Swahili Bible2

26

Khuubala babaandu ba Isiraeli khwe khaabili

126.1: Bala 1.1-46Lwanyuma lwa kitsali uwahesa babaandu khukhwaakama, Umukasya waalomela Musa ni isi Eliyazaari ari, 2“Ingana ubale babaandu ba Isiraeli, umanye bali beenga khukhwaama mu buli muungo. Ruunga luruungo lwe basaani khukhwaamila khu miiko kamakhumi kabili khuuniina angaaki, babanyala khukhwitubaasa khu liiye khuutsya mu busoolo khuusoolana.”

3Khu mbuka yino abe babaandu ba Isiraeli bebuusile mu kaambi tsaabwe khu ngoongo tsa Mowaabu, shanjelekha wa Yorudaani. Musa ni Eliyazaari babalomela 4khukhola sheesi Umukasya aabalomela, khuubala babaandu baboolesa kimiiko kamakhumi kabili ni khuuniina angaaki.

Babaandu ba Isiraeli babeetsa khukhwaama mu Misiri, baaba nibo bano: 5Be shikuuka sha Rewubeni, uwaba umusooleli umukhulu uwa Yakobo, bukuuka bufwiiti bwaba nibwo Hanoku, Palu, 6Hezironi, ni Karimi. 7Boosi atweela boola kimikaanda kine, bikana bitaru, bitoondo musaafu, ni kamakhumi kataru (43,730). 8Be muunda ya Palu, yaba Eliyabu 9ni basooleli ba Eliyabu baaba nibo Nemuweli, Dasani ni Abiramu. Baabili bano Dasani ni Abiramu nibo abe beesi babaandu baarobora, neendi nibo babaaloondelela Kora, baakhaandisanisa Musa, ni Aroni atweela n’Umukasya. 10Babeene bano nibo beesi Umukasya ekulila liloba lyaasama lyaamila, baafwiila atweela ni Kora, ni baloondeleli beewe boosi. Ni khu mbuka nyene niyo ndweela, kumulilo kweetsa kwaahesa babaandu bitoondo bibili ni kamakhumi karaano (250), nibo bekyela she khuureewula isi babaandu. 11Ne basooleli ba Kora nibo sibaahela ta.

12Be mu shikuuka sha Simeoni, baaba mu bukuuka bukyeekhe nga buno: Kha Nemuweli, Yamini, Yakini, 13Zera, ni Shawulu. 14Bukuuka buno bwoolamwo babaandu kimikaanda kibili, bikana bibili, ni bitoondo bibili (22,200).

15Be mu shikuuka sha Gadi, baaba mu bukuuka bukyeekhe nga buno: Kha Zefoni, Hagi, Shuni, 16Ozuni, Eri, 17Arodi, ni Areli. 18Bukuuka buno bwoolamwo babaandu kimikaanda kine, ni bitoondo biraano (40,500).

19Basooleli ba Yuda nga nibo Eri ni Onani, baafwiila mu shibala sha Kanaani. 20Be mu shikuuka sha Yuda babaaramawo, baaba mu bukuuka bukyeekhe nga nibwo: Kha Shela, kha Perezi, ni kha Zera. 21Khakuuka kha Perezi khaabamwo ba Hezironi, ni ba Hamuli. 22Buno nibwo bukuuka bwe shikuuka sha Yuda, nga babaandu boosi atweela boola kimikaanda musaafu, bikana bisesaba ni bitoondo biraano (76,500).

23Be mu shikuuka sha Isakaari, baaba mu bukuuka bukyeekhe nga buno: Kha Tola, Puwa, 24Yashubu, ni Shimuroni. 25Bukuuka buno bwoosi bwoola babaandu kimikaanda kisesaba, bikana bine, ni bitoondo bitaru (64,300).

26Be mu shikuuka sha Zebuluuni, baaba mu bukuuka bukyeekhe nga buno: kha Seredi, Eloni, ni Yahileeli. 27Bukuuka buno bwoosi bwoola babaandu kimikaanda kisesaba ni bitoondo biraano (60,500).

28Bikuuka bya Yusufu byaba bibili, lwekhuuba niye aaba paapa we basooleli babili nga nibo Manase ni Efurayimu.

29Be mu shikuuka sha Manase baaba mu bukuuka buno: Kha Makiri, Makiri yuno nga niye uwaba paapa wa Gileyadi. Ni Gileyadi waamamwo lisaaye lino: 30Bukuuka bwaba Iyezeri, Heleki, 31Asiriyeli, Shekemu, 32Shemida, ni Heferi. 33Zelofehadi umusooleli wa Heferi s’asaalakho babaana besiinde ta, ne aafuna bakhaana bonyene. Ni kamasiina kaabwe baaba Mahila, Nowa, Hogula, Milika, ni Tiruza. 34Bukuuka bwe mu Manase buno bwoolamwo babaandu kimikaanda kiraano, bikana bibili ni bitoondo musaafu (52,700).

35Be mu shikuuka sha Efurayimu baaba mu bukuuka buno: Kha Shusela, Bekyeri, ni Tahani. 36Be khakuuka kha Erani, baasaalikhana khukhwaama mu Shusela. 37Bukuuka bukyeekhe bwa Efurayimu buno bwoolamwo babaandu kimikaanda kitaru, bikana bibili, ni bitoondo biraano (32,500).

Bukuuka buno nibwo bubwarubukha khukhwaama mu Yusufu.

38Be mu shikuuka sha Benyamini baaba mu bukuuka bukyeekhe nga buno: Kha Bela, Ashibeli, Ahiramu, 39kha Shefufamu, ni kha Hufamu. 40Be bukuuka bukyeekhe bwa Aridi ni Naamani, baasaalikhana khukhwaama mu Bela. 41Be bukuuka bwa Benyamini buno boola babaandu kimikaanda kine, bikana biraano, ni bitoondo bisesaba (45,600).

42Be mu shikuuka sha Dani baaba khakuuka khakyeekhe kha Shuhamu, 43Nga boosi atweela boola kimikaanda kisesaba, bikana bine, ni bitoondo bine (64,400).

44Be mu shikuuka sha Asheri, baaba mu bukuuka bukyeekhe nga buno: Kha Imuna, Ishivi, ni Beriya. 45Be bukuuka bukyeekhe bwa Heberi ni Malikiyeli baasaalikhana khukhwaama mu Beriya. 46Asheri aasaala umwaana umukhaana isi baalaanga bari Sera. 47Bukuuka buno bwoosi atweela bwoolamwo babaandu kimikaanda kiraano, bikana bitaru, ni bitoondo bine (53,400).

48Be shikuuka sha Nafutaali baaba mu bukuuka bukyeekhe buno: Kha Yahizeeli, Guni, 49Yezeri, ni kha Shilemu. 50Bukuuka bukyeekhe buno bwoosi bwoolamwo babaandu kimikaanda kine, bikana biraano, ni bitoondo bine (45,400).

51Babaandu boosi basaani ba Isiraeli beesi baabala boola kimyeeka kisesaba, shikana shitweela, bitoondo musaafu, ni kamakhumi kataru (601, 730).

5226.52: Bala 34.13; Yos 14.1,2Umukasya ndi waalomela Musa ari, 53“Kabananisamwo liiswa lya Kanaani mu bikuuka bino, nga usiintsiila khu bukali bwe babaandu babaali mu buli shikuuka. 54Shikuuka shishiilimwo babaandu baakali khufuurakho, ushiwa liiswa liikali, ni shikuuka shifwiiti khufuurakho, nasho ushiwa liiswa likyeekhekho. Nashiryo buli shikuuka kane shiweebwe liiswa khusiintsiila khu bukali bwe babaandu babaashililmwo. 55Ne liiswa ilyo kane ulikabananisemo nga ukhupa khakokha, usiintsiila khu masiina ke baakuuka ba buli shikuuka. 56Umanye uri liiswa lili ni khuukabananisibwamwo nga ukhupa khaakokha, khuusiintsiila khu bukali namwe bukyeekhe bwe shikuuka.”

57Be shikuuka sha Levi baaba mu bukuuka bukyeekhe buno: Kha Gerishoni, Kohasi, ni Merari. 58Mu shikuuka sha Levi shino mwabamwo bukuuka bubuundi nga buno: Kha Libuni, Heburoni, Mahili, Mushi, ni kha Kora. Umu Levi Kohasi niye uwaba paapa wa Amuramu. 59Lisiina ly’omukhasi wa Amuramu aba bari Yokebedi, umukhaana wa Levi, uwasaalibwila mu Misiri. Yokebedi yuno ni Amuramu baasaala basooleli babili, Aroni ni Musa, atweela n’umukhaana mutweela isi baalaanga bari Miryamu. 6026.60: Bala 3.2Aroni aasaala basooleli bane nga nibo Nadabu, Abihu, Eliyazaari, ni Isamari. 6126.61: Lev 10.1,2; Bala 3.4Ne Nadabu ni Abihu baafwa nga baawaanayo kumulilo kukukhaaba kumukhosefu isi Umukasya ta. 62Ba Levi be seetsa beesi baabala babaaba nga boolesa kumweesi mutweela ni khuuniina angaaki, boola buukali kimikaanda kibili ni bikana bitaru (23,000). Bano nibo baababala khulwayo busa, nga sibabatubaasa mu ba Isiraeli babaaramile ta, lwekhuuba nibo sibaabakho ni kumukabo kwe liiswa mu Kanaani nga ba Isiraeli babaandi ta.

63Babaandu ba Isiraeli bano nibo beesi Musa n’umusaayi Eliyazaari baabala, nga bashiili khu musaalela kwa Mowaabu, shanjelekha we luluutsi Yorudaani, nga ushiili khwaambukha i Yeriko ta. 64Ne mu baandu bano, simwabamwo n’umuundu na mutweela uwaba ashiili mulamu, khu baandu beesi Musa ni Aroni baanyoowa khuubalila mu mubiimbi kwa Sinaayi ta. 6526.65: Bala 14.26-35Lwekhuuba abe Umukasya waamala khaale khuuloma ari boosi balifwa, bahelele mu mubiimbi, khurusakho Kalebu, umusooleli wa Yefune, ni Yoswa, umusooleli wa Nuni bonyene.