Swahili Bible2

22

Umuyiinga wa Mowabu arumanisa Balaamu

1Babaandu ba Isiraeli belooselayo ni lukyeendo lwaabwe, beetsa baara i kaambi yaabwe khu musaleela kwa Mowabu, i bwaamanyaanga wa Yorudaani, shanjelekha wa Yeriko.

2Ne Balaki umusooleli wa Zipori, umuyiinga wa Mowabu, atweela ni babaandu beewe, baaba baawuliile byeesi ba Isiraeli baakhola babaandu ba Amori. 3Ni shishiindi ndi babaandu ba Isiraeli baaba bali baakali naabi, shaakila buuri bukali bwawaamba umuyiinga wa Mowabu atweela ni babaandu beewe boosi. 4Isho shaakila babaandu ba Mowabu baalomela baaraangilisi be ba Midiyani bari, “Kuubuli kuukali kwe babaandu ba Isiraeli kulikho kwiitsa khuuhesa buli shiindu shoosi shishikhwibotokheleele, nga n’ubona iwuunwa ni khoomba busa bunyaasi.” Kila umuyiinga Balaki 522.5: Bala 31.8; 2 Pet 2.15,16; Yuda 1.11arumanisa baarume khuutsya isi Balaamu, umusooleli wa Beyori, abe umenya mu shiriimba sha Pesori, shishaba aambi ni luluutsi Efurati mu shibala sha Amawu. Buurume buno bwaloma buri, “Indi khuubona kuubuli kwe babaandu kuukali kukweene babeetsile ano nga baama mu Misiri. Beetsile baasalaniile buli aandu, bafwaana bakana khuyila shisiintsa shase. 6Ikhuloomba ndi wiitse unjeete, ubaantsubile lwekhuuba bali baakali naabi. Manya isho shinanyalisa khuubawula, nabawoona khuubarusa khu liswa lino. Ise namanyila ilala ndi, umuundu yeesi isi iwe uwa tsikhabi, aweebwa tsikhabi, ni nooyo isi utsuba, naye atsubibwa.”

7Baryo baaraangilisi bano khukhwaama i Mowabu ni mu Midiyani, benyukha baatsya ni kamapeesa ke khuusasulila shitsubo sheesi Balaamu aaba atsya khukhola. Nga booleleyo, baakaanisa Balaamu buurume bubwaama wa Balaki. 8Kila Balaamu abalomela ari, “Ni mukonekho ano shiilo shino, ni nase kumukaamba ikhaababoolele sheesi Umukasya anaba wambooleele ise.” Baryo baaraangilisi abo baakonayo shiilo isho.

9Mu shilo isho Wele waareeba Balaamu ari, “Babaandu babaakoneele ano mu ntsu yoowo bano, nibo banaanu?”

10Balaamu welamwo ari, “Balaki umusooleli wa Zipori, umuyiinga wa Mowabu, niye ubarumaane isiindi, nga aloma ari 11iliwo babaandu babaamile i Misiri, bari baasalaniile buli aandu oosi mu shibala. Alikho anoomba ise bari intsye imbatsube, nio manya waanyalisa khuubasoolanisa, waabawoona baatsya.”

12Ne Wele welamwo Balaamu ari, “Iwe ukhatsya ni baarume ba Balaki bano ta. Ukhatsya waatsuba babaandu bano babaama mu Misiri, beesi ise namala khaale khuuwa tsikhabi ta.”

13Aryo Balaamu wenyukha kumutikhinyi, waaboolela baarume ba Balaki ari, “Ni mwiileyo mu shibala sheenywe. Umukasya waalobile bari ise sinatsya ni nanywe ta.”

14Baarume bano benyukha beelayo isi Balaki baamulomela bari Balaamu wekaanile khukhwiitsa.

15Lwanyuma ndi Balaki waarumana baaraangilisi babaandi babafuurakho baakiboole buukali ni shiriifwa. 16Nabo beetsa isi Balaamu nga bamureerera buurume khukhwaama isi Balaki nga buloma buri, “Naakhwikoontseleele ni wiitse, ikhabawo shishiindu shoosi shishikhukhaanga khukhwiitsa isi indi ta. 17Ilala kane ikhusasule buulayi naabi, naluundi ikhukholele buli shoosi sheesi kane ukane. Naakhwikoontseleele niwiitse, untsubile babaandu bano.”

18Ne Balaamu welamwo baarume bano nga abalomela ari, “Abe Balaki akhaamba ise intsu yeewe yoosi iyitsuulemo ifeetsa namwe zaabu, sinyala naaminyaala naatsya, naakhola shishiindu shoosi sheesi Umukasya Wele wase akhaandakiile khuukhola ta. 19Ne ni mukonekho ano ndi shiilo shino, nga basheenywe ni baakhola. Nase khaanyoowe imanye sheesi Umukasya anamboolela.”

20Mu shilo isho ndi luundi Wele waalomela Balaamu ari, “Noola babaandu bano beetsile khuukhulaanga iwe, khuutsya mu Mowabu, yinyukha wiŋoonaŋoone utsye ni nabo. Ne, uli ni khuukanikha sheesi kane imbe naakhubooleele.”

21Kuryo kumutikhinyi ukwo, Balaamu wenyukha, wekhala khu sikilya yeewe, waatsya ni baaraangilisi be Mowabu.

Balaamu ni Sikilya yeewe

22Ne Wele lirima lyaamuwaambila Balaamu, lwekhuuba enyukha waatsya ni nabo. Kila Balaamu n’aba nga ali khu sikilya yeewe atsya, nga ali atweela ni bayeeti beewe, Malayika w’Omukasya weetsa weemikha iburaangisi khu mukhoosi kweewe. 23Isikilya ya Balaamu yaabona malayika nga weemile iburaangisi ni lurima mu mukhono kweewe, yaarura khu mukhoosi, yaatsya mwiiswa. Ne Balaamu waakhupa isikilya, nga akana ikobole khu mukhoosi. 24Lwanyuma kila malayika w’Omukasya tsana atsya weemikha khu khayila khaakyeekhe akari e kimikuunda kye kimizabibu, nga buli khu lubeka khulikho liitikiiyi. 25Ne isikilya ni yabona malayika uyo luundi, yaakhakakho khukhwimiinilisa khu lubeka lutweela lwe litikiiyi, shaakila shikyele sha Balaamu shaaŋuukha. Balaamu ndi waakikhupa luundi.

26Awo ndi malayika waarurawo, welooselayo iburaangisi, waatsya weemikha mu shifwo shinyelele naabi mweesi isikilya ikhanyala yaashuukha namwe yemiinilisa khuubirira khu ndulo ta. 27Kila isikilya ni yabona malayika w’Omukasya uyo, yaakona aasi. Balaamu lirima lyaamuniina naabi, waarakikha khuukikhupa ni miimbo yeewe.

28Nga byaabeele biryo, Umukasya waanyalisa isikilya khuukanikha, kila ireeba Balaamu iri, “Shiina sheesi ise ikhukholile kila ukhupile ise kimiluundi kino kitaru?”

29Balaamu waakiilamwo ari, “Lwekhuuba waakholile ise khuuba umuundu umusilu naabi! Imba nga ubeele ni lurima, khali naakhukhoonyile!”

30Nayo isikilya yaamwiilamwo iri, “Ise siindi niyo isikilya yoowo isi ubeele ukyeendatsakilakho imbuka yoosi? Ne manya iliwo shishiindu shoosi sheesi nakhukholatsakakho ndi?”

Balaamu naye weelamwo ari “Taawe.”

31Abweene ni abweene awo, Umukasya waabiimbula tsimoni tsa Balaamu, waabona malayika nga weemikhile ibweeni khu mukhoosi, ni lurima mu mukhono kweewe. Shaakila Balamu wenama aasi, nga waafunikhiliila kumurwe kweewe khwiloba.

32Kila malayika amulomela ari, “Lwashiina iwe ukhupile isikilya yoowo kimiluundi kino kitaru? Ise niye ubeele naashinjiliile intsila yoowo, lwekhuuba singana iwe waatsya khu lukyeendo lwa Mowabu luno ta. 33Ne isikilya yoowo nga yimboone ise, yaaba nga ishuukha khurura khu mukhoosi kimiluundi kino kitaru. Niyo ilekha khukhola iryo, khali ise nakhwiirire iwe, ne njilekha niyo iba inamu.”

34Balaamu naye welamwo malayika w’Omukasya ari, “Ise noonakile. Abe naakhushimanyakho ndi iwe niye uwiimikhile khu mukhoosi khukhuuntsakamisa ta. Ne ari siinga iwe waambaasa uri shili shiibi ise khukhwilooselayo, khayo ishuukhe niile ingo.”

35Malayika waamwiilamwo ari, “Niwiloosele ni lukyeendo lwoowo atweela ni basaani bano. Ne waakha khuukanikha byeesi kane ikhuboolele byonyene.” Aryo Balaamu welooselayo ni baaraangilisi babaama wa Balaki.

Balaki akaanila Balaamu

36Ne Balaki n’awulila ari Balaamu ali khukhwiitsa, waarura ibulafu, waatsya khumwakaanilila mu shiriimba Ari, shishaba khu ndulo khwe luluutsi Arinoni, khu lwaakha lwa Mowabu. 37Kila Balaki alomela Balaamu ari, “Lwashiina kila ukheetsa isi ndi kumuluundi kukwanyoowa, nga ni nakhurumanisa? Wambaasa uri sinyala khuukhusasula ta kila?”

38Balaamu naye waamwiilamwo ari, “Ari bona neetsile. Ne waambaasa uri ise ndi ni bunyala khuukanikha shoosi sheesi ingana? Kane inganikhe byeesi Wele anamboolela khuukanikha byonyene.”

39Lwanyuma baryo boombi Balaki ni Balaamu baatsya mu shiriimba sha Kiriyasi Huzosi. 40Ibweene iyo, Balaki waakhoonya tsikhaafu ni kamasheese, waabiwaanayo nga tsisaayilo, waakaanisakho tsinyama tsitsiindi isi Balaamu atweela ni baaraangilisi beesi aaba ni nabo.

Buŋoosi bwa Balamu bubwanyoowa

41Kumutikhinyi kukweelakho, Balaki waayila Balaamu mu shiriimba Bamosi Bayaali. Ibweene iyo nga Balaamu anyala khubonakho batweela khu baandu ba Isiraeli.