Swahili Bible2

24

1Ari Balaamu aaba waashimanyiile ilala ari Umukasya aamukanisa niye khuuwa babaandu ba Isiraeli tsikhabi. Nashiryo waalekha khuutsya luundi khuwentselesa bye khuuloma ta, nga n’akhola kimiluundi kikyanyoowa ta. Khu luno, emikha busa waalosa tsimoni tseewe khu lubeka lwe kumubiimbi, 2waabona babaandu ba Isiraeli nga bebuusile mu tsikaambi tsaabwe, shikuuka khu shikuuka. Umwoyo wa Wele waamwiikhakho, 3waakanikha bilomo bino bye buŋoosi ari,

“Buŋoosi bwase, ise Balaamu umusooleli wa Beyori,

bilomo by’omusaani ubona buulayi naabi.

4Buŋoosi buno bwiitsa isi ise nga bwaama isi Wele.

Nga naawunguusile tsimoni tsase mu marooro nabona Wele umunyali wa byoosi,

nga naakwiile aasi, naluundi nga naafunyikhiliile tsimoni tsase:

5O baandu ba Isiraeli,

nga kamasari keenywe kabonekha buulayi!

6Nga tsimbibilo tse kamasheendu tsitsiili mu nyilili,

nga tsinimilo tsitsiili khu ndulo khwe luluutsi.

Inywe muli busa kimisaala kimileeyi

kyeesi Umukasya umweene aabyaala,

nga kimisaala kya kedali kikitsowa aambi ni kameetsi.

7Mulifuna kameetsi ke fula kamakali,

mulibalaaha mufwaane nga kuusaala kukuuli aambi ni kameetsi.

Umuyiinga weenywe akhaabe uwe kamaani naabi

khufuurakho umuyiinga Agaga

ni buyiinga bweewe bulibalaaha naabi.

8Wele aabaraangilila wabarusa khukhwaama mu shibala she Misiri;

Umweene abasoolanila wafwaana nga iyeeyi iye mwirome.

Kane muwule baasiku beenywe boosi,

mufuniaakake kamakuumba kaabwe mu bipatu busa,

nga mubawunaka ni bufumo bwe buyiingo.

924.9 a Rak 49.9; b: Rak 12.3Inywe mukona aasi mwebuula nga italanyi,

nga yaakonile aasi, mbaawo umuundu unyala waakinyusawo ta.

Umuundu yeesi ubawa inywe tsikhabi,

kane aweebwe tsikhabi;

Ne umuundu yeesi ukane abatsube,

naye kane atsubibwe.”

10Ne Balaki n’awulila bino, lirima lyaamuniina naabi, waakhupa mukhono, kila alomela Balaamu ari, “Ise nakhulaangile ndi wiitse untsubile baasiku baase bano, ne mu miluundi kitaru kino, iwe waabaweele busa tsikhabi. 11Ari yinyukha uyubekho wiileyo khaangu ingo woowo. Ise nakhusuubisile ndi kane ikhusasule buulayi busa, ne ari khukhwaama nga Umukasya n’akhukhaangile khuukhola sheesi ingana, siinakhusasula ta.”

12Balaamu waamwiilamwo ari, “Ise nabooleele baarume boowo beesi wandumanayo indi 13abe Balaki akhaamba ise intsu yeewe nga yitsuulemo ifeetsa, namwe zaabu, sinyala naminyaalila Umukasya, nakhola shishiindu shoosi mu makyesi kaase busa ta. Sheesi Umukasya aloma nisho sheesi kane ikhole.”

Buŋoosi bwa Balaamu bubwakamayo

14Balaamu waalooselakho ari, “Ari bona ise ndi khukhwiilayo ingo isi babaandu baase, ne indi khuukhulekhela khuureewula khu byeesi babaandu ba Isiraeli bali khuutsya khukhola khu baandu boowo mu biseela bibiitsa iburaangisi.” 15Lwanyuma kila aloma buŋoosi ari:

“Buŋoosi bwase, ise Balaamu umusooleli wa Beyori,

bilomo by’omusaani ubona buulayi naabi.

16Buŋoosi buno bwiitsa isi ise nga bwaama isi Wele.

Nga nawunguusile tsimoni tsase mu marooro nabona Wele umunyali wa byoosi,

nga naakwiile aasi, naluundi nga nafunyikhiliile tsimoni tsase:

17Indi khuubona linaambo lya Isiraeli,

ne indibonela mu biseela bye buraangisi,

byeesi indimanyilekho bishiili khwoolelela ari ta.

Lutweela umuyiinga aliitsawo khukhwaama mu Isiraeli,

Umweene uyo alibonekha nga inieniesi.

Alirura nga imiimbo,

alikhupa ahese baaraangilisi ba Mowabu,

amilyaangulake babaandu ba Seezi.

18Alikhupa awule babaandu ba Edomu,

ayile liiswa lyaabwe.

Babaandu ba Isiraeli baliloosela busa khuuba babafuura.

19Khubirira mu linaambo lya Isiraeli, bunyala bulibonekha

ni babaandu babaaramawo be mu biriimba balihelela ilala.”

20Lwanyuma ndi Balaamu waaloolelela, waabona babaandu ba Amaleki, nabo waabakanikhakho buŋoosi buno:

“Linaambo lya Amaleki lili likhulu naabi mu manaambo koosi,

Ne khu ntsakamo, litsya khuhelela ilala.”

21Indi mu khubonekhelwa khweewe, waabona linaambo lye ba Keni, nabo wabakanikhakho buŋoosi buno:

“Bambaasa bari shiifwo sheesi bamenyamwo shilimwo lukoosi,

Shafwaana nga shiiswi shishili khu lwaanda;

22Bano boosi batsya khuhela,

Nga ba Asiriya beetsile baabayilile nga baabowe.”

23Balaamu waalooselakho buŋoosi buno ari:

“Ne naanu ulinyalisa khuuwonakho

Nga Wele waarakikhile bye khuuhesa khuno?

24Tsimeeri tsilyaama mu Sayipuraasi,

Nga tsireera babaandu babaalibwakala Asiriya ni Eberi.

Ne lwanyuma lwa byoosi,

Sayipuraasi shisheene nasho shilihela.”

25Lwanyuma lwe khuumala khuukanikha bino byoosi, Balaamu wenyukha weelayo ingo weewe, ni Balaki naye waatsya iweewe.