Swahili Bible2

28

Biwaanwa bya busheele

(She Lukyeendo 29.38-46; Ba Levi 6.8-13)

1Umukasya waalomela Musa 2khuutsya aboolele babaandu ba Isiraeli ari: Bali ni khuuwaanayo isi Wele biwaanwa bye biilyo, bibiwunya buulayi, bibimwikhoyesa, khu mbuka inyene iyareebwawo. 3Naluundi waamulomela abalome ari, biwaanwa bye khuuwaanibwayo nga bibyooshe isi Umukasya bya buli shifukhu nibyo, kamamiiku kabili kakoolesa kumwiiko mutweela buukhulu, nga sikalikho ni buuleme bwoositsana ta. 4Nga limiiku litweela lye khuuwaanibwayo kumutikhinyi, ni liliramile nga nilyo lye khuuwaanibwayo angoloobe. 5Nga khu buli limiiku litweela khuli ni khuutsiilakho shiwaanwa she bilime bibyoomu, ikilo ndweela iye buufu bweenywe bubuuli buunose naabi, nga bwatubaasibwilemo ni lita ndweela iye kamafura ke kuusaala ku olivu. 6Shiwaanwa shishooshe shino, shishalakilwa khu lukiingi Sinaayi, nga shaakha khuuba nga shookhebwela ilala, khuniinisa isilikakha iwunya buulayi mu ngaaki isi Umukasya. 7Shiwaanwa she khuunywa nasho shaakha khuutsiilakho khu buli isaayilo: I lita ndweela iye viini yaakha khuutsukhibwa khu sheeso isi Umukasya. 8Ndi angoloobe, limiiku lye khaabili nalyo lili ni khuuwaanibwayo, musaambo ndweela nga lye kumutikhinyi, shiwaanwa she biilime bibyoomu, ni shiwaanwa she viini nasho musaambo nyene. Khukhwaama mu saayilo tsino, isilikakha iwunya buulayi iniine mu ngaaki isi Umukasya.

Shiwaanwa sha Sabato

9Khuulooselakho, khu shifukhu sha Sabato, muli ni khuuwaanayo kamamiiku kabili kakoolesa kimiiko kibili kye buukhulu, nga sikalikho ni buuleme bwoosi ta. Tsisaayilo tsino tsaakha khuuwaanibwayo atweela ni shiwaanwa she viini, ni khutubakho tsikilo tsibili tse buufu bwe ŋaano, nga bwatubaasibwilemo ni kamafura ke kuusaala ku olivu. 10Shiwaanwa shishooshe shino, shili ni khuuwaanibwayo khu buli shifukhu sha Sabato, khuuloosela khu shiwaanwa sha buli shifukhu ni shiwaanwa she viini shakhwo.

Shiwaanwa she shifukhu shishinyoowa mu mweesi

11Khu shifukhu shishinyoowa mu mweesi, muli ni khuuwaanayo khu sheeso sh’Omukasya, tsiwuunwa tsibili, limiiku lilyahaangalila ilala litweela, ni kamakheese kakaashili kamasooleli musaafu kakoolesa kumwiiko mutweela buukhulu, nga mbaawo buuleme bubukalikho ta. 12Nga shiwaanwa she biilime bibyoomu, muli ni khuuwaanayo tsikilo tsitaru tse buufu buunose naabi, nga bwatubaasibwilemo ni kamafura ke kuusaala ku olivu. Bino nga bitsiila atweela ni iwuunwa ndweela iwaanibwayo. Ne tsikilo tsibili tse buufu tsili ni khuuwaanibwayo atweela ni limiiku litweela liliiba lyawaanibwileyo. 13Ne khuutsiila khu shiwaanwa she likheese liliishiili lisooleli litweela, muli ni khuulooselakho ikilo ndweela iye buufu buunose naabi, nga bwatubaasibwilemo ni kamafura kakaakhalaanga. Isilikakha iwunya buulayi, iniina mu ngaaki khukhwaama mu tsisaayilo tsino, khukhwikhoyesa Umukasya. 14Shiwaanwa she viini shituufu shili ni khuuba tsi lita tsibili, tse khuutsiila khu wuunwa ndweela, ne i lita ndweela ni shisiintsa khutsiila khu limiiku, ni lita ndweela niyo itsiila khu likheese lilyaana. Shino shili shilakilo she biwaanwa bibyooshe, bye khu shifukhu shishinyoowa mu buli mweesi, mu mwiiko kwoosi. 15Khuulooselakho khu shiwaanwa sha buli shifukhu, muli ni khuuwaanatsakayo ni ndurume ndweela, khuuba nga shiwaanwa she khuusiinga shishoonako.

Biwaanwa bye kumukaati kukukhalimwo kamamela ta

(Ba Levi 23.5-14)

1628.16: Luky 12.1-13; Maka 16.1,2Shifukhu she Kamayiiya ke Khuubirakho k’Omukasya, muli ni khuukekhoyela khu shifukhu she likhumi na bine, she kumweesi kukuunyoowa. 1728.17: Luky 12.14-20; 23.15; 34.18; Maka 16.3-8Ne khu shifukhu shishiilakho she likhumi na biraano, muli ni khuurakikha kamayiiya ke kumukaati kukukhalimwo kamamela ta. Kamayiiya kano kali ni khuubawo khuumala i sabiiti imbuufu, nga mwiisamwo Umukasya lukoosi, nga mulya kumukaati kukukhalimwo kamamela ta. 18Khu shifukhu shishinyoowa she kamayiiya kano, mweesitsana mwaakha khuuwolakho, mulekhe khuuraamba ta, mwiitse atweela khukhwisaaya. 19Muli ni khuureera khu sheeso sh’Omukasya, muwaaneyo tsiwuunwa tsibili tsitsishili tsisooleli, ni limiiku litweela lilyatsowela ilala buulayi, ni kamakheese kakaashilikho kamasooleli musaafu, kakoolesa kumwiiko mutweela buukhulu. Mwaakha khuubona muri bino byoosi sibilikho ni buuleme bwoosi ta. 20Muwaaneyo ni shiwaanwa she buufu bubwoola tsikilo tsitaru, bubuuli buunose naabi, nga bwaatubaasibwilemo ni kamafura ke kuusaala ku olivu, khuutsiila khu buli iwuunwa ndweela. Ne tsikilo tsibili tse buufu bweene nga bwaatubaasibwilemo kamafura keene, khuutsiila khu buli limiiku litweela, 21ni kilo ndweela iye buufu, itsiile atweela ni likheese liilishiili lisooleli litweela. 22Muli ni khuuwaanayo indurume ndweela, khuuba nga shiwaanibwayo lwe khuusiinga bibyoonako bye babaandu. 23Bino muli ni khuubiwaanayo, khuuloosela khu biwaanwa bye khukhwoosha kumutikhinyi bya busheele. 24Ni musaambo niyo ndweela, muli ni khuuwaanayo shiwaanwa she biilyo isi Umukasya, khuumala biifukhu musaafu, khuubawo isilikakha iwunya buulayi khuumwikhoyesa. Shiwaanwa she biilyo shino nasho shaakha khuuwaanibwayo khuutsiila atweela ni biwaanwa bya busheele. 25Ne khu shifukhu shishakamayo she kumusaafu, kane shibatsake she khuuwolakho, mulekhe khukholakho kumulimo kwoosi ta, ne shibatsake she khukhwisaaya.

Biwaanwa bye Kamayiiya ke Likyesa

(Ba Levi 23.15-22)

2628.26: Luky 23.16; 34.22; Maka 16.9-12Umukasya waabalooselakho ari, khu shifukhu shishinyoowa she Kamayiiya ke Likyesa, nga muwaanayo shiwaanwa she biilime bishaakha isi Umukasya, mwaakha khuubuusana atweela lwe khukhwisaaya, naluundi ikhabawo kumulimo kwoosi kweesi mukholakho ta. 27Muwaaneyo shiwaanwa shishooshe she tsiwuunwa tsitsiili tsisooleli tsibili, limiiku litweela, ni kamamiiku musaafu kakaashiili kamasooleli kakoolesa kumwiiko mutweela buukhulu, nio isilikakha iwunya buulayi iniine isi Umukasya khuumwikhoyesa. 28Muli ni khuuwaanayo ni tsikilo tsitaru tse buufu buunose naabi, nga bwaatubaasibwilemo ni kamafura ke kuusaala ku olivu, khuuloosela khu buli iwuunwa indweela, khuuba nga shiwaanwa she biilime. Tsikilo tsibili tse buufu bweene buunose naabi, nga bwatubaasibwilemo ni kamafura ke ku olivu, nabwo khuutsiila atweela ni limiiku litweela, 29ni kilo ndweela iye buufu, nga bwatubaasibwilemo ni kamafura ke ku olivu, nabwo khuutsiila tweela ni lisheese lisooleli litweela. 30Muwaaneyo indurume ndweela, khuuba nga shiwaanwa she khuusiinga bibyoonako. 31Muwaanatsakayo biwaanwa bino byoosi bye khukhwoosha bya busheele, ni bye biilime, nga mulooselakho ni shiwaanwa she viini. Muli ni khuubonela ilala muri, mbaawo khu biindu bino shishiilikho buuleme bwoosi ta.