Swahili Bible2

34

Tsintsakha tse Liiswa

1Umukasya waalomela Musa 2khuutsya aboolele babaandu ba Isiraeli ari, “Nga mwenjiile mu shibala sha Kanaani, liiswa lyeesi intsya khuubawa inywe litsya khuubakho tsintsakha tsino: 3Lulwaakha lwe mwaalo lutsya khwaamila khu mubiimbi kwa Zini, kukuuli khu lwaakha ni Edomu. Khu lubeka lwe bwaamanyaanga, lulwaakha lweenywe lwe mwaalo, lutsya khuurakikhila ibwakamilo we Nyaantsa imboofu Dedi Si. 4Nio lwaame ibweene iyo, luweete lwiikhe kwe mwaalo khuuyililamo Bubiriro bwa Akurabimu, lutsye lukhalise kumubiimbi Zini, lwikhilile kwe mwaalo we shiriimba Kadeshi Barineya. Khukhwaama ibweene iyo, lutsye khukhwoola i Hazari-Adari, lwilooseleyo paka i Azimoni. 5Ibweene iyo luwete lubirire khwi tila lye khakheetsi khe khu lwaakha lwa Misiri, ni bwakamilo we Nyaantsa imboofu Meditereniani.

6“Lulwaakha lwe bukwanyaanga lukhaabe Inyaantsa imboofu Meditereniani.

7“Lulwaakha lwe ngaaki lukharakikhile khu Nyaantsa imboofu Meditereniani, lwiloosele paka khu Lukiingi Hori. 8Ni khukhwaamila khu Lukiingi Hori ilwo, lutsye i Bubiriro bwa Hamasi, lwiloosele lukhalise lwoole i Zedadi, ikane ibe bubwakamilo bwe lulwaakha. 9Khukhwaama i Zedadi, lwiloosele i bwaamanyaanga lwoole i Zifoni, ni bwakamilo bwalwo kane bube i Hazari Enani.

10“Lulwaakha lwe bwaamanyaanga lukhaarakikhile i Hazari Enani lutsye lwoole i Shefamu. 11Khukhwaama ibweene iyo, lwikhilile kwe mwaalo paka i Ribula, shishiili ibwaamanyaanga wa Ayini. Lulwaakha luno lwiloosele khukhwiikhilila lutsye lwoole khu bikoongo bye bwaamanyaanga we nyaantsa Galilaaya34.11 Galilaaya: Alala baakilaanga bari inyaantsa Kineresi 12lwanyuma lwiikhe nga luloondelela luluutsi Yorudaani, khuutsya khwoola khu nyaantsa Dedi Si. Liryo liiswa lilikane libe akari e tsintsakha tsino, kane libe liiswa lyeenywe.”

1334.13: Bala 26.52-5634.13: Yos 14.1-5Lwanyuma Musa waalomela babaandu ari, “Lino nilyo liiswa lyeesi kane mufune khuubirira mu khukhupa bukokha, lyeesi Umukasya aalakila khuukabila bikuuka bibiramile syeenda ni shisiintsa she shikuuka shitweela. 14Lwekhuuba shikuuka sha Rewubeni, ni shikuuka sha Gadi, atweela ni shisiintsa shitweela she shikuuka sha Manase she bwaamanyaanga, byaamala khaale khuufuna kumukabo kwaabwe kwe liiswa 15khu luwaande lwe bwaamanyaanga wa Yorudaani, shanjelekha wa Yeriko.”

Baaraangilisi babaayeeta mu khukabananisa liiswa

16Umukasya waalomela Musa ari, 17“Umusaayi Eliyazaari ni Yoswa umusooleli wa Nuni nibo babaakane bakabananise liiswa mu ba Isiraeli boosi. 18Kane wiroborereyo umuraangilisi mutweelatweela khukhwaama mu buli shikuuka, bayeete mu khukabananisa liiswa. 19Kano niko kamasiina ke basaani beene: Kalebu umusooleli wa Yefune, khukhwaama mu shikuuka sha Yuda.

20Shelumieli umusooleli wa Amihudi,

khukhwaama mu shikuuka sha Simeyoni.

21Elidadi umusooleli wa Kisiloni,

khukhwaama mu shikuuka sha Benyamini.

22Buki umusooleli wa Yoguli,

umuraangilisi khukhwaama mu shikuuka sha Dani.

23Haniyeli umusooleli wa Efodi,

umuraangilisi khukhwaama mu shikuuka sha Manase, umusooleli wa Yusufu.

24Kemuweli umusooleli wa Shifutani,

umuraangilisi khukhwaama mu shikuuka sha Efurayimu, naye umusooleli wa Yusufu.

25Elizafani umusooleli wa Parunaki,

umuraangilisi khukhwaama mu shikuuka sha Zebuluni.

26Palitiyeli umusooleli wa Azani,

umuraangilisi khukhwaama mu shikuuka sha Isakaari.

27Ahihudi umusooleli wa Shelomi,

umuraangilisi khukhwaama mu shikuuka sha Asheri

28Pedaheli umusooleli wa Amihudi,

umuraangilisi khukhwaama mu shikuuka sha Nafutali.”

29Bano nibo basaani beesi Umukasya aalakila ari bayeete mu khuukabananisamwo liiswa lye mu shibala sha Kanaani akari mu baandu ba Isiraeli.