikiliitsa iburaangisi, buli aandu oosi isi mulimenya.

3035.30: Maka 17.6; 19.15“Umuundu yeesi uwiira uwashe naye aakha khukhwiiribwa, siinga nga ibawo bujulisi bwe bajulisi babili. Ne bujulisi bw’omuundu mutweela sibumala khuukhala kumusaango kwe khukhwiira ta. 31Nga umuundu weerire uwashe, naye aakha khukhwiiribwa. Umuundu uyo s’akha khuulekhuulibwa lwekhuuba waasasuule tsinusu khuuliya ta. 32Ne siinga umuundu aba nga waawona khuufwa lwekhuuba waatitukhila mu shiriimba she khuumulilamwo, mukhamufukiilisa waakobolayo ingo weewe, lwekhuuba waasasuule tsinusu ta. Umuundu uyo aakha khuumenya mu shiriimba she khuumulilamwo isho khukhwoolesa nga umusaayi ufuura buukhulu waafwiile. 33Mukhanyaalutaka liiswa lyeesi mumenyamwo ta. Khutsukha kamafuki kanyaalutaka shibala, naluundi mbaawo she khuwoonga lwe khuupyeeluusa shibala isho khweesi kamafuki katsutsukha ta, khuurusakho ndi khutsukha kamafuki k’omuundu uyo naye uweera uwasheewe. 34Mukhanyaalutaka liiswa lyeesi mumenyamwo ta, nase samweene mweesi imenya. Lwekhuuba ise Umukasya samweene nase imenya akari mu baandu ba Isiraeli.”