Swahili Bible2

33

Lukyeendo lwe ba Isiraeli khukhwaama i Misiri khuutsya i Mowabu

1Eyino niyo isaambo isi babaandu ba Isiraeli beruungikhamwo mu lukyeendo lwaabwe, nga ni baalurakikha khukhwaama i Misiri, nga bali mu matuuli kaabwe, aasi e buraangilisi bwa Musa ni Aroni. 2Musa waatsya nga arona luruungo lwe biifwo byeesi baatsya nga bawolelamwo, nga Umukasya umweene n’amulakila. Eyino niyo isaambo isi lukyeendo lwarungikhibwamo khukhwaama mu bifwo byeesi baarakikhilamwo.

3Babaandu ba Isiraeli baarakikha lukyeendo khukhwaamila i Ramusesi, khu shifukhu she likhumi na biraano she kumweesi kukuunyoowa, nga nisho shishaba shifukhu shishiila khu she Khuubirakho. Baryo babaandu bano baakhuumba khurura mu Misiri, nga ba Misiri boosi baabaloleleele. 4Khu mbuka yino ba Misiri baaba balikho basiikhaka kimilaambo kye basooleli baabwe baakiboole, beesi Umukasya aakhoonyaka. Shino shokyesanisa shiri Umukasya wawulile ba wele be mu Misiri boosi.

5Baryo babaandu ba Isiraeli baarura i Ramusesi, baatsya baawolela i Sukosi. 6Nga baarurire i Sukosi, baatsya baara i kaambi yaabwe i Esamu, shishaba khu ndulo khwe kumubiimbi. 7Nga baamile i Esamu, baakobolayo inyuma i Pi-Hahirosi, shishaba i bwaamanyaanga wa Bayaali-Zefoni, baara i kaambi yaabwe i Migidolu. 8Barura i Pi-Hahirosi, baambukha inyaantsa Imbesemu, baatsya mu mubiimbi. Baakyeenda lukyeendo lwe biifukhu nga bitaru, boola mu mubiimbi kwa Esamu, baatsya baara i kaambi yaabwe i Mara. 9Khukhwaama i Mara iyo, beelooselayo baatsya baara i kaambi yaabwe i Elimu, isi baanyoola tsisebele tse kameetsi likhumi na tsibili, ni kimisaala kamasheendu kamakhumi musaafu. 10Khukhwaama i Elimu, beloosela baatsya baawolela aambi ni nyaantsa isi balaanga bari Imbesemu. 11Nga baamile awo, beloosela baatsya baawolelakho mu mubiimbi kwa Sini. 12Nga baamile mu mubiimbi kwa Sini ikwo baatsya baawolelakho i Dofuka. 13Baama i Dofuka baatsya baawolela i Alushi. 14Baama i Alusi, baatsya baawolela i Refidimu, shiifwo mweesi bakhaanyoola kameetsi ke khuunywa ta. 15Nga baamile i Refidimu, baatsya baawolelakho mu mubiimbi kwa Sinaayi. 16Khukhwaama mu mubiimbi kwa Sinaayi ukwo, baatsya baawolelakho i Kiburosi Hataava. 17Nga baamile i Kiburosi Hataava, baatsya baawolela i Hazerosi. 18Khukhwaama i Hazerosi baatsya i Risima. 19Nga baamile i Risima, baatsya baawolelakho i Rimoni Perezi. 20Khukhwaama i Rimoni Perezi baatsya baawolelakho i Libuna. 21Khukhwaama i Libuna, baatsya i Risa. 22Nga baamile i Risa, baatsya baawolelakho i Kehelasa. 23Khukhwaama i Kehelasa, baatsya baawolela khu lukiingi Sheferi. 24Nga baarurire khu lukiingi Sheferi, baatsya baawolela i Harada. 25Nga baamile i Harada, baatsya baawolelakho i Makhelosi. 26Khukhwaama i Makhelosi, baatsya i Tahasi. 27Nga baamile Tahasi, baatsya baawolelakho i Tera. 28Nga baarurire i Tera, baatsya i Misika. 29Baama i Misika, baatsya baawolelakho i Hashimona. 30Khukhwaama i Hashimona, baatsya i Moserosi. 31Nga baamile i Moserosi, baatsya baawolelakho i Bene Yakani. 32Khukhwaama i Bene Yakani, baatsya i Hori Hagidigadi. 33Nga baamile i Hagidigadi, baatsya i Yotibasa. 34Khukhwaama i Yotibasa, baatsya baawolelakho i Aburona. 35Nga baarurire i Aburona, baatsya i Eziyoni Geberi. 36Nga baamile i Eziyoni Geberi, baatsya i Kadeshi, mu mubiimbi kwa Zini. 37Lwanyuma baasiimbula khukhwaama i Kadeshi, baatsya khu lukiingi Hori, luluuli khu lwaakha ni shibala sha Edomu.

3833.38: Bala 20.22-28; Maka 10.6; 32.50Umukasya waalakila umusaayi Aroni khuuniina khu ngaaki khwe lukiingi Hori, ibweene iyo isi aafwiila, khu shifukhu shishinyoowa she kumweesi kwe kharaano, mu mwiiko kwe kamakhumi kane khukhwaama nga ba Isiraeli baarura mu shibala she Misiri. 39Aroni aafwa nga oolesa kimiiko kye buukhulu shitoondo shitweela ni kamakhumi kabili na kitaru (123), khu lukiingi Hori.

4033.40: Bala 21.1Yaba khu mbuka yino isi umuyiinga wa Aradi, umu Kanaani, uwaba amenya mu mubiimbi kwe mwaalo wa Kanaani, aawulila bibiwaamba khu khwiitsa khwe babaandu ba Isiraeli.

41Baryo babaandu ba Isiraeli nga baarurire khu lukiingi Hori, baatsya baawolelakho i Zalumona. 42Nga baamile i Zalumona baatsya i Punoni. 43Khukhwaama i Punoni, baatsya baawolelakho i Obosi. 44Nga baamile i Obosi, baatsya i Iye Abarimu, shishaba khu lwaakha ni Mowabu. 45Nga baamile i Iye Abarimu, baatsya baawolelakho i Diboni Gadi. 46Khukhwaama i Diboni Gadi, baatsya i Alumoni Dibulasayimu. 47Nga baarurire i Alumoni Dibulasayimu, baatsya baawolelakho mu njiinji tsa Abarimu, aambi ni lukiingi Nebo. 48Khukhwaama mu njiinji tsa Abarimu, baatsya baawolelakho khu musaleela kwa Mowabu, aambi ni luluutsi Yorudaani, shanjelekha wa Yeriko. 49Ibweene iyo i kaambi yaabwe yaamalatana khu musaleela kwa Mowaabu kwoosi khukhwaamila i Besi-Yeshimosi, khuutsya khukhwoolela ilala i Abeli Shitimu.

Bilakilo isi ba Isiraeli nga bashiili khwambukha Yorudaani ta

50Khu mbuka isi ba Isiraeli baaba nga bashiili khu musaleela kwa Mowabu, aambi ni luluutsi Yorudaani, shanjelekha wa Yeriko, Umukasya waalomela Musa 51khuuwa babaandu ba Isiraeli bilakilo bino ari, “Nga mwambukhile luluutsi Yorudaani khukhwiinjila mu Kanaani, 52mwaakha khuuwonelamwo ilala babaandu abe babaamenyamwo. Mwaakhiile khukhwoonakisila ilala bifwaani byaabwe, mufuniaakake bibyeeso byaabwe byoosi. 53Lwanyuma mwinjilemo, mwiyilile shibala isho, lwekhuuba ise naashibaweele inywe khuuba shisheenywe. 5433.54: Bala 26.54-56Muli ni khuukabananisamwo liiswa, nga mukhupa bukokha, khuusiintsiila khu buboofu bwe bikuuka byeenywe. Shikuuka shishiili shiboofu, kumukabo kwaabwe kwe liiswa kwaakha khuuba kumuboofu nakwo, ni isi shikuuka shikyeekhe, kumukabo kwaabwe kwe liiswa kuli ni khuuba kumukyeekhe. 55Ne siinga mukhaasikha khuuwoonamwo babaandu babaamenyamwo, abo babaakane baramemwo, kane bekyele be busiku isi muli nga bisaala byeesi basongoole khuubawunaka mu moni tseenywe, naluundi babe nga kamakhwa khuubawunaka mu mbafu mweenywe. 56Ni nase kane imbakhole inywe buubi naabi, nga ni narekekha khuubakhola nibo.”