Swahili Bible2

31

Buusoolo akari e ba Isiraeli ni ba Midiyani

1Umukasya waalomela Musa ari, 2“Ingana iwe wiliyaase babaandu ba Midiyani ubawe shitaambiso lweesho sheesi baakhola khu baandu ba Isiraeli. Ne lwanyuma lwayo ukhaafwe.”

3Lwanyuma Musa waalomela babaandu ari, “Nimuroboreyo batweela khu basaani, baabalile bye buusoolo byaabwe, batsye bebwakale Midiyani, khuubeliyaasa nga Umukasya n’ashikana. 4Khukhwaama mu buli shikuuka, kane muroboreyo basaani baboola shikana shitweela (1,000) khuutsya mu busoolo.”

5Baryo baaroborayo basaani shikana shitweela (1,000) khukhwaama mu buli shikuuka, boolesayo baselikhale kumukaanda mutweela ni bikana bibili (12,000), babaabalila bye busoolo. 6Musa waabasiindikha khuutsya khuusoolana, basaani shikana shitweela khukhwaama mu buli shikuuka. Ni Finehasi umusooleli w’omusaayi Eliyazaari, aatsya ni nabo nga waasutile bibiindu biikhosefu bye lisari atweela ni tsikhoombi tse khuurewula. 7Baryo baatsya baasoolanisa ba Midiyani, nga Umukasya umweene n’alakila Musa, beeraka basaani boosi. 8Mu baandu beesi beeraka mwabamo baayiinga baraano be ba Midiyani nga nibo Evi, Rekemu, Zuri, Huri, ni Reba. Beeriramo ni Balaamu umusooleli wa Beyori.

9Baryo babaandu ba Isiraeli bawaambaka bakhasi be mu Midiyani, atweela ni babaana bakyeekhe beene, baayilaka ni tsikhaafu ni kamasheese kaabwe keene, atweela ni bye buyiindifu byaabwe bibiindi. 10Booshaka ni biriimba byaabwe mweesi baamenyatsaka atweela ni tsikaambi tsaabwe tseene. 11Beyilila bibiindu byeesi baanuulaka byoosi, nga mulimo babaandu beesi baawaambaka atweela ni bibyaayo byeene. 12Lwanyuma bareera baabowe bano, atweela ni bibiindu byoosi isi Musa ni isi umusaayi Eliyazaari, nga bali atweela ni babaandu ba Isiraeli babaaramile boosi, babaaba bali mu kaambi yaabwe khu musaleela kwa Mowaabu, aambi ni Yorudaani, shanjelekha wa Yeriko.

Liiye likobola khukhwaama mu busoolo

13Musa n’umusaayi Eliyazaari, atweela ni baaraangilisi babaandi ba Isiraeli babaaramile, baarura ibulafu we kaambi, khuutsya khwakaanila liiye. 14Ne Musa lirima lyamuniina khulwe baakhulu be liiye babaaraangilila bikana, ni naabo babaaraangilila bitoondo, babaakobola khukhwaama mu busoolo. 15Kila Musa abareeba ari, “Lwashiina mulekhile bakhasi nga baalamu? 1631.16: Bala 25.1-9Inywe simushebulila muri babeene bano nibo babaaloondelela kamakhula ka Balaamu, naluundi nibo babaakila babaandu ba Isiraeli baashuukha baarura khu Mukasya i Peyori, nisho shaakila kitsali wakhoonyaka babaandu b’Omukasya ta? 17Ari ngana mukhoonyake babaana besiinde boosi, naluundi ngana mukhoonyake bakhasi boosi babaakonakho ni basaani. 18Ne mukhakhoonyaka bakhasi babaashiili khuukonakho ni basaani ta. Munyala mwaabalekha nga baalamu, khuuba babeenywe.”

19Kila Musa eloosela khulomela baselikhale ari, “Siinga ibawo umuundu yeesi khwiinywe uwakhoonyelekho umuundu yeesi, namwe uwawaambilekho khu mulaambo kwoosi, ali ni khuurama ibulafu we lisari khuumala biifukhu musaafu. Khu shifukhu she khataru ni khu she kumusaafu, mwaakha khukhwipyeeluusa inywe mwabeene, atweela ni babaandu beesi mwawaambile. 20Lwanyuma mwisiinge mwipyeeluuse buli shikwaaro shoosi, na buli shiindu shoosi shishakholebwa khukhwaama mu mahafu, namwe mu bwooya bwe mbusi, namwe shishiindu shoosi shishakholebwa khukhwaama mu kuusaala.”

21Umusaayi Eliyazaari weeloosela khuuboolela baselikhale babaakobola khukhwaama mu busoolo ari, “Shino nisho shishikanibwa khukhwaama mu shilakilo sheesi Umukasya aalakila Musa: 22Izaabu yonyene, ni feetsa, ni buroonzi, ni ayoni, ni tiini, ni liidi, 23na buli shishiindu shishiindi shoosi sheesi kumulilo kukhanyala kwoosha ta, shaakha khuubirira mu mulilo, nio shibe shikwalaafu. Ne lwanyuma shaakha khuusiingibwa ni kameetsi ke khuupyeeluusa. Ne shishiindu shishiindi shoosi sheesi kumulilo kunyala kwoosha, shaakha khuupyeeluusibwa ni kameetsi. 24Ne khu shifukhu she kumusaafu, musiinga bikwaaro byeenywe, nio lwanyuma mube bakwalaafu. Nga isho shaweele, muryo nio munyalise khukhwiilayo mu kaambi.”

Khuukabanana bibiindu byeesi baamisa mu Midiyani

25Umukasya waalomela Musa ari, 26“Iwe wamweene n’umusaayi Eliyazaari atweela ni baaraangilisi be tsiingo babaandi, muli khuubalilila mumanye buukali bwe babaandu ni bisolo byeesi mwawaambile. 27Mubikabananisemo bisiintsa bibili, akari e baselikhale babaatsya khuusoolana, ni babaandu babaaramile baabusheele. 28Khukhwaama khu shisiintsa sheesi baselikhale babaasoolana mu busoolo bali ni khuuyila, khu buli bitoondo biraano bye babaandu beesi mwawaambayo, namwe tsikhaafu, namwe tsisikilya, namwe kamasheese, namwe tsimbusi, murusakho shitweelatweela, khuuwaanayo nga kumukabo isi Umukasya. 29Muyile kumukabo kuno, mukuwaaneyo isi umusaayi Eliyazaari, khuuba nga shiwaanwa sha buraawa isi Umukasya. 30Ne khukhwaama khu shisiintsa she bibiindu isi babaandu ba Isiraeli ba busheele, khu buli kamakhumi karaano ke babaandu beesi mwawaambayo, namwe tsikhaafu, namwe tsisikilya, namwe kamasheese, namwe tsimbusi, khu bino murusakho shitweelatweela, mubiwaaneyo isi ba Levi babaaloolelela Lisari Likhosefu ly’Omukasya.” 31Baryo Musa ni Eliyazaari baakhola sheesi Umukasya aabalakila khuukhola.

32Bibiindu bibyaramakho khwiibyo byeesi baselikhale baarama nabyo byaba byoola biri: Kamasheese kimyeeka kisesaba, kimikaanda musaafu, ni bikana biraano (675,000), 33tsikhaafu kimikaanda musaafu ni bikana bibili (72,000), 34tsisikilya kimikaanda kisesaba ni shikana shitweela (61,000), 35ni bakhasi abe babaakhaakonatsakakho n’umuseetsa yeesi ta, baboola kimikaanda kitaru ni bikana bibili (32,000).

36Shisiintsa shitweela sheesi baselikhale babaasoolana mu busoolo shaba shiri: Kamasheese kimyeeka kitaru, kimikaanda kitaru, bikana musaafu ni bitoondo biraano (337,500), 37khu tsino kumukabo kukwawaanibwayo isi Umukasya kwaba bitoondo bisesaba ni kamakhumi musaafu na tsiraano (675); 38Tsikhaafu tsaba kimikaanda kitaru ni bikana bisesaba (36,000), khu tsino tsitsawaanibwayo isi Umukasya tsaba kamakhumi musaafu na tsibili (72); 39Tsisikilya natso tsaba kimikaanda kitaru, ni bitoondo biraano (30,500), khu tsino tsitsawaanibwayo isi Umukasya tsaba kamakhumi kasesaba na ndweela (61), 40ni babaandu baaba kumukaanda mutweela ni bikana bisesaba (16,000), khu bano babaawaanibwayo isi Umukasya baaba kamakhumi kataru na babili (32). 41Aryo Musa waawa umusaayi Eliyazaari kumukabo kuno, kukwaba shiwaanwa sha buraawa isi Umukasya, nga Umukasya umweene n’alakila.

42Ni shisiintsa shishaweebwa babaandu ba Isiraeli, sheesi Musa aawulakho khukhwaama khu bye baselikhale babaatsya mu busoolo, shaba shiri, 43shisiintsa shitweela she babaandu shaba kamasheese kimyeeka kitaru, kimikaanda kitaru, bikana musaafu ni bitoondo biraano (337,500), 44tsikhaafu natso kimikaanda kitaru, ni bikana bisesaba (36,000); 45Tsisikilya kimikaanda kitaru ni bitoondo biraano (30,500), 46ni babaandu baaba kumukaanda mutweela ni bikana bisesaba (16,000). 47Khukhwaama khu shisiintsa shitweela she bibiindu bye ba Isiraeli, ni khu baandu baabwe beesi baawaamba, Musa aatsya nga abukulakakho kamakhumi karaano, nga Umukasya n’amulakila, waabiwa ba Levi, nga nibo babaaba baloolelela Lisari Likhosefu ly’Omukasya.

48Lwanyuma baakhulu be liiye, nga nibo babaaba baakhulu be bikana, ni baakhulu be bitoondo, baatsya isi Musa, 49baamulomela bari, “Musakhulu, ifwe babaakaanisi boowo khwaamile khuubala baselikhale be mu liiye lyeefwe beesi khuloolelela, khwaanyoolile nga boosi baliwo. 50Nashiryo bona khwaareerire biwaanwa isi Umukasya, byeesi buli mutweela khuusifwe khwawaamba khukhwaama khu ba Midiyani, nga nibyo bino: Bubuuma bwe zaabu, bubuuma bwe khukhwiisabikha khu makhono ni mu milo, tsintsiyi, bubuuma bwe khu maru, ni matoongo. Bino khwaabireerire nga biwaanwa bye khuusikula isi Umukasya, nio eloosele khuukhutseeta ifwe buulayi.”

51Baryo Musa n’umusaayi Eliyazaari baakaanila biwaanwa bye zaabu ibyo, bibyareerebwa nga bubuuma bwe khukhwiisabikha. 52I zaabu iyo yoosi isi Musa ni Eliyazaari baakaanila khukhwaama khu baakhulu be liiye be bikana, ni bitoondo yoolesa buukali aambi tsikilo bitoondo bibili (200). 53Ne buli mutweela khu baselikhale aaba nga werusiilekho khaale bibiindu bibyaba bibyeewe. 54Musaambo iyo, Musa n’umusaayi Eliyazaari baakaanila i zaabu khukhwaama khu baakhulu be baselikhale be bikana ni be bitoondo, baabireera mu Lisari Likhosefu ly’Omukasya, khuuba nga shishebuliso isi ba Isiraeli.