Swahili Bible2

29

Biwaanwa bye Kamayiiya ke Kumwiiko Kumushaakha

(Ba Levi 23.23-25)

1Khu shifukhu shishinyoowa she kumweesi kwe kumusaafu, muli ni khuubuusana atweela lwe khukhwisaaya, mulekhe khukholakho kumulimo kwoosi ta. Khu shifukhu khweene ikhwo, muli ni khukhwikhoya nga mufuura tsikhoombi. 2Muli ni khuureera khu sheeso sh’Omukasya, shiwaanwa she khukhwoosha she wuunwa isooleli ndweela, limiiku litweela, ni kamasheese kamasooleli ke kumwiiko mutweela kwe buukhulu musaafu, nga byoosi mbaawo shishiilikho buuleme bwoosi ta. Bino byoosi muli ni khuubyoosha nga isaayilo intsoshe iyintsikhoyesa. 3Muwaaneyo shiwaanwa she buufu buunose naabi tsikilo tsitaru, nga bwaatubaasibwilemo ni kamafura ke kuusaala ku olivu, khuutsiila atweela ni saayilo iye wuunwa, khuuba nga shiwaanwa she biilime. Ni buufu bweene tsikilo tsibili khuutsiila atweela ni saayilo iye limiiku, 4ni kilo ndweela iye buufu buunose naabi, nga bwaatubaasibwilemo ni kamafura ke kuusaala ku olivu, bwaakha khuuwaanibwayo khuutsiila atweela ni lisheese lisooleli litweela. 5Mwaakha ni khuuwaanayo ni ndurume ndweela, shiwaanwa lwe khusiinga bibyoonako bye babaandu. 6Muli ni khuuwaanayo biwaanwa bino, nga mubiloosela khu biwaanwa bibiwaanibwayo bibyooshe bya busheele, bye shifukhu shishinyoowa mu mweesi, bye biilime bibyoomu, ni bye viini. Lisuusi lilikane liniine mu ngaaki khukhwaama khu biwaanwa bino liwunye buulayi khukhuuntsikhoyesa ise.

Biwaanwa bye khu Shifukhu she Khukhwiiyakhila Bibyoonako

(Ba Levi 23.26-32)

729.7: Lev 16.29-34Khu shifukhu she likhumi she kumweesi kwe kumusaafu, muli ni khuubuusana atweela lwe khukhwisaaya. Khu shifukhu khweene ikhwo, mwaakha khukhwiitaambisa kimibili kyeenywe nga simulyakho shishiindu shoosi ta, naluundi mukhakholakho kumulimo kwoosi ta. 8Naluundi muli ni khuuwaanayo shiwaanwa shishooshe isi Umukasya, nga mureera khu sheeso sheewe iwuunwa isooleli ndweela, limiiku lilyahaangalila ilala litweela, ni kamasheese kamasooleli musaafu, kakoolesa kumwiiko mutweela buukhulu. Ne nga khu bino byoosi, ikhabawo na shitweela shishiilikho buuleme bwoosi ta. 9Muwaaneyo ni tsikilo tsitaru tse buufu buunose naabi, nga bwatubaasibwilemo ni kamafura ke kuusaala ku olivu, khuutsiila atweela ni shiwaanwa she wuunwa, khuuba nga nasho shiwaanwa she biilime bibyoomu. Tsikilo tsibili tse buufu bweene nga bwatubaasibwilemu ni kamafura ke ku olivu, khuutsiila atweela ni shiwaanwa she limiiku, 10ni kilo ndweela iye buufu bweene, nga bwatubaasibwilemu ni kamafura ke ku olivu, khuutsila atweela ni shiwaanwa sha buli lisheese lisooleli litweela lye kumwiiko mutweela. 11Muwaaneyo ni ndurume ndweela khuuba shiwaanwa she khuusiinga bibyoonako bye babaandu. Indurume yino ili ni khuuwaanibwayo nga itsiila atweela ni shiwaanwa she khuuloomba khukhwiiyakhila bibyoonako sha busheele, ni biwaanwa bibiindi bya busheele, nga bye biilime bibyoomu, ni bye viini.

Biwaanwa bye Kamayiiya ke Kamasari

(Ba Levi 23.33-44)

1229.12: Lev 23.34; Maka 16.13-15Khukhwaamila khu shifukhu she likhumi na biraano, she kumweesi kwe kumusaafu, muli ni khuubuusana atweela lwe khukhwisaaya. Mu khubuusana khuno, mwaakha khuuba ni kamayiiya ke kamasari, lwe khukhuushebulila ise, khuumala biifukhu musaafu bibuufu. 13Khu shifukhu shishinyoowa khu nibyo, muli ni khuuwaanayo shiwaanwa she khukhwoosha isi Umukasya, khuuba nga isilikakha iwunya buulayi. Muli ni khuureera khu sheeso sh’Omukasya tsiwuunwa tsisooleli likhumi na tsitaru, kamamiiku kamakhulu kabili, ni kamasheese kamasooleli likhumi na kane, kakoolesa kumwiiko mutweela buukhulu. Bisolo bino byoosi nga sibilikho ni buuleme bwoosi ta. 14Muwaaneyo ni tsikilo tsitaru tse buufu buunose naabi, nga bwatubaasibwilemo ni kamafura ke kuusaala ku olivu, khuutsiila atweela ni shiwaanwa she wuunwa ndweela, khuuba nga nasho shiwaanwa she biilime bibyoomu. Tsikilo tsibili tse buufu bweene, nga bwatubaasibwilemo kamafura ke ku olivu, khuutsiila atweela ni shiwaanwa sha buli limiiku litweela, 15ni kilo ndweela iye buufu ubwo nga bwatubaasibwilemo ni kamafura ke ku olivu, khuutsila atweela ni shiwaanwa sha buli lisheese lisooleli litweela lye kumwiiko mutweela. 16Muli ni khuuwaanayo indurume ndweela khuuba nga isaayilo iye bibyoonako, nga itsiila atweela ni biwaanwa bibyooshe bya busheele, ni biwaanwa bye biilime bibyoomu, ni shiwaanwa she viini.

17Khu shifukhu shishikhola khabili, muli khuwaanayo tsiwuunwa likhumi na tsibili, kamamiiku kabili, kamasheese kamasooleli ke kumwiiko mutweela kwe buukhulu likhumi na kane. Ne bisolo bino sibili ni khuubakho buuleme bwoosi ta. 18-19Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

20Khu shifukhu she khataru, muli ni khuuwaanayo tsiwuunwa likhumi na ndweela, kamamiiku kabili, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta. 21-22Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa. 23Khu shifukhu she khaane, muli ni khuuwaanayo tsiwuunwa likhumi, kamamiiku kabili, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta. 24-25Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa. 26Khu shifukhu she kharaano, muli ni khuuwaanayo tsiwuunwa syeenda, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta. 27-28Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa. 29Khu shifukhu she khasesaba, muli ni khuuwaanayo tsiwuunwa shinaane, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta. 30-31Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa. 32Khu shifukhu she kumusaafu, muli ni khuuwaanayo tsiwuunwa musaafu, kamamiiku kabili, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta. 33-34Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

35Khu shifukhu she shinaane, muli ni khuubuusana luundi lwe khukhwisaaya, mulekhe khukholakho kumulimo kwoosi ta. 36Muli ni khuureera khu sheeso sh’Omukasya, shiwaanwa she khukhwoosha she wuunwa isooleli ndweela, limiiku litweela, ni kamasheese kamasooleli ke kumwiiko mutweela kwe buukhulu musaafu, nga byoosi mbaawo shishiilikho buuleme bwoosi ta. Bino byoosi muli ni khuubyoosha nga isaayilo intsoshe iyintsikhoyesa. 37Muli ni khuuwaanayo shiwaanwa she biilime bibyoomu shishaakhila, ni shiwaanwa she viini, khuutsiila atweela ni shiwaanwa sha buli shisolo, nga shiilakilo ni shiloma. 38Muli ni khuuwaanayo indurume ndweela khuuba nga isaayilo iye bibyoonako, nga itsiila atweela ni biwaanwa bibyooshe bya busheele, ni biwaanwa bye biilime bibyoomu, ni shiwaanwa she viini.

39Biwaanwa bino kane mubiwaanatsakeyo isi Umukasya khu mbuka inyene iyareebwawo iye kamayiiya, khukhwiisaaya, atweela ni khuuwaana biwaanwa bya buli saambo, byeesi muli ni khuuwaanayo, nga mwabeene mwikanisa, namwe khuuwaanayo lwe bisuubiso byeesi mukhola.

40Aryo Musa waaboolela babaandu ba Isiraeli biilomo byoosi byeesi Umukasya aamulomela khuubaboolela, bibiwaamba khu tsisaayilo.