Swahili Bible2

27

Bakhaana ba Zelofehadi

1Bakhaana ba Zelofehadi baaba nibo bano: Mahila, Nowa, Hogula, Milika, ni Tiruza. Zelofahadi yuno aaba umusooleli wa Heferi. Heferi aaba umusooleli wa Gileyadi. Gileyadi aaba umusooleli wa Makiri. Makiri aaba umusooleli wa Manase. Manase umusooleli wa Yusufu. 2Shifukhu shitweela, bakhaana bano baatsya khukhwaakaananamo ni Musa ni Eliyazaari, atweela ni baaraangilisi babaandi ba Isiraeli, ni lituuli lyoosi lye ba Isiraeli, iburaangisi we Lisari Likhosefu ly’Omukasya. Kila baloma bari, 3“Ifwe paapa weefwe afwiila iyo mu mubiimbi. Niye s’afwa lwekhuuba aaba mutweela khu baloondeleli ba Kora, babaakhaandisa Umukasya ta, ne aafwa khulwe shishoonako shisheewe khu bweewe. Ate niye s’asaalakho babaana besiinde ta. 4Ari lwekhuuba bari paapa weefwe s’asaalakho babaana besiinde ta, lisiina lyeewe lihele, liweelewo ilala mu Isiraeli? Khukana nafwe mukhuwekho liiswa khuuba busikha bweefwe, nga baalebe be mu shikuuka sheefwe babaandi ni bali.”

5Musa waatsya khukhwiireebakho isi Umukasya khuubona shiina she khuukhola. 6Kila Umukasya naye amwiilamo, waamulomela ari, 727.7: Bala 36.2“Bakhaana ba Zelofehadi bano bali batuufu mu sheesi baloombile. N’ubawe buusikha bwaabwe, nga abe bweesi paapa waabwe yandifunile mu balebe beewe, nio manya busikha bweewe naye bwelooselayo. 8Boolela babaandu ba Isiraeli boosi uri, umuundu yeesi siinga afwa nga waakhusaalakho umwaana umusiinde ta, umwaana weewe umukhaana niye ukana amwiililewo nga umusikha we liiswa lyeewe. 9Ne siinga aba nga s’aliyo akhaba n’umwaana umukhaana ta, kane babandaaye bamwiililewo nga baasikha be liiswa lyeewe. 10Ne ndi siinga aba nga s’aliyo ni babandaaye babeene ta, kane babandaaye ba paapa weewe babe baasikha be liiswa lyeewe. 11Ne siinga paapa weewe aaba nga s’alikho ni babandaaye ta, busikha bwe liiswa ilyo, bwaakha khuutsya isi umulebe uwe aambi muungo umwo. Shino shili shilakilo luundi likaambila lyase, nga Umukasya, nashiryo babaandu ba Isiraeli boosi baakha khuulitsiilakho.”

Yoswa bamurobora khuuba umuraangilisi

(Kamakaambila 31.1-8)

1227.12: Maka 3.23-27; 32.48-52Umukasya waalomela Musa ari, “N’uniine khu lukiingi lwa Abarimu luno, ibweene iyo, unyalise khuulola khu shibala sheesi intsya khuwa babaandu ba Isiraeli. 13Nga waamalile khuushibonakho busa, ukhaafwe, nga waandaayo Aroni naye n’afwa. 14Lwekhuuba inywe mweembi mwamiinyaalila shiilakilo shase, nga muli mu mubiimbi kwa Zini, aambi ni Meriba i Kadeshi. Khu mbuka iyo isi babaandu ba Isiraeli boosi beeluŋuunyila, inywe mwaalekha khuuweesa lisiina lyase shiriifwa mu moni tsaabwe ta.”

15Musa weelamwo isi Umukasya ari, 16“Iwe uli Umukasya Wele, iwe niye buurakikhilo bwe buulamu bwa buli shiindu shiilamu shoosi, ikhuloomba ndi, urobore umuundu unyala waaraangilila babaandu bano. 1727.17: 1 Bay 22.17; Ezek 34.5; Mat 9.36; Mako 6.34Babaandu boowo bano bakhiile khuubayo n’umuundu unyala wabaraangilila khuutsya mu busoolo, ni khukobolayo ingo, nio balekhe khuba nga kamasheese kakaakyeendaana busa, nga sikalikho n’umwaayi ta.”

1827.18: Luky 24.13Umukasya waalomela Musa ari, “Yila Yoswa umusooleli wa Nuni, lwekhuuba niye alimo kumwoyo kukunyalisa, utsye umurekho kamakhono koowo khu murwe kweewe. 19Umuyile umwiimise iburaangisi w’omusaayi Eliyazaari, ni lituuli lyoosi lye babaandu ba Isiraeli. Abweene awo umurobore khuuba umuraangilisi waabwe nga boosi babona. 20Umuwekho bunyala bwoowo bweesi ubeele nabwo, nio babaandu boosi ba Isiraeli bamuwuliilisatsake. 2127.21: Luky 28.30; 1 Sam 14.41; 28.6Ne Yoswa aakha khukhwiyikinatsaka naabi umusaayi Eliyazaari, lwekhuuba niye ukane eetsatsake khukhwiireebakho isi indi khukhalawo khwase nga araambisa Urimu. Musaambo yino Eliyazaari niye ukane abe nga okyesanisa shiina she khuukhola isi Yoswa ni ba Isiraeli boosi, khuutsya mu busoolo, namwe ta.”

22Aryo Musa waakhola nga Umukasya n’amulakila, waayila Yoswa waamwiimisa iburaangisi w’omusaayi Eliyazaari, ni lituuli lye babaandu ba Isiraeli lyoosi. 2327.23: Maka 31.23Abweene awo, Musa waarakho khu Yoswa kamakhono keewe, waamurobora khuuba umuraangilisi uwiilawo, nga Umukasya n’alakila.