Swahili Bible2

25

Babaandu ba Isiraeli besaaya Bayaali i Peyori

1Babaandu ba Isiraeli ni baaba nga bali i Shitimu, basaani baalala khu nibo baarakikha khuukhola bye buyeyani ni bakhasi ba Mowabu. 2Bakhasi bano baalaangatsaka basaani bano khuubawo khu mikholo kye khuuwayo tsisaayilo isi ba wele baabwe. Basaani ba Isiraeli bano nabo baalyaatsaka tsinyama tsitsaamisibwa khu tsisaayilo tsino, naluundi besaaya ba wele be ba Mowabu.

3Baryo babaandu ba Isiraeli baaba nga besaaya Bayaali we Peyori. Isho shaakila lirima lyaaniina Umukasya, waabakhalalila naabi. 4Kila Umukasya alomela Musa ari, “Yila baaraangilisi be ba Isiraeli, babaali khuukhola shishiindu shiibi nga shino, ubakhoonye boosi, iburaangisi we lisari ly’Omukasya, nga buli muundu yeesi abona. Shino manya shinyala shaakila lirima ly’Omukasya isi babaandu ba Isiraeli lyawawo.” 5Aryo Musa waalomela baakhulu be mu Isiraeli ari, “Buli mutweela khusiinywe aakha khuukhoonyaka basaani be mu shikuuka sheewe babaali khukhwisaaya Bayaali we Peyori.”

6Lwanyumakho aabawo umuundu umu Isiraeli mutweela uwatsya waareera umukhasi umu Midiyani waamwinjisa mu lisari lyeewe. Khu mbuka nyene iyo, Musa atweela ni lituuli lye babaandu ba Isiraeli baaba nga balikho beelootsa nga balila iburaangisi we Lisari likhosefu lya Wele. 7Ne Finehasi, umusooleli wa Eliyazaari, umwitsukhulu w’omusaayi Aroni, n’ashibona aryo, wenyukha, waarura mu baandu waatsya. Waabukula lifumo lyeewe, 8waaloondakho khu musaani uyo, mukari mu lisari lyeewe, waabekuba boombi lifumo, lyaabira mu musaani umu Isiraeli tsana, lyaarurira mu mukhasi. Abweene ni abweene, Umukasya waakamisa kitsali uwaba nga ali khuuhesa babaandu ba Isiraeli. 9Ne khuurusakho ndi abe kitsali mweene waakhoonyile babaandu baboola kimikaanda kibili ni bikana bine (24,000).

10Lwanyuma Umukasya waalomela Musa ari, 11“Lwesho sheesi Finehasi, umusooleli wa Aroni akholile, lirima lyase lwe babaandu ba Isiraeli lyaaweelewo. Naye kumutaambo kumuwaambile waalekha khufukiilisa shiibi isho mu baandu ta, shishikilile ise naalekha khuhesa babaandu ba Isiraeli boosi mu lirima lyase ta. 12Nashiryo, n’umuboolele uri, indi khuukhola indakaano yase iye lukoosi ni naye. 13Indakaano iyo, kane ibatsakewo ni naye, atweela ni babetsukhulu beewe babaalimwiililawo mu bikyele byeewe, biilo ni biilo khuuba basaayi. Lwekhuuba naye aryo libuba lyaamuwaambile khu lwa Wele weewe, waareera shishiyakhilo khu lwe shishoonako she babaandu ba Isiraeli.”

14Lisiina ly’omusaani umu Isiraeli, isi baakhoonya nga ali n’umukhasi umu Midiyani aba bari Zimuri, umusooleli wa Salu, uwaba nga niye umuraangilisi we babaandu be mu shikuuka sha Simeoni. 15N’umukhasi umu Midiyani uyo aba bari Kozibi, uwaba umukhaana wa Zuri. Zuri naye aaba umuraangilisi we bukuuka bweewe bukyeekhe mu Midiyani.

16Umukasya waalomela Musa ari, 17“N’uwibwakale babaandu ba Midiyani bano, ubahese ubamalewo, 18lwe buubi bweesi bakholile, khuukhonjelesa babaandu ba Isiraeli khukhwisaaya wele waabwe i Peyori. Naluundi ni lwe shiibi sha Kozibi, umukhaana w’omuraangilisi mutweela mu Midiyani, uweeribwa khu mbuka iya kitsali uwakwawo i Peyori.”